ལྷ་ས་གྲོང་ཁྱེར་དང་བར་ཐག་སྤྱི་ལེ་170ཡོད་པའི་འདམ་གཞུང་རྫོང་གི་ཆ་སྙོམས་ས་བབ་མཐོ་ཚད་སྨི་4300ཟིན་ཞིང་། འདི་གར་རྒྱ་ཁྱོན་ཆེ་བའི་ས་ཞིང་ཐོག་མུ་མཐའ་མེད་པའི་རང་བྱུང་གི་རྩྭ་ཐང་ཡོད། འོན་ཀྱང་དུས་ཡུན་རིང་པོར་འཐུང་ཆུའི་གནད་དོན་ནི་ས་གནས་དེ་གའི་མང་ཚོགས་ཀྱི་དཀའ་ངལ་ཆེ་ཤོས་ཤིག་རེད།

འཇིགས་མེད་རྡོ་རྗེ་ནི་འདམ་གཞུང་གི་པེ་ཅིང་ཆུ་ཀ་ལའི་བཟོ་གྲྭའི་འགན་འཁུར་བ་ཞིག་ཡིན་ཞིང་། འདས་ཟིན་པའི་དཀའ་སྡུག་གི་ལོ་ཟླར་ཕྱིར་དྲན་བྱེད་སྐབས། ཁོང་གིས“སྔོན་རྗེས་འདམ་གཞུང་རྫོང་གྲོང་གི་དུད་ཚང་8000ལྷག་ཙམ་གྱི་ཡུལ་མིས་ལམ་ཐག་སྨི་400ཡི་ས་ནས་སྒལ་པར་ཆུ་ཟོམ་ཁུར་ནས་འཐུང་ཆུ་དབོར་དགོས་ཀྱི་ཡོད། ལྷག་པར་དུ་མི་འབོར་མང་བའི་ཁྱིམ་ཚང་གིས་ཉིན་ལྟར་ཐེངས་མང་པོ་དབོར་དགོས་པས་དངོས་གནས་དཀའ་ངལ་ཧ་ཅང་ཆེན་པོ་ཡོད”ཅེས་བཤད།

འདམ་གཞུང་རྫོང་གི་འཐུང་ཆུའི་གནད་དོན་ཐག་གཅོད་བྱ་ཆེད། 2019ལོར་པེ་ཅིང་གྲོང་ཁྱེར་གྱིས་བོད་སྐྱོར་མ་དངུལ་སྒོར་ཁྲི་3000བཏང་ནས་འདམ་གཞུང་གི་པེ་ཅིང་ཆུ་ཀ་ལའི་བཟོ་གྲྭ་བཙུཌ་པ་དེའི་གྲས་སུ་ཆུ་ལེན་ལས་གྲྭ་དང་། མ་བཅོས་ཆུ་འདྲེན་ལས་གྲྭ ཆུ་གཙང་གསིང་བཟོ་གྲྭའི་ལས་གྲྭ ཆུ་འདྲེན་སྦུག་དྲའི་ལས་གྲྭ་སོགས་ཚུད་ཡོད། ལོ་གཉིས་རིང་ཨར་སྐྲུན་བྱས་པ་བརྒྱུད། 2021ལོར་དེང་རབས་ཅན་གྱི་ཆུ་ཀ་ལའི་བཟོ་གྲྭ་དེ་དངོས་སུ་སྤྱོད་འགོ་ཚུགས་ཡོད།

ད་ཆ་འདམ་གཞུང་གི་པེ་ཅིང་ཆུ་ཀ་ལའི་བཟོ་གྲྭར་ལོ་རེའི་ཆུ་གཙང་གསིང་བྱེད་ཚད་སྨི་རྒྱ་དཔངས་གྲུ་བཞི་ཁྲི་86ཟིན་ནས་འདམ་གཞུང་རྫོང་གྲོང་དང་དེ་བཞིན་ཉེ་འཁོར་གྱི་ཡུལ་མི་ཁྲི་1ཙམ་ལ་བདེ་འཇགས་དང་བློས་འགེལ་ཆོག་པའི་འཐུང་ཆུ་མཁོ་འདོན་བྱེད་ཐུབ་ཀྱི་ཡོད། ཡུལ་མི་ཚོས་ཆུ་ཀ་ལ་འཁྲིད་པ་ནས་བཟུང་ང་ཚོའི་འཚོ་བ་དེ་བས་སྟབས་བདེ་རུ་ཕྱིན་པ་མ་ཟད། ཆུ་སྤུས་ཀྱང་ཡག་ཏུ་ཕྱིན་འདུག་པས་འཐུང་ཆུའི་བདེ་འཇགས་གནད་དོན་ལ་སེམས་ཁྲལ་གང་ཡང་བྱེད་དགོས་མི་འདུག་ཅེས་གཅིག་རྗེས་གཉིས་མཐུད་ངང་བཤད།

པེ་ཅིང་གི་བོད་སྐྱོར་རྣམ་གྲངས་ཀྱི་བཀྲག་མདངས་འཚེར་བའི་དམངས་འཚོའི་ལས་གྲྭའི་གྲས་ཤིག་ཡིན་པའི་འདམ་གཞུང་གི་པེ་ཅིང་ཆུ་ཀ་ལའི་བཟོ་གྲྭ་ལོ་གསུམ་ལྷག་ཙམ་རིང་བརྟན་པོའི་ངང་འཁོར་སྐྱོད་བྱས་པ་ལས་ས་གནས་དེ་གའི་ཡུལ་མིའི་འཐུང་ཆུའི་ཆ་རྐྱེན་ལེགས་སུ་ཕྱིན་པ་མ་ཟད། ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་ཀྱང་ཐེབས་ཡོད།