ཀྲུང་དབྱང་ནོར་སྲིད་ཀྱིས་ཞིང་རྒྱས་ཞིང་སྐྱོང་ཞིང་ཕྱུག་གསུམ་གྱི་སྲིད་ཇུས་ཀྱི་གསལ་ཐོ་ཁྱབ་བསྒྲགས་བྱས་པ།
མི་དང་དུད་ཚང་ལ་དོན་འཁྱོལ་བྱེད་པའི་ཁ་གསབ་ཁག་9ཚུད་པ།
རྒྱ་ཆེའི་ཞིང་པ་དང་ཞིང་ལས་ཐོན་སྐྱེད་གཉེར་སྐྱོང་གི་བྱེད་པོ་དང་སྤྱི་ཚོགས་ལས་རིགས་ཁག་ལ་རྒྱལ་ཁབ་ཀྱི་ཞིང་རྒྱས་ཞིང་སྐྱོང་ཞིང་ཕྱུག་གསུམ་གྱི་སྲིད་ཇུས་ཤེས་རྟོགས་བྱེད་པར་སྟབས་བདེ་བསྐྲུན་ནས་སྲིད་ཇུས་ཀྱི་ཁྲིད་སྟོན་ནུས་པ་གང་ལེགས་འདོན་ཆེད། ཉེ་ཆར་ཞིང་ལས་གྲོང་གསེབ་པུའུ་ཡིས་2025ལོའི་ཀྲུང་དབྱང་ནོར་སྲིད་ཀྱི་ཞིང་རྒྱས་ཞིང་སྐྱོང་ཞིང་ཕྱུག་གསུམ་གྱི་སྲིད་ཇུས་ཀྱི་གསལ་ཐོ་ཁྱབ་བསྒྲགས་བྱས་པ་རེད།
གསལ་ཐོའི་ནང་། ལག་བསྟར་བརྟན་པོ་བྱེད་བཞིན་པའི་ཀྲུང་དབྱང་ནོར་སྲིད་ཀྱིས་མི་དང་དུད་ཚང་ལ་ཁྱབ་པའི་ཞིང་ལས་ཁ་གསབ་ཀྱི་སྲིད་ཇུས་ཁག་9ཚུད་ཡོད། དེ་དག་ནི་རྨོ་ཞིང་གི་ས་བཅུད་སྲུང་སྐྱོང་གི་ཁ་གསབ་དང་། ཞིང་འཕྲུལ་ཉོ་སྒྲུབ་དང་བེད་སྤྱོད་ཀྱི་ཁ་གསབ། “གཏོར་བ་གཅིག་དང་འགོག་པ་གསུམ”གྱི་གྲོའི་ཁ་གསབ་རོགས་རམ། སྲན་ཆེན་དང་ཨ་ཤོམ་ཐག་དབྱིབས་ཀྱི་མཉམ་འདྲེས་རྨོ་འདེབས་ཀྱི་ཁ་གསབ་རོགས་རམ། ཨ་ཤོམ་དང་སྲན་ཆེན་ཐོན་སྐྱེད་བྱེད་མཁན་གྱི་ཁ་གསབ་དང་འབྲས་ཀྱི་ཁ་གསབ། རྨོ་ཞིང་རེས་འདེབས་དང་དབྱར་མར་བཞག་པའི་ཁ་གསབ། ཞིང་ལས་སྤྱི་ཚོགས་ཅན་གྱི་ཞབས་ཞུའི་ཁ་གསབ། རྩྭ་ཐང་གི་ཕྱུགས་བཀག་ཁ་གསབ་རོགས་རམ་དང་རྩྭ་ཕྱུགས་དོ་སྙོམས་ཀྱི་བྱ་དགའ་དང་ཞིང་ལས་འགན་བཅོལ་འགྲོ་གྲོན་གྱི་ཁ་གསབ་བཅས་ཡིན་པ་རེད།
སྲིད་ཇུས་རེ་རེར་ཁ་གསབ་རོགས་རམ་དང་རྒྱབ་སྐྱོར་གྱི་ཁྱབ་ཁོངས་དང་བྱ་ཡུལ་རེ་ཡོད། དཔེར་ན། ཞིང་འཕྲུལ་ཉོ་སྒྲུབ་དང་བེད་སྤྱོད་ཀྱི་ཁ་གསབ་ཐད། ནུས་པ་ཆེ་བའི་རྨོ་འདེབས་འཕྲུལ་འཁོར་དང་། རིག་ནུས་ཀྱི་ལྗང་པ་མྱུར་འདེབས་འཕྲུལ་འཁོར། རིག་ནུས་རྩེར་སོན་གྱི་མཉམ་འབྲེལ་བརྔ་བསྡུའི་འཕྲུལ་འཁོར་ཆེ་གྲས་སོགས་ཀྱིས་པད་ཁ་ལྟ་བུའི་ལོ་ཏོག་གཙོ་བོ་གཞི་ཁྱོན་ཆེན་པོས་མུའུ་རེའི་ཐོན་འབབ་མང་དུ་གཏོང་བར་ཕན་ཐོགས་ཡོད་པ་དང་། རི་མ་ཐང་རི་ཁུལ་གྱི་ཞིང་ལས་ཐོན་སྐྱེད་ལ་འཕྲལ་མཁོ་ཆེ་བ། ཞིང་འཕྲུལ་སྒྲིག་ཆས་ཀྱི་ཞན་ཆ་གསབ་པ། ཞིང་ལས་ཁྱབ་ཁོངས་གཞན་དག་འཕེལ་རྒྱས་འགྲོ་བར་འཕྲལ་མཁོ་ཆེ་བ་སོགས་ཀྱི་ཞིང་ལས་འཕྲུལ་ཆས་ཁྱབ་གདལ་བེད་སྤྱོད་གཏོང་རྒྱུར་གཙོ་གནད་ཐོག་རྒྱབ་སྐྱོར་བྱ་རྒྱུ་ཡིན་པ་རེད།
ཤེས་རྟོགས་བྱུང་བར་གཞིགས་ན། གོང་གསལ་གྱི་སྲིད་ཇུས་ལ་དམིགས་ཏེ། ཀྲུང་དབྱང་ནོར་སྲིད་ཀྱི་མ་དངུལ་རྣམས་གཏན་འབེབས་ཀྱི་རྒྱུ་རྐྱེན་གཞིར་བཟུང་རྩིས་བརྒྱབ་སྟེ་ཞིང་ཆེན་ཁག་ལ་བགོ་བཤའ་རྒྱག་རྒྱུ་དང་། ཞིང་ཆེན་རིམ་པས་བླང་བྱ་གཞིར་བཟུང་དོན་དངོས་དང་ཟུང་འབྲེལ་བྱས་ཏེ་གཞི་རིམ་ལ་ཁ་གསབ་ཀྱི་ཁྱབ་ཁོངས་དང་། རྒྱབ་སྐྱོར་བྱ་ཡུལ། ཁ་གསབ་ཀྱི་ཚད་གཞི་བཅས་ཞིབ་ཚགས་སུ་གཏོང་རྒྱུ་ཡིན་པ་རེད།