ཉེ་ཆར། འགྲིམ་འགྲུལ་སྐྱེལ་འདྲེན་པུའུ་སོགས་སྡེ་ཚན་གསུམ་གྱིས་མཉམ་འབྲེལ་ཐོག《གཉེར་སྐྱོང་ཟོག་འཁོར་རྙིང་པ་མཁོ་མེད་དུ་གཏོང་བའི་སྐོར་གྱི་བརྡ་ཐོ》(གཤམ་དུ《བརྡ་ཐོ》ཞེས་བསྡུ་རྒྱུ)བཀྲམ་ནས་རྒྱལ་ཁབ་ཀྱི་དུས་མཚམས་གསུམ་པ་དང་བཞི་པའི་རླངས་འབུད་ཚད་གཞིའི་གཉེར་སྐྱོང་ཟོག་འཁོར་མཁོ་མེད་དུ་གཏོང་བར་རྒྱབ་སྐྱོར་བྱས་ཏེ་ཚད་གཞི་མཐོ་བ་དང་རླངས་འབུད་དམའ་བའི་ཟོག་འཁོར་ཁག་གཅིག་མགྱོགས་མྱུར་གསར་པ་བརྗེ་དགོས་ལུགས་བཏོན་ཡོད།

《བརྡ་ཐོ》ལྟར། ཁ་གསབ་མ་དངུལ་གྱིས་གཙོ་བོ་ཕྱོགས་གསུམ་ལ་རྒྱབ་སྐྱོར་བྱེད་པ་སྟེ། གཅིག་ནི་རྒྱལ་ཁབ་ཀྱི་དུས་མཚམས་གསུམ་པའི་རླངས་འབུད་ཚད་གཞི་དང་དེ་མན་གྱི་རླངས་འབུད་ཚད་གཞིའི་ཁྲའེ་ཡིའུ་སྣུམ་གྱི་ཟོག་འཁོར་སྔ་སྣུར་ནས་མཁོ་མེད་དུ་གཏོང་བར་རླངས་འཁོར་གྱི་རིགས་དང་སྔ་སྣུར་ནས་མཁོ་མེད་དུ་གཏོང་བའི་ལོ་ཚད་ལ་གཞིགས་ཏེ། རླངས་འཁོར་རེར་ཁ་གསབ་སྒོར་ཁྲི་1ནས་ཁྲི་4.5བར་སྤྲོད་རྒྱུ་དང་། གཉིས་ནི་སྔ་སྣུར་ནས་མཁོ་མེད་དུ་གཏོང་བ་དང་འབྲེལ། རྒྱལ་ཁབ་ཀྱི་དུས་མཚམས་དྲུག་པའི་རླངས་འབུད་ཚད་གཞིའི་ཟོག་འཁོར་རམ་ཡང་ན་ནུས་རྒྱུ་གསར་པའི་ཟོག་འཁོར་གསར་པ་ཉོས་ཚེ། སྔ་སྣུར་ནས་མཁོ་མེད་དུ་གཏོང་བའི་ཁ་གསབ་ཀྱི་རྨང་གཞིའི་ཐོག་རྒྱལ་ཁབ་ཀྱི་དུས་མཚམས་དྲུག་པའི་རླངས་འབུད་ཚད་གཞིའི་ཟོག་འཁོར་གསར་པ་ཉོས་པར་ད་དུང་རླངས་འཁོར་རེར་ཁ་གསབ་དངུལ་སྒོར་ཁྲི་2.5ནས་སྒོར་ཁྲི་6.5བར་སྤྲོད་པ་དང་ནུས་རྒྱུ་གསར་པའི་ཟོག་འཁོར་གསར་དུ་ཉོས་པར་ད་དུང་རླངས་འཁོར་རེར་ཁ་གསབ་སྒོར་ཁྲི་3.5ནས་ཁྲི་9.5བར་སྤྲོད་རྒྱུ། གསུམ་ནི་ནུས་རྒྱུ་གསར་པའི་གྲོང་ཁྱེར་གྱི་གྲང་ཕྲེང་སྡེབ་སྐྱེལ་ཟོག་འཁོར་གསར་པ་ཉོས་པ་ཁོ་ནར་རླངས་འཁོར་རེར་ཁ་གསབ་ཚད་གཞི་སྒོར་ཁྲི་3.5སྤྲོད་རྒྱུ་རེད།

དཔེར་ན། བཙན་ཤེད་ཀྱིས་མཁོ་མེད་དུ་གཏོང་བའི་ལོ་ཚད་ལོ་4ཡན་ཟིན་པའི་རྒྱལ་ཁབ་ཀྱི་དུས་མཚམས་གསུམ་པའི་རླངས་འབུད་ཚད་གཞིའི་ཟོག་འཁོར་ཆེ་གྲས་མཁོ་མེད་དུ་གཏོང་བ་དང་འབྲེལ། འཁོར་མདའ་4དང་དེ་ཡན་གྱི་ནུས་རྒྱུ་གསར་པའི་ཟོག་འཁོར་ཆེ་གྲས་གསར་པ་ཉོས་ཚེ་ཁ་གསབ་མཐོ་ཤོས་སྒོར་ཁྲི་14རག་གི་ཡོད། “རེས་སྐོར་གསར་པའི་ཟོག་འཁོར་རྙིང་པ་མཁོ་མེད་དུ་གཏོང་བའི་ཁ་གསབ་ཐད་ཁྱད་པར་ཅན་གྱི་ཁ་གསབ་ཚད་གཞི་ལག་བསྟར་བྱེད་ཀྱི་ཡོད། ཚད་གཞི་བཟོས་པ་ལས་ཟོག་འཁོར་རྙིང་པ་གསར་པར་བརྗེ་བར་སྐུལ་ལྕག་དང་ཁྲིད་སྟོན་བྱེད་པ་དང་ནུས་རྒྱུ་གསར་པའི་ཟོག་འཁོར་བེད་སྤྱོད་ཀྱི་སྲིད་ཇུས་ཕྱོགས་སྟོན་གོ་རིམ་ལྡན་པའི་ངང་སྐུལ་འདེད་གཏོང་བ་མཚོན་གྱི་ཡོད”ཅེས་འགྲིམ་འགྲུལ་སྐྱེལ་འདྲེན་པུའི་འཆར་འགོད་ཞིབ་འཇུག་ཁང་ཁོར་ཡུག་ཐོན་ཁུངས་སུའོ་ཡི་འབྲེལ་ཡོད་འགན་འཁུར་བས་བཤད།

བསྡོམས་རྩིས་ལ་གཞིགས་ན། 2023ལོའི་ལོ་མཇུག་ཏུ། རྒྱལ་ཡོངས་སུ་ཟོག་འདྲེན་རླངས་འཁོར་ཁྲི་1170.97ཡོད་པའི་ནང་རྒྱལ་ཁབ་ཀྱི་དུས་མཚམས་གསུམ་པ་དང་དེ་མན་གྱི་རླངས་འབུད་ཚད་གཞི་ལྟར་སྐྱེལ་འདྲེན་ལས་གཉེར་བྱེད་མཁན་ཁྲའེ་ཡིའུ་སྣུམ་གྱི་ཟོག་འཁོར་ཁྲི་40ལྷག་ཙམ་ཡོད་པ་རེད། ཟོག་འཁོར་རྙིང་པ་མཁོ་མེད་དུ་གཏོང་བའི་ཁ་གསབ་སྲིད་ཇུས་ལག་བསྟར་བྱས་པ་དེས་ནུས་རྒྱུ་འབུད་ཚད་མཐོ་བ་དང་ཟད་གྲོན་ཆེ་བའི་ཟོག་འཁོར་རྙིང་པ་མཁོ་མེད་དུ་གཏོང་མགྱོགས་སུ་གཏོང་བ་དང་། ཟོག་འཁོར་གྱི་སྐྱེལ་འདྲེན་བྱེད་དྲགས་པའི་གནད་དོན་ཐག་གཅོད་བྱེད་པ། འགྲོ་ལམ་སྐྱེལ་འདྲེན་ལས་རིགས་གཙང་སྦྲ་ཅན་དང་། ཐཱན་ཉུང་ཅན། ཕན་ཆེ་ཅན་བཅས་ཀྱི་འཕེལ་རྒྱས་ལ་སྐུལ་འདེད་གཏོང་བར་ཕན་ཐོགས་ཡོད་པ་མ་ཟད། མ་འཇོག་རྒྱ་ཆེར་གཏོང་བ་དང་ཐོན་ལས་རིམ་སྤོར་ལ་སྐུལ་འདེད་གཏོང་བར་ཕན་ཐོགས་ཡོད་པ་དང་འགྲིམ་འགྲུལ་སྐྱེལ་འདྲེན་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱ་རྒྱུར་ཡང་ཕན་ཐོགས་ཡོད།

ད་ཐེངས་ཀྱི་ཁ་གསབ་སྲིད་ཇུས་ལག་བསྟར་བྱེད་པའི་དུས་ཡུན་ནི་2025ལོའི་ཟླ་1ཚེས་1ཉིན་ནས་2025ལོའི་ཟླ་12ཚེས་31ཉིན་བར་ཡིན་པ་དང་། འབྲེལ་ཡོད་ཡིག་ཆའི་བླང་བྱ་གཞིར་བཟུང་། ས་གནས་ལ་ཐད་ཀར་དུས་ཡུན་ཧ་ཅང་རིང་བའི་དམིགས་བསལ་རྒྱལ་བུན་བཀོད་སྒྲིག་བྱས་ཏེ་ཟོག་འཁོར་རྙིང་པ་མཁོ་མེད་དུ་གཏོང་བའི་རྒྱབ་སྐྱོར་སྲིད་ཇུས་དོན་འཁྱོལ་བྱེད་པར་སྤྱོད་རྒྱུ་རེད། རྒྱབ་སྐྱོར་མ་དངུལ་ནི་སྤྱིའི་ཆ་ནས་9:1ཡི་རྩ་དོན་ལྟར་ཀྲུང་དབྱང་དང་ས་གནས་ཀྱིས་མཉམ་དུ་འགན་འཁུར་རྒྱུ་དང་ཤར་རྒྱུད་དང་། དབུས་རྒྱུད། ནུབ་རྒྱུད་བཅས་ས་ཁུལ་དུ་ཀྲུང་དབྱང་གིས་འགན་འཁུར་བའི་བསྡུར་ཚད་ནི་85%དང་། 90% 95%བཅས་ཡིན་པ་རེད།