ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་23ཉིན་གློག་འཕྲིན་འབྱོར་གསལ། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་དང་རྒྱལ་ཁབ་འཕེལ་རྒྱས་དང་སྒྱུར་བཅོས་ཨུ་ལྷན་གྱིས་མཉམ་དུ་བཟོས་པའི་ལེའུ་བཅུ་བཞི་ཡོད་པའི་ཆེད་དོན་ལེ་ཚན་ཆེ་གྲས《ཞི་ཅིན་ཕིང་གི་དཔལ་འབྱོར་དགོངས་པ་རབ་དང་རིམ་པ་གསལ་འགྲེལ》2025ལོའི་ཟླ་3ཚེས་24ཉིན་གྱི་དགོང་མོའི་ཆུ་ཚོད་19དང་སྐར་མ་45ལ་སྤྱི་ཁྱབ་ལས་ཁུངས་ཀྱི་ནོར་དཔལ་འཕྲིན་ལམ་ཐོག་བསྟན་ཞིང་། དེ་ནི་ཞི་ཅིན་ཕིང་གི་དཔལ་འབྱོར་དགོངས་པར་ཆ་ལག་ཚང་པོས་འགྲེལ་བཤད་བརྒྱབ་པའི་ཆེད་དོན་བརྙན་འཕྲིན་པར་གཞི་ཐོག་མ་ཡིན།

ཞི་ཅིན་ཕིང་གི་དཔལ་འབྱོར་དགོངས་པ་སློབ་སྦྱོང་དང་། དྲིལ་བསྒྲགས། ལག་ལེན་བཅས་གཏིང་ཟབ་བྱེད་པའི་ཆེད་དོན་བརྗོད་གཞི་གལ་ཆེན་ཞིག་ཡིན་པའི་ལེ་ཚན་འདིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་དང་། འཕེལ་རྒྱས་ཀྱི་བཀོད་པ་གསར་པ་འཛུགས་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བ་སོགས་སྐོར་ལ་གནང་བའི་རྣམ་བཤད་གལ་ཆེན་ལ་དམིགས་ནས། དེའི་ནང་འདུས་པའི་ཕུགས་འདུན་གྱི་དད་སེམས་བརྟན་པོ་དང་། ཁ་གསལ་བའི་ཆབ་སྲིད་ཀྱི་སྟོན་ཕྱོགས། ཡངས་པའི་འཐབ་ཇུས་ཀྱི་བསམ་གཞིགས། ལོ་རྒྱུས་ཀྱི་འགན་འཁྲི་ལྕི་པོ། མི་དམངས་ལ་བཅངས་པའི་ལྷག་བསམ། ཚན་རིག་དང་མཐུན་པའི་དགོངས་པ་དང་བྱ་ཐབས་བཅས་ལ་འགྲེལ་བཤད་ཞིབ་ཕྲ་བརྒྱབ་ནས་ཞི་ཅིན་ཕིང་གི་དཔལ་འབྱོར་དགོངས་པས་དུས་རབས་གསར་པའི་ཀྲུང་གོའི་དཔལ་འབྱོར་འཕེལ་རྒྱས་འགྲོ་བར་སྣེ་ཁྲིད་བྱས་པ་ལས་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་དང་ཐོན་པའི་ལོ་རྒྱུས་རང་བཞིན་གྱི་འཕོ་འགྱུར་ཆ་ལག་ཚང་པོས་གསེད་བཀྲོལ་གྱིས་ཞི་ཅིན་ཕིང་གི་དཔལ་འབྱོར་དགོངས་པའི་དུས་རབས་ཀྱི་ཁྱད་ཆོས་དང་། རིགས་པའི་གཞུང་ལུགས་ཀྱི་རིན་ཐང་། ལག་ལེན་གྱི་སྟོབས་ཤུགས་ཆེན་པོ་བཅས་ཕྱོགས་ཡོངས་ནས་མངོན་པར་བྱས་ཡོད།

ལེ་ཚན་གྱིས་འཁྲབ་སྟོན་ཁང་གི་ལེ་ཚན་སྟོན་སྟངས་གསར་གཏོད་བྱ་ཆེད། རང་རྒྱལ་གྱི་དཔལ་འབྱོར་ཁྱབ་ཁོངས་ཀྱི་འགོ་ཁྲིད་ལས་བྱེད་པ་དང་། རིགས་གཅིག་མཁས་ཅན་དང་མཁས་དབང་འཆད་ཁྲིད་གསལ་འགྲེལ་བྱེད་པར་ཆེད་དུ་གདན་དྲངས་པ་དང“དུས་རབས་ཀྱི་དྲི་བ”དང་། “བསམ་ཕྱོགས་སློབ་སྦྱོང” “དགོངས་པའི་སྟོབས་ཤུགས་ཆེན་པོ” “ཐོས་བསམ་མྱོང་རྟོགས”བཅས་ལེ་ཚན་བཞིར་བཀོད་སྒྲིག་བྱས་པའི་ཐོག་གཞི་རིམ་གྱི་ལག་ལེན་དཔེ་མཚོན་100ལྷག་ཙམ་དང་དཔེ་མཚོན་ཉམས་ཞིབ་པ་40ལྷག་ཙམ་གྱིས་གསེད་བཀྲོལ་བྱས་པ་དང་ཟུང་འབྲེལ་གྱིས་ཞི་ཅིན་ཕིང་གི་དཔལ་འབྱོར་དགོངས་པའི་ལྟེ་བའི་དོན་སྙིང་དང་། ཕུན་སུམ་ཚོགས་པའི་ནང་དོན། ལག་ལེན་གྱི་བླང་བྱ་བཅས་གསོན་ཉམས་དོད་པོས་འགྲེལ་བཤད་བརྒྱབ་སྟེ་སྤྱི་ཚོགས་ཧྲིལ་པོས་སྔར་བས་རང་རྟོགས་ཀྱི་སྒོ་ནས་ཞི་ཅིན་ཕིང་གི་དཔལ་འབྱོར་དགོངས་པར་བརྟེན་ནས་གནད་དོན་ཐག་གཅོད་དང་། ལས་དོན་སྤེལ་སྟངས་ལ་སྐུལ་འདེད་བཏང་ནས་སྦྱངས་པ་དང་ཤེས་པ་དག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་དང་གསོན་ཉམས་དོད་པའི་ལག་ལེན་ཞིག་ཏུ་ཏན་ཏིག་འགྱུར་བ་བྱེད་དགོས་པ་བསྟན་ཡོད།

ལེ་ཚན་འདི་ཀྲུང་དབྱང་བརྙན་འཕྲིན་དྲ་བ་དང་། ཀྲུང་དབྱང་བརྙན་འཕྲིན་གསར་འགྱུར། ཀྲུང་དབྱང་བརྙན་འཕྲིན་བརྙན་ལམ། ཀྲུང་དབྱང་བརྙན་འཕྲིན་ནོར་དཔལ་འཕྲིན་ལམ་བཅས་ནས་དུས་གཅིག་ཏུ་བསྟན་ཡོད།