2024ལོར་རང་རྒྱལ་གྱི་ནགས་ཁྲོད་ཟས་རིགས་ཐོན་ཚད་ཏུན་དུང་ཕྱུར་2ལྷག་ཙམ་ཟིན་ནས་འབྲུ་རིགས་དང་སྔོ་ཚལ་ཕུད་པའི་ཞིང་ལས་ཐོན་རྫས་གལ་ཆེན་གསུམ་པར་གྱུར་ཡོད།

ནགས་ཁྲོད་ཟས་རིགས་ཞེས་པ་ནི་ནགས་ཚལ་ལམ་ནགས་ས་རུ་སྐྱེས་པའི་ཟས་རིགས་ལ་ཟེར་ཞིང་། དེའི་ནང་ཟ་ཆོག་པའི་འབྲས་བུ་དང་། མེ་ཏོག ལོ་མ། ཡལ་ག པགས་པ། རྩ་བ། ཚིལ་གཤེར་བཅས་དང་དེ་བཞིན་གཞན་རྟེན་སྐྱེ་དངོས་དང་ཞོར་སྐྱེས་སྐྱེ་དངོས་སོགས་ཤིང་ཆ་མིན་པའི་ནགས་ཚལ་ཐོན་རྫས་ཚུད་ཡོད། དེ་ནི་དཔལ་འབྱོར་ནགས་ཚལ་དང་། ནགས་ཁྲོད་དཔལ་འབྱོར་ཐོན་རྫས། ཕྱུགས་རིགས་ཀྱི་གཟན་ཆག་ཏུ་བརྩི་ཆོག་པའི་གཞན་བརྒྱུད་རང་བཞིན་གྱི་ཟས་རིགས་བཅས་རིགས་ཆེན་པོ་གསུམ་དུ་དབྱེ་ཡོད།

མིག་སྔར། རང་རྒྱལ་དུ་ནགས་ཚལ་མུའུ་དུང་ཕྱུར་34ལྷག་ཙམ་དང་ཤིང་སྣའི་སྐྱེ་དངོས་རིགས་8000ལྷག་ཙམ་ཡོད། 2024ལོར་རྒྱལ་ཡོངས་ཀྱི་ནགས་རྩྭའི་ཐོན་ལས་ཀྱི་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་ཁྲི་10.17ཟིན་པ་དེ་དུས་མཚུངས་ལས་9.6%འཕར་ཡོད། རྒྱལ་ཡོངས་ཀྱི་དཔལ་འབྱོར་ནགས་ཚལ་འདེབས་ཁྱོན་མུའུ་དུང་ཕྱུར་7དང་ལོ་རེའི་ཐོན་རྫས་རིན་ཐང་སྒོར་དུང་ཕྱུར་2ལྷག་ཙམ་ཟིན་པ་དང་། ནགས་ཁྲོད་དཔལ་འབྱོར་གྱི་བེད་སྤྱོད་ནགས་ཚལ་རྒྱ་ཁྱོན་མུའུ་དུང་ཕྱུར་6དང་ལོ་རེའི་ཐོན་རྫས་རིན་ཐང་སྒོར་དུང་ཕྱུར་1ཙམ་ཟིན་གྱི་ཡོད་པ་རེད།