གྲོང་མདའ་གྲོང་ཚོའི་ཟུར་ཞིག

འདི་ནི་གྲོང་མདའ་གྲོང་ཚོའི་ཡུལ་མི་རེན་ཡུང་ཅུན་གྱིས་ཡུལ་མི་ཚོར་སྔོ་ཚལ་འདེབས་སྟངས་སློབ་བཞིན་པ།

འདི་ནི་གྲོང་མདའ་གྲོང་ཚོའི་ཡུལ་མི་རེན་ཡུང་ཅུན་གྱིས་སྒྱུག་མོར་ཇ་བླུག་བཞིན་པ།

ཉིང་ཁྲི་གྲོང་ཁྱེར་སྣང་རྫོང་གྲོང་མདའ་གྲོང་རྡལ་གྲོང་མདའ་གྲོང་ཚོར་སྐྱོད་སྐབས། འཆམ་མཐུན་དང་ལྷིང་འཇགས་ཀྱི་རྣམ་པ་ཞིག་ངང་གིས་འཆར་ཞིང་། དེས་གྲང་ངར་ཆེ་བའི་ནམ་དུས་དེར་དྲོ་སོབ་སོབ་ཀྱི་སྣང་བ་ཞིག་འབྱིན་འོང་།

གྲོང་མདའ་གྲོང་ཚོ་ནི་ཉིང་ཁྲི་གྲོང་ཁྱེར་སྣང་རྫོང་གྲོང་མདའ་གྲོང་རྡལ་སྲིད་གཞུང་ཡོད་སར་གནས་ཤིང་། གྲོང་ཚོ་ཡོངས་ལ་དུད་ཚང་172དང་མི་598ཡོད། ཉེ་བའི་ལོ་ཤས་རིང་། དཔལ་འབྱོར་དང་སྤྱི་ཚོགས་འཕེལ་རྒྱས་ཕྱིན་པ་དང་བསྟུན་ནས་ཕན་ཚུན་དབར་འགྲོ་འོང་དང་སྤེལ་རེས་ཟབ་ཏུ་ཕྱིན་ཏེ། གྲོང་མདའ་གྲོང་ཚོའི་མི་རིགས་གྲུབ་ཆར་ཡང་འགྱུར་ལྡོག་ཆེན་པོ་བྱུང་ཞིང་། ད་ཆ་བོད་རིགས་དང་། རྒྱ་རིགས། ཧུད་རིགས། ལྷོ་པ་སོགས་མི་རིགས་མང་པོ་དེ་གར་འཚོ་སྡོད་བྱེད་ཀྱི་ཡོད་པས། གྲོང་ཚོ་དེ་སྔོན་མའི་བོད་རིགས་རང་གི་གྲོང་ཚོ་ཞིག་ནས་ད་ཆ་མི་རིགས་མང་པོ་ཕན་ཚུན་ཕྲ་རྒྱན་བཏབ་པ་ལྟ་བུའི་གྲོང་ཚོ་ཞིག་ཏུ་གྱུར་ཡོད།

འཕེལ་རྒྱས་ཀྱི་དོན་དངོས་དེའི་མདུན་དུ་གྲོང་མདའ་གྲོང་ཚོས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་གཙོ་རྐང་དེར་དམིགས་ནས། མི་རིགས་མཐུན་སྒྲིལ་ཡར་ཐོན་འཛུགས་གཏོད་ལས་དོན་དེ་གྲོང་གསེབ་དར་རྒྱས་ཀྱི་འཐབ་ཇུས་དང་ཟུང་འབྲེལ་དམ་ཟབ་ཀྱིས་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་རྒྱ་ཁྱབ་ཐུབ་པར་སྐུལ་འདེད་རྒྱུན་མཐུད་བཏང་ཞིང་། དབུགས་ལམ་གཅིག་གྱུར་དང་། སྐྱིད་སྡུག་མཉམ་མྱོང་། སེམས་པ་གཅིག་འབྲེལ་བཅས་ནི་གྲོང་ཚོ་དེས་ས་མཐོའི་མཛེས་མཐུན་གྲོང་གསེབ་འཛུགས་སྐྲུན་བྱེད་པའི་བརྗོད་དོན་གཙོ་བོ་དང་གྲོང་ཚོ་ཡོངས་ཀྱི་མི་རིགས་ཁག་གི་མང་ཚོགས་ཀྱི་ཐུན་མོང་ངོས་འཛིན་དུ་གྱུར་ཡོད། 2023ལོར། གྲོང་མདའ་གྲོང་ཚོར་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་འཛུགས་གཏོད་དཔེ་བཟང་གྲོང་ཚོའི་གཟི་བརྗིད་མཚན་སྙན་ཐོབ་ཡོད།

མིག་སྔར། གྲོང་ཚོ་དེར་བོད་རིགས་དང་རྒྱ་རིགས་དང་། བོད་རིགས་དང་ཧུད་རིགས་ལས་གྲུབ་པའི་མི་རིགས་མཐུན་སྒྲིལ་ཁྱིམ་ཚང་14ཡོད་ཅིང་། གྲོང་ཚོ་ཡོངས་ཀྱི་མང་ཚོགས་ཀྱིས་ཐུན་མོང་འཕེལ་རྒྱས་དང་མཉམ་དུ་འབད་འཐབ་བྱས་ཏེ། དེ་བས་མཛེས་སྡུག་ལྡན་པའི་མི་རིགས་མཐུན་སྒྲིལ་གྱི་ལེའུ་རྩོམ་བཞིན་ཡོད།

གྲོང་མདའ་གྲོང་ཚོ་ནི་ཉིང་ཁྲི་དང་ལྷོ་ཁ་འབྲེལ་མཚམས་ཀྱི་རྒྱལ་ལམ་560རྒྱུད་དུ་ཆགས་ཤིང་། ལོ་འདི་དག་ནང་ས་ཁུལ་དང་མི་རིགས་མི་འདྲ་བའི་དབར་སྤེལ་རེས་དང་མཉམ་འགུལ་བྱེད་ཚད་རྒྱུན་ཆད་མེད་པར་མང་དུ་ཕྱིན་ཡོད་ལ། མི་རིགས་མཐུན་སྒྲིལ་ཁྱིམ་ཚང་གི་གྲངས་འབོར་ཡང་རྒྱུན་ཆད་མེད་པར་མང་དུ་ཕྱིན་ཡོད།

དེས་མ་ཟད། གྲོང་མདའ་གྲོང་ཚོའི“ཨུ་ལྷན་གཉིས”དང་གྲོང་སྡོད་ལས་དོན་རུ་ཁག་གིས་ཀྱང་ཐོག་མཐའ་བར་གསུམ་དུ་མི་རིགས་མཐུན་སྒྲིལ་འཛུགས་གཏོད་ལས་དོན་ལ་གཞོལ་ནས། མི་རིགས་མཐུན་སྒྲིལ་རིག་གནས་ཐང་ཆེན་ཧུར་ཐག་བསྐྲུན་ཏེ། དུས་བཀག་ལྟར་མི་རིགས་མཐུན་སྒྲིལ་གཟའ་འཁོར་གྱི་བྱེད་སྒོ་སྤེལ་བ་དང་། གྲོང་ཚོའི་ལག་ཤེས་པ་ཚོར་མང་ཚོགས་ལ་འབབ་འཕར་ཕྱུག་འགྱུར་གྱི་ཉམས་མྱོང་མཉམ་སྤྱོད་བྱེད་པར་ཁྲིད་སྟོན་བྱས་ཏེ། ཁྱད་ལྡན་ཞིང་འབྲོག་ལས་མཉམ་དུ་འཕེལ་རྒྱས་གཏོང་བ་དང་། ཞིང་འབྲོག་པའི་རྣམ་པ་གསར་པའི་བྱ་སྤྱོད་དང་ཟུང་འབྲེལ་གྱིས་མི་རིགས་མཐུན་སྒྲིལ་སྐོར་གྱི་དྲིལ་བསྒྲགས་སློབ་གསོ་སྤེལ་ནས། ཡ་རབས་ཀྱི་གྲོང་སྲོལ་དང་། ཁྱིམ་སྲོལ་བཟང་པོ། བབ་ཆགས་ཀྱི་དམངས་སྲོལ་བཅས་དར་སྤེལ་བཏང་བ་བརྒྱུད། མཐུན་འགྲོགས་མཉམ་གནས་དང་རྒྱན་ཐོག་རྒྱན་བརྩེགས་ཀྱི་མི་རིགས་མཐུན་སྒྲིལ་ཁྱིམ་ཚང་ཆེན་པོའི་རྣམ་པ་བཟང་པོ་ཞིག་ཆགས་ཡོད་པ་རེད།