གསར་འགོད་པར་ཆུ་བེད་པུའུ་ནས་ཤེས་རྟོགས་བྱུང་བར། ཉེ་དུས་ཆུ་བེད་པུས་2024ལོའི་རྒྱལ་ཡོངས་ཀྱི་ས་ཆུ་ཤོར་བའི་གནས་ཚུལ་ལྟ་ཞིབ་ཚད་ལེན་གྱི་ལས་དོན་ལེགས་གྲུབ་བྱུང་ཡོད། ས་གནས་ཁག་གི་ཆུ་བེད་སྡེ་ཚན་གྱིས་ས་སེར་མཐོ་སྒང་གི་ས་ཆུ་ཤོར་བར་བཅོས་སྒྲིག་དང་བྱང་ཤར་ས་ནག་ཁུལ་གྱི་བསླད་ཟད་ལུང་ཤུར་བཅོས་སྒྲིག་སོགས་ལ་ཤུགས་སྣོན་བརྒྱབ་ནས་མི་བཟོས་པའི་ས་ཆུ་ཤོར་བར་ལྟ་འདོམས་ལམ་སྲོལ་གསར་པ་མགྱོགས་མྱུར་བཙུགས་ནས་ས་ཆུ་སྲུང་འཛིན་གྱི་སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་བྱེད་པའི་ཐབས་ལམ་གསར་གཏོད་དང་རྒྱ་སྐྱེད་བཏང་ཡོད། ལྟ་ཞིབ་ཚད་ལེན་གྱི་གྲུབ་འབྲས་ལས་མངོན་པ་ལྟར་ན། 2024ལོར་རྒྱལ་ཡོངས་ཀྱི་ས་ཆུ་ཤོར་བའི་རྒྱ་ཁྱོན་སྤྱི་ལེ་ངོས་གྲུ་ཁྲི་260.19བར་ཆག་པ་དང་། ལོ་གོང་མ་ལས་སྤྱི་ལེ་ངོས་གྲུ་ཁྲི་2.57ཉུང་དུ་ཕྱིན་པ། ཆག་ཚད་0.98%ཟིན་པ། བསླད་ཟད་ཤོར་ཚད་འབྲིང་ཙམ་དང་དེ་ཡན་གྱི་རྒྱ་ཁྱོན་གྱིས་བཟུང་བའི་བསྡུར་ཚད་ལོ་གོང་མའི་34.54%ནས་34.26%བར་ཆག་པ། ས་ཆུ་སྲུང་འཛིན་བྱེད་ཚད་72.56%ནས་72.83%བར་མཐོ་རུ་ཕྱིན་པ་བཅས་རེད།

ལྟ་ཞིབ་ཚད་ལེན་གྱི་གྲུབ་འབྲས་ལས་རང་རྒྱལ་གྱི་ས་ཆུ་ཤོར་བའི་གནས་ཚུལ་བརྟན་པོའི་ངང་ལེགས་སུ་ཕྱིན་པ་དང་། ས་ཆུ་ཤོར་བའི་རྒྱ་ཁྱོན“གཉིས་ཆག”དང་། ཆུ་རླུང་གི་བསླད་ཟད“གཉིས་ཉུང་དུ་ཕྱིན་པའི”རྣམ་པ་བཟང་པོ་རྒྱུན་མཐུད་ངང་མངོན་ནས་སྐྱེ་ཁམས་ཁོར་ཡུག་བརྟན་ཐོག་ལེགས་འཕེལ་བྱུང་བ་དང་ས་ཆུ་སྲུང་འཛིན་བྱེད་ཚད་སྔར་བས་མཐོ་རུ་ཕྱིན་ཡོད་པ་རེད།

2024ལོར་རང་རྒྱལ་གྱི་ཆུ་ཤུགས་ཀྱིས་བསླད་ཟད་ཤོར་བའི་རྒྱ་ཁྱོན་སྤྱི་ལེ་ངོས་གྲུ་ཁྲི་105.10དང་རླུང་ཤུགས་ཀྱིས་བསླད་ཟད་ཤོར་བའི་རྒྱ་ཁྱོན་སྤྱི་ལེ་ངོས་གྲུ་ཁྲི་155.09ཟིན་པ་དེས་ས་ཆུ་ཤོར་བའི་སྤྱིའི་རྒྱ་ཁྱོན་གྱི་40.39%དང་59.61%སོ་སོར་བཟུང་ཡོད། དེའི་ནང་ཆུ་ཤུགས་ཀྱིས་བསླད་ཟད་ཤོར་བའི་རྒྱ་ཁྱོན་ལོ་གོང་མ་ལས་སྤྱི་ལེ་ངོས་གྲུ་ཁྲི་2.04ཉུང་དུ་ཕྱིན་པ་དང་ཉུང་དུ་ཕྱིན་ཚད་1.90%ཟིན་པ་དང་རླུང་ཤུགས་ཀྱིས་བསླད་ཟད་ཤོར་བའི་རྒྱ་ཁྱོན་ལོ་གོང་མ་ལས་སྤྱི་ལེ་ངོས་གྲུ་ཁྲི་0.53ཉུང་དུ་ཕྱིན་པ་དང་ཉུང་དུ་ཕྱིན་ཚད་0.34%ཟིན་ཡོད། ཆུ་ཤུགས་ཀྱིས་བསླད་ཟད་ཤོར་བའི་རྒྱ་ཁྱོན་དང་ཉུང་དུ་སོང་ཚད་ཚང་མ་རླུང་ཤུགས་ཀྱི་བསླད་ཟད་ལས་མཐོ་བ་ཡོད་པ་རེད།