སེ་འབྲུའི་མེ་ཏོག་ཁྲ་ཆིལ་ཆིལ། བདེ་སྐྱིད་འཚོ་བ་སྐྱིད་ལྷང་ལྷང་།
མངའ་རིས་ས་ཁུལ་གྱིས་མི་རིགས་མཐུན་སྒྲིལ་ཡར་ཐོན་བྱ་གཞག་འཕེལ་རྒྱས་ལ་སྐུལ་འདེད་བཏང་བའི་སྐོར་བཀོད་པ།
2021ལོར། མངའ་རིས་ས་ཁུལ་གྱིས་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་འཛུགས་གཏོད་བདེ་བླག་བྱས་ཤིང་། མིག་སྔའི་བར། སྒར་དང་། རུ་ཐོག རྩྭ་མདའ། སྤུ་ཧྲེང་། དགེ་རྒྱས་བཅས་རྫོང་ལྔ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་རྫོང་དུ་འཛུགས་གཏོད་བྱས་པ་དང་། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གྱི་དཔེ་སྟོན་ཚན་པ་13འཛུགས་གཏོད་བྱས་པ། སྒར་རྫོང་པིང་ཧོ་སྤྱི་བདེ་མངགས་གཏོང་ཁང་ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་སྟོན་ཚན་པའི་མཚན་སྙན་ཐོབ་པ། བདེ་མཆོག་གྲོང་ཚོ་དང་ཚེ་རིང་ནོར་བུར་ཁག་སོ་སོར་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ་དང་དཔེ་བཟང་མི་སྒེར་གྱི་གཟེངས་བསྟོད་ཐོབ་པ་བཅས་རེད།
གྲངས་གཞི་རེ་རེ་དང་དཔེ་མཚོན་རེ་རེ་ལས་མངའ་རིས་ས་ཁུལ་གྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་འཚོ་བ་ཉིན་རེ་བཞིན་བདེ་སྐྱིད་དང་མཛེས་སྡུག་ལྡན་པར་འགྱུར་བ་མཚོན་པ་དང་། མངའ་རིས་ས་ཁུལ་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བའི་རྣམ་པ་བཟང་པོ་མངོན་ཡོད་པ་རེད།
ལམ་སྲོལ་གྱིས་གཡས་གཞོགས་གཡོན་འདེགས་བྱས་ནས་འཛུགས་གཏོད་ལས་དོན་ལ་འགན་སྲུང་བརྟན་པོ་བྱས་པ།
མི་རིགས་མཐུན་སྒྲིལ་ཡར་ཐོན་བྱ་གཞག་ནི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་སྤྱི་ཡོངས་དང་འབྲེལ་བ་ཡོད་པའི་ནང་དོན་གལ་ཆེན་ཞིག་ཡིན་ལ། སྤྱི་ཚོགས་རིང་ལུགས་ཀྱི་ཞི་མཐུན་སྤྱི་ཚོགས་འཛུགས་སྐྲུན་བྱེད་པའི་ནང་དོན་གལ་ཆེན་ཞིག་ཀྱང་རེད།
མངའ་རིས་ས་ཁུལ་གྱིས་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་ལ་ཤུགས་རྒྱག་རིང་སྔོན་ཐོན་བརྩོན་ལེན་གྱི་འགོ་ཁྲིད་ཚོགས་ཆུང་བཙུགས་པ་མ་ཟད། ཚོགས་ཆུང་འོག་གཞུང་ལས་ཁང་བཙུགས་ནས་རྒྱུན་གཏན་གྱི་ལས་འགན་ཁུར་ཏེ། ལས་འགན་ཁག་ལ་སྤྱི་འདོམས་མཛུབ་ཁྲིད་དང་ཕྱོགས་ཡོངས་ནས་སྐུལ་འདེད་བཏང་བ་དང་། རིམ་པ་ཁག་དང་སྡེ་ཚན་ཁག་གིས་མི་རིགས་མཐུན་སྒྲིལ་ཡར་ཐོན་འཛུགས་གཏོད་ལས་དོན་གྱི་འགོ་ཁྲིད་ཚོགས་ཆུང་བཙུགས་པར། གོང་འོག་མཉམ་འགུལ་གྱི་ལས་ཀའི་རྣམ་པ་ཞིག་ཆགས་ཡོད། མངའ་རིས་ས་ཨུད་ཀྱིས་དུས་བཀག་གམ་ཡང་ན་དུས་ངེས་མེད་དུ་ཆེད་དོན་ཚོགས་ཆུང་གི་ལས་ཀའི་སྙན་ཞུ་ཉན་ནས། དུས་མཚམས་རྗེས་མའི་གཙོ་གནད་ལས་དོན་བཀོད་སྒྲིག་དང་། ས་ཨུད་ཧྲུའུ་ཅིས་ལམ་ལུགས་དང་། གནད་འགག ཇུས་གཞི་སོགས་ཁག་ལ་ཞིབ་བཤེར་གཏན་འབེབས་བྱས་ཏེ། “ལས་གྲྭ་ཆེན་པོ་བཞི”དང་“བྱ་སྤྱོད་ཁག་དྲུག”གི་སྣེ་ཁྲིད་ཚན་པ་དང་། འགན་འཁུར་ཚན་པ། འགན་འཁུར་མི་སྣ་བཅས་ཁ་གསལ་བཟོས་པ་རེད།
ཕྱོགས་མང་མཉམ་འགུལ་གྱིས་འགྲོ་འོང་དང་སྤེལ་རེས་ཀྱི་འབྲེལ་ཟམ་བཙུགས་པ།
མངའ་རིས་ས་ཁུལ་སྤུ་ཧྲེང་རྫོང་གི་པད་མ་བདེ་སྐྱིད་2019ལོའི་ཟླ་12པར་ཧོ་པེའི་བོད་སྐྱོར་བྱ་གཞག་ཚན་པའི་ཡིག་རྒྱུགས་འཕྲོད་དེ། ཧེང་ཧྲུའེ་གྲོང་ཁྱེར་རའོ་དབྱང་རྫོང་དྲ་འཕྲིན་གཞུང་དོན་ཁང་དུ་ལས་ཀར་ཞུགས།
བོད་སྐྱོར་བྱ་གཞག་ཚན་པའི་ཡིག་རྒྱུགས་སྲིད་ཇུས་ཁྱབ་གདལ་བཏང་བ་དེས་ཐེམ་ཁུངས་མངའ་རིས་ནས་ཡིན་པའི་བོད་རིགས་སློབ་གྲྭ་ཆེ་མོ་བ་མང་པོ་ཧོ་པེར་ལས་ཞུགས་ཐུབ་ཡོད། ཁོང་ཚོ་ནམ་རྒྱུན་མཉམ་དུ་འཛོམས་ཏེ་སྤེལ་རེས་བྱེད་པ་ལས་པད་མ་བདེ་སྐྱིད་ལ་མི་རིགས་ཁྱིམ་ཚང་ཆེན་པོའི་དྲོ་སྐྱིད་ཟབ་མོ་ཚོར་ཐུབ་ཅིང་། དེའང་མི་རིགས་མཉམ་འདྲེས་ཀྱི་གསོན་ཉམས་ལྡན་པའི་བསྡུས་རིས་ཤིག་ཏུ་གྱུར་ཡོད།
ཉེ་བའི་ལོ་ཤས་རིང་། མངའ་རིས་ས་ཁུལ་གྱིས་མི་རིགས་ཁག་གི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་ཐོག་མཐའ་བར་གསུམ་དུ་སྐུལ་འདེད་གཏོང་རྒྱུ་དེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པའི་ཐབས་ལམ་གལ་ཆེན་ཞིག་ཏུ་བརྩིས་ཏེ། 《མངའ་རིས་ས་ཁུལ་གྱིས<“མི་རིགས་ཁག་གི་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་སྐུལ་སྤེལ་འདུ་འགོད”ལ་སྐུལ་འདེད་གཏོང་རྒྱུའི་སྐོར་གྱི་ལག་བསྟར་ཇུས་གཞི〉ཞིབ་ཕྲའི་ཇུས་གཞི》བཟོས་ནས་ལག་ལེན་ཧུར་ཐག་བསྟར་བ་དང་། རིམ་པ་ཁག་དང་སྡེ་ཚན་ཁག་གིས་མི་དམངས་ལྟེ་བར་འཛིན་པའི་འདུ་ཤེས་མི་རིགས་མཐུན་སྒྲིལ་ཡར་ཐོན་འཛུགས་གཏོད་ལས་དོན་གྱི་བརྒྱུད་རིམ་ཧྲིལ་པོར་ཁྱབ་རྒྱུ་མཐའ་འཁྱོངས་བྱས་ཏེ། “འཆར་གཞི་གསུམ”ཤུགས་ཆེན་སྤེལ་ནས་མི་རིགས་ཁག་གི་འགྲོ་འོང་དང་། སྤེལ་རེས། མཉམ་འདྲེས་ཀྱི་བྱེད་སྒོ་རབ་དང་རིམ་པར་སྐུལ་འདེད་གཏིང་ཟབ་བཏང་བ་རེད།
མངའ་རིས་ས་ཁུལ་གྱིས་སྒར་རེས་རྣམ་པའི་སྤྱི་ཚོགས་ཀྱི་གྲུབ་ཆ་དང་སྡེ་ཁུལ་གྱི་ཁོར་ཡུག་འཛུགས་སྐྱོང་བྱས་པ་བརྒྱུད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་དང་མི་རིགས་ཁག་གི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བའི་ལས་སྟེགས་གལ་ཆེན་བཏོད་དེ། “ནང་དུ་གདན་དྲངས་པ་དང་ཕྱིར་སྐྱོད་པའི”ཕྱོགས་གཉིས་ཀྱི་སྤེལ་རེས་མཐའ་འཁྱོངས་བྱས་ནས། མི་རིགས་ཁག་གི་ཆ་སྒྲིག་རོགས་སྐྱོར་དང་མཉམ་དུ་དུས་ཆེན་གཏོང་བ་སོགས་ཀྱི་མཐུན་འབྲེལ་སྤེལ་རེས་བྱེད་སྒོ་ཧུར་ཐག་སྤེལ་ཏེ། མི་རིགས་ཁག་གི་མང་ཚོགས་ཀྱི་སྒར་རེས་རྣམ་པའི་འཕེལ་རྒྱས་ལ་སྐུལ་འདེད་བཏང་བ་རེད། གཞོན་ནུ་ལོ་ཆུང་གི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་ཚད་མཐོའི་མཐོང་ཆེན་བྱས་ནས། 《གཞོན་ནུ་ལོ་ཆུང་གི་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་བྱ་སྤྱོད་ཇུས་གཞི》བཟོས་ཏེ་ལྗོངས་ཕྱིའི་ཞིང་ཆེན་དང་གྲོང་ཁྱེར་གྱི་གཞོན་ནུ་ལོ་ཆུང་དང“ལག་གདང་སྦྲེལ་བ་དང་གཅིག་སེམས་གཅིག་འབྲེལ”གྱི་བྱེད་སྒོ་རབ་དང་རིམ་པ་སྤེལ་བ། རིམ་པ་ཁག་དང་རིགས་ཁག་གི་སློབ་གྲྭའི་དགེ་སློབ་མང་པོ་གོ་མིང་གཉིས་ལྡན་དགེ་རྒན་གྱི་རིག་ནུས་བརྒྱུད་སྤྲོད་སློབ་ཁང་དང་། སྤེལ་རེས་ཞིབ་སློབ། དབྱར་སྒར། དངོས་སྦྱོང་ལག་ལེན་གསོ་སྐྱོང་སོགས་ལ་ཞུགས་སུ་བཅུག་པ་མ་ཟད། ད་དུང་ཧྲའན་ཤིས་དང་ཧོ་པེ་སོགས་ཀྱི་དགེ་རྒན་གྲགས་ཅན་དང་སློབ་སྤྱི་གྲགས་ཅན་མངའ་རིས་སུ་སྤེལ་རེས་ལ་ཡོང་བར་གདན་དྲངས་ནས། “གཉིས་གཏད་གཅིག”གི་གནད་སྨིན་རོགས་སྐྱོར་དང་། “གྲོང་གསེབ་ཏུ་སློབ་ཁྲིད་བྱེད་པ” ཆེད་དོན་འཆད་ཁྲིད། ལྟ་སྦྱོང་སོགས་ཀྱི་བྱེད་སྒོ་སྤེལ་བ་རེད།
རིག་གནས་ཀྱིས་སེམས་ཀྱི་ཞིང་ས་བརླན་པ་དང་དྲིལ་བསྒྲཌ་སློབ་གསོས་བླ་སྲོག་བཏོད་པ།
ཉེ་ཆར། “ཀྲུང་ཧྭའི་བླ་སྲོག་བཏོད། མངའ་རིས་གསར་པ་བསྐྲུན”ཞེས་པ་བརྗོད་དོན་གཙོ་བོར་བྱས་པའི་མངའ་རིས་ས་ཁུལ་གྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པའི་རིག་རྩལ་མཚན་ཚོགས་ས་ཁུལ་གློག་བརྙན་ཟློས་གར་ཁང་དུ་གཉེར་བ་རེད། ས་གནས་ས་ཐོག་ཏུ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མི་སྒེར་གྱི་འཐུས་མི་དང་། དེ་བཞིན་ཡུ་གུར་རིགས་དང་། སོག་རིགས། ཧུད་རིགས། ས་ལར་རིགས་སོགས་གྲངས་ཉུང་མི་རིགས་ཀྱི་འཐུས་མི་འཁྲབ་སྟོན་ལྟ་བར་གདན་དྲངས་པ་རེད།
མཚན་ཚོགས་ཧྲིལ་པོར་སྒྱུ་རྩལ་གྱི་མཚོན་ཚུལ་མི་འདྲ་བའི་ལེ་ཚན་རེ་རེ་ལས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཚད་མཐོའི་མཐོང་ཆེན་དང་བྱམས་བརྩེའི་ཐུགས་ཁུར་འོག མངའ་རིས་ཀྱི་མི་རིགས་ཁག་གི་མང་ཚོགས་ཀྱིས་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ཏེ། མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་པའི་ཆོད་སེམས་བརྟན་པོ་མངོན་ཡོད་པ་རེད།
ཉེ་བའི་ལོ་ཤས་རིང་། མངའ་རིས་ས་ཁུལ་གྱིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་བརྟེན་ནས་བློ་སྦྱོང་བསླབ་སྐྱོང་ལ་མཐོང་ཆེན་བྱས་ཏེ། རྒྱུན་སྲིང་ལྷོད་མེད་ངང་རིག་གནས་ཀྱི་མངོན་མེད་ནུས་པ་འདོན་རྒྱུ་རྒྱུན་འཁྱོངས་བྱས་ཡོད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དེ་ཏང་ཡོན་ལས་བྱེད་པའི་གསོ་སྦྱོང་གི་ནང་དོན་ནང་བཅུག་ནས། དྲ་ཐོག་ལས་སྟེགས་གང་ལེགས་སྤྱད་དེ་“མཛུབ་རྩེའི་སློབ་སྦྱོང་གི་གཡུལ་ས”བསྐྲུན་པ་དང་ཏང་ཡོན་ལས་བྱེད་པ་8000ལྷག་ཙམ་གྱིས་ལས་ཀའི་ཞོར་དུ“སློབ་སྦྱོང་རྒྱལ་ཁབ་སྟོབས་ཆེན”གྱི་APPདང་སྐད་འཕྲིན་སྤྱི་རྟགས་སོགས་ཀྱི་ལས་སྟེགས་བརྒྱུད་སློབ་སྦྱོང་བྱེད་བཞིན་ཡོད། ཞང་ཞུང་སྒྱུ་རྩལ་ཚོགས་པའི་རིག་རྩལ“རྟ་དམག་ཧྲག་པོའི”ནུས་པ་ཧུར་ཐག་བཏོན་ཏེ། “རིག་གནས་ཁྱིམ་ཚང་ཁྲི་སྟོང་མང་པོར་ཁྱབ་གདལ་གཏོང་བའི”འཁྲབ་སྟོན་བྱེད་སྒོ་རྒྱུན་མཐུད་སྤེལ་ཡོད། ཉེ་བའི་ལོ་བཞིའི་རིང་། རིམ་རྩིས་བརྒྱབ་ན། རིག་གནས་ཁྱིམ་ཚང་ཁྲིར་ཁྱབ་གདལ་གཏོང་བའི་བྱེད་སྒོ་ཐེངས་4000ལྷག་ཙམ་སྤེལ་བ་དང་གསར་བརྗེའི་གློག་བརྙན་1000ལྷག་ཙམ་བསྟན་པར་མང་ཚོགས་མི་ཐེངས་ཁྲི་36ལྷག་ཙམ་ལ་ཕན་པ་ཐོབ་ཡོད།