འདི་ནི་མཁའ་དབྱིངས་ནས་པར་བརྒྱབ་པའི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་གྲོང་ཡིན་པ།

འདི་ནི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་གྲི་གུ་གྲོང་རྡལ་བྲག་རྩ་གྲོང་ཚོའི་མང་ཚོགས་ཀྱི་སྡོད་ཁང་ཡིན་པ།

འདི་ནི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་མཚོ་སྨད་གྲོང་རྡལ་གཏམ་ཤུལ་སྡེ་ཁུལ་ཟླ་གཏམ་ཚོགས་ཆུང་ཡིན་པ།

འདི་ནི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་སྒོ་བསྡུས་ཤང་གི་འབྲི་གཡག་གསོ་ཚགས་རྟེན་གཞིའི་འབྲི་གཡག་ཡིན་པ།

2024ལོར། ལྷོ་ཁ་གྲོང་ཁྱེར་མཚོ་སྨད་རྫོང་གིས་ཀྲུང་དབྱང་དང་། རང་སྐྱོང་ལྗོངས། གྲོང་ཁྱེར་བཅས་ཀྱི་ཐབས་ཇུས་བཀོད་སྒྲིག་ཁག་ཕྱོགས་ཡོངས་ནས་ལག་བསྟར་དོན་འཁྱོལ་གྱིས་སྤུས་ཚད་མཐོ་བའི་འཕེལ་རྒྱས་ཀྱི་བརྗོད་དོན་གཙོ་བོར་དམ་དུ་དམིགས་ཏེ། མཐའ་ཚད་ནུས་ཤུགས་ཡོད་རྒུས་སྲུང་བ་དང་། འཕེལ་རྒྱས་ལ་སྐུལ་འདེད་གཏོང་བ། ཐོན་ལས་དར་རྒྱས་དང་རྨང་གཞི་བརྟན་དུ་གཏོང་བ། ཁོར་ཡུག་ལེགས་སུ་དང་སྤུས་ཚད་མཐོ་རུ་གཏོང་བ་བཅས་བྱས་ནས། ཞིང་ལས་སྟོབས་ལྡན་དང་། གྲོང་གསེབ་མཛེས་སྡུག ཞིང་པ་འབྱོར་ཕྱུག་བཅས་ལ་སྐུལ་འདེད་བཏང་སྟེ། གྲོང་གསེབ་དར་རྒྱས་ལ་སྟོབས་ཤུགས་གཅིག་ཏུ་འདུས་ཡོད།

ཉེ་བའི་ལོ་ཤས་རིང་། མཚོ་སྨད་རྫོང་གིས་དོན་དངོས་ལ་གཞི་ཚུགས་ཏེ། ཞིང་ལས་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་ཏན་ཏིག་སྤེལ་བ་དང་། “ཞིང་བརྟེན་འབྲུ་གསོག་དང་རྩལ་བརྟེན་འབྲུ་གསོག”གི་འཐབ་ཇུས་ལ་སྐུལ་འདེད་གཏིང་ཟབ་བཏང་བར། རྫོང་ཡོངས་ཀྱི་འབྲུ་རིགས་འདེབས་ཁྱོན་དང་ཐོན་ཚད་འཕར་བརྟན་པོ་བྱུང་ཡོད་པ་རེད།

2024ལོར། ཞིང་ལས་ལོ་ཏོག་འདེབས་ཁྱོན་མུའུ་14741ལེགས་གྲུབ་ཟིན་པ་དང་འབྲུ་རིགས་ཀྱི་ཐོན་འབབ་ཏུན་3504.37ཟིན་པའི་ནང་ནས་ཀྱི་ཐོན་འབབ་ཏུན་3153.66དང་། པད་ཁའི་ཐོན་འབབ་ཏུན་200.04 སྔོ་ཚལ་ཐོན་འབབ་ཏུན་600བཅས་ཟིན་ཡོད་པ་རེད།

ཐོན་འབབ་བརྟན་འཕར་ཡོང་བར་འགན་ལེན་བྱ་ཆེད། ཚད་གཞི་མཐོ་བའི་ཞིང་ཁ་སྐྲུན་པར་སྐུལ་འདེད་ཧུར་ཐག་གཏོང་བ་དང་། འདེབས་འཛུགས་ལས་རིགས་དར་རྒྱས་ཀྱི་བྱ་སྤྱོད་ལག་ལེན་གཏིང་ཟབ་བསྟར་བ། ཞིང་ཕན་དམངས་ཕན་སྲིད་ཇུས་ནུས་ཤུགས་ཡོད་རྒུས་དོན་འཁྱོལ་བཅས་བྱས་ཡོད། 2024ལོར། ཚད་གཞི་མཐོ་བའི་ཞིང་ཁ་མུའུ་2000གསར་སྐྲུན་དང་སྒྱུར་བཀོད་བྱས་པ་མ་ཟད། མཚོ་སྨད་གྲོང་རྡལ་དང་གནས་བཞི་ཤང་དུ་སོན་བཟང་འདེབས་འཛུགས་རྟེན་གཞི་བསྐྲུན་པར། མུའུ་620ཡི་སོན་ཞིང་གྲོང་ཁྱེར་དང་རྫོང་རིམ་པ་གཉིས་ཀྱི་ཞིབ་བཤེར་རྩིས་ལེན་བདེ་བླག་འཕྲོད་ནས། རྫོང་ཡོངས་སུ་སོན་ཞིང་མེད་པའི་ལོ་རྒྱུས་ཀྱི་སྟོང་ཆ་གསབ་ཡོད། རྨོ་ཞིང་གི་ས་རྒྱུ་སྲུང་སྐྱོང་ཁ་གསབ་སྒོར་ཁྲི་83.1སྤྲད་པར་མང་ཚོགས་དུད་ཚང་1758ལ་ཕན་པ་ཐོབ་ཡོད། རྩྭ་ཐང་གི་སྐྱེ་ཁམས་སྲུང་སྐྱོང་གི་ཁ་གསབ་བྱ་དགའ་སྒོར་ཁྲི་1692.42དང་ཞིང་ལས་འཕྲུལ་ཆས་ཉོ་སྒྲུབ་ཁ་གསབ་སྒོར་ཁྲི་74.3263སྤྲད་པ་རེད།

གནས་བཞི་གྲོང་ཚོར་སྐྱོད་སྐབས། ཁྲོམ་གཞུང་ཚང་མ་གཙང་ལ་གྲལ་སྟར་འགྲིག་པ་དང་། ཞིང་ཁྱིམ་སྒོ་ར་ཆུང་ཆུང་ཚང་མ་སྐྱིད་སྣང་དོད་པ། ལྷས་རའི་ནང་གི་ནོར་ལུག་ཤ་ཤེད་རྒྱས་པ་བཅས་ཡོད་པ་རེད། ད་ལྟའི་གྲོང་ཚོའི་སྐོར་གླེང་སྐབས། ལམ་འགྲམ་དུ་ཁྱིམ་མཚེས་དང་ཅི་འཕྲོས་མོལ་འཕྲོས་བྱེད་བཞིན་པའི་ལོ་60ལྷག་ཙམ་ལ་སླེབས་པའི་བགྲེས་སོང་བསྟན་འཛིན་གྱིས། “ཟས་གོས་ཐད་སེམས་ཁྲལ་མེད་པ་མ་ཟད། ཁྱིམ་ཚང་གཙང་སྦྲ་དོད་པ་དང་སྲང་ལམ་ཡང་གཙང་ལ་གྲལ་སྟར་འགྲིག་པོ་ཡོད། སྲིད་གཞུང་གིས་ད་དུང་ང་ཚོའི་གསང་སྤྱོད་ལ་སྒྱུར་བཀོད་དང་མི་ཕྱུགས་ལོག་དབྱེ་བྱས་པས། ད་ལྟའི་གྲོང་ཚོ་དངོས་གནས་ཧ་ཅང་མཛེས་ཤིང་ལྟ་ན་སྡུག་པ་ཞིག་ཡོད”ཅེས་བརྗོད་དེ་བསྔགས་བརྗོད་ཀྱི་མེ་ཏོག་གཏོར།

2024ལོར། “ཡུལ་བབ་དང་མཐུན་པའི”རྩ་དོན་གཞིར་བཟུང་། དུད་ཚང་143གྱི་གསང་སྤྱོད་སྒྱུར་བཀོད་བྱས་པ་དང་། མི་ཕྱུགས་ལོག་དབྱེའི་བསྐྱར་སྐྲུན་གྱི་བྱ་སྤྱོད་ལ་སྐུལ་འདེད་གཏིང་ཟབ་བཏང་སྟེ། དུད་ཚང་215ལ་མི་ཕྱུགས་ལོགས་དབྱེའི་གཅིག་སྡུད་རྣམ་པའི་ལྷས་ར་བསྐྲུན་པ། རྒྱལ་གཅེས་འཕྲོད་བསྟེན་ལས་འགུལ་ཧུར་ཐག་སྤེལ་ནས་གྲོང་གསེབ་ཀྱི་འཚོ་བའི་གད་སྙིགས་ཏུན་590ལྷག་ཙམ་གཙང་སེལ་བྱས་པ། སྒེར་བསྐྲུན་དང་གང་བྱུང་དུ་བསྐྲུན་པར་བཅོས་སྒྲིག་བྱེད་པའི་ལས་དོན་ལ་སྐུལ་འདེད་ཤུགས་ཆེན་བཏང་སྟེ། རྩིག་རུལ་གྱང་རུལ་བཅོས་སྒྲིག་དང་སྒེར་བསྐྲུན་དང་གང་བྱུང་དུ་བརྒྱབ་པའི་སྐྲུན་དངོས་ཁག་1144བཤིག་པ་རེད། གྲི་གུ་གྲོང་རྡལ་གྲི་གུ་སྡེ་ཁུལ་གྱི་གྲོང་མི་དངོས་གྲུབ་ལྷ་མོས་གད་འཕྱག་གིན་གསར་འགོད་པར། “ད་ཆ་དུས་བཀག་བཞིན་ཁྲོམ་གཞུང་འཕྱགས་ནས་གད་སྙིགས་གཙང་སེལ་གྱི་གོམས་གཤིས་འཇགས་པ་དང་གཙང་སེལ་བྱས་པའི་གད་སྙིགས་ད་དུང་སྡེ་ཁུལ་གྱི་སྐར་གསོག་སྒོ་རྩིས་ཚོང་ཁང་དུ་བསྐྱལ་ན། གད་སྙིགས་ཁུག་མ་དང་འདག་རྫས་སོགས་འཚོ་བའི་མཁོ་ཆས་དང་བརྗེ་ཆོག་གི་ཡོད། དེ་ལས་ཁྱིམ་ཚང་གཙང་དུ་སོང་བ་མ་ཟད་གྲོང་ཚོ་ཡང་མཛེས་སུ་ཕྱིན་པས་སེམས་པ་དངོས་འབྲེལ་སྐྱིད་པོ་འདུག”ཅེས་བཤད།

ཐོན་ལས་ཀ་རྟེན་ལྟ་བུར་བྱས་ནས་ཕྱུག་འགྱུར་ལམ་བུ་ཡངས་པོར་ཕྱེ་ཞིང་། ཉེ་བའི་ལོ་ཤས་རིང་། མཚོ་སྨད་རྫོང་གིས་ཁུལ་གནས་ཀྱི་ལེགས་ཆ་དང་ཐོན་ཁུངས་ཀྱི་ལེགས་ཆ་གང་ལེགས་བཏོན་ཏེ། ནོར་ལུག་དང་ནས་ནག་སོགས་ཁྱད་ལྡན་ཐོན་ལས་གཙོ་གནད་ཐོག་འཕེལ་རྒྱས་བཏང་ནས། ཡུལ་ཟོག་ལ་བརྟེན་ནས་ཐོན་ལས་དར་རྒྱས་གཏོང་བའི་ལས་དོན་ཡག་པོ་བསྒྲུབས་པ་རེད།

ཉིན་ཤས་གོང་། གྲི་གུ་གྲོང་རྡལ་གྲི་གུ་སྡེ་ཁུལ་གྱིས“འབྲོག་ལས་སྒྱུར་བཅོས”རྣམ་གྲངས་ཀྱི་ཁེ་སྤོགས་བགོ་འགྲེམས་ཀྱི་མཛད་སྒོ་འཚོཌ་ནས། སྡེ་ཁུལ་གྱི་དུད་ཚང་285ཡི་གྲོང་མི་1082ལ་བགོ་འགྲེམས་དངུལ་སྒོར་ཁྲི་593.13བརྒྱབ་པ་རེད།

འབྲོག་ལས་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཡོང་བར་འགན་ལེན་བྱ་ཆེད། མཚོ་སྨད་རྫོང་གིས་སྒོ་ཕྱུགས་ཀྱི་རྒྱུད་པ་ལེགས་བཅོས་དང་སྲོག་ཆགས་ཀྱི་རིམས་འགོག་ལས་དོན་ཡག་པོ་བསྒྲུབས་ཏེ། འབྲོག་ལས་ཀྱི་ཕྱོགས་བསྡུས་ཐོན་སྐྱེད་ནུས་པ་ཆེ་རུ་བཏང་ཡོད། 2024ལོའི་སྟོན་དཔྱིད་གཉིས་སུ་ནོར་ལུག་མགོ་གྲངས་ཁྲི་37.4784ལ་རིམས་ནད་སྔོན་འགོག་དང་ཚོད་འཛིན་གྱི་རིམས་འགོག་སྨན་ཁབ་བརྒྱབ་སྟེ་རིམས་འགོག་བྱེད་ཚད་100%ཟིན་པ་དང་། སྒོ་ཕྱུགས་མགོ་གྲངས་60446བཙས་པར་57273གསོན་ནས་གསོན་ཚད་94.8%ཟིན་པ། གླང་མགོ་གྲངས་1315ལ་རྒྱུད་པ་ལེགས་བཅོས་བྱས་པ་རེད།

ཉེ་བའི་ལོ་ཤས་རིང་། མཚོ་སྨད་རྫོང་གིས་གཞི་རིམ་ཏང་རྩ་འཛུགས་ཀྱིས་མཉམ་ལས་ཁང་གི་སྣེ་ཁྲིད་དེ། མང་ཚོགས་ལ་ས་ཞིང་དང་རྩྭ་རའི་གཉེར་སྐྱོང་དབང་ཆ་དང་། ས་རྒོད། ཞིང་ལས་འཕྲུལ་ཆས་སོགས་མ་རྐང་ནང་བཞག་ནས་མཉམ་ལས་དཔལ་འབྱོར་འཕེལ་རྒྱས་གཏོང་བར་ལྕག་སྐུལ་དང་རོགས་སྐྱོར་བྱས་ཡོད། 2024ལོར། ཨན་ཧུའེ་ཞིང་འབྲོག་ལས་ཞབས་ཞུའི་ཆེད་ལས་མཉམ་ལས་ཁང་གིས་མ་རྐང་ནང་ཞུགས་མཁན་དུད་ཚང་སོ་སོར་ཆ་སྙོམས་ཡོང་འབབ་སྒོར་1000འཕར་བར་བྱས་པ་དང་། ཨན་ཧུའེ་ཞིང་ལས་འཕྲུལ་ཆས་ཞབས་ཞུའི་ཆེད་ལས་མཉམ་ལས་ཁང་མཉམ་སྡེབ་ཀྱིས་སྒོར་ཁྲི་5བགོ་འགྲེམས་བརྒྱབ་པ་རེད།

2024ལོར། འབྲུ་རིགས་བདེ་འཇགས་ལ་འགན་ལེན་བརྟན་པོ་དང་ཐོན་ལས་འཕེལ་རྒྱས་དར་རྒྱས་ཆེན་པོ་བྱུང་བ་ནས་སྐྱེ་ཁམས་སྡོད་མལ་ལ་འཚམ་པའི་བར་རྣམ་པ་གསར་རྐྱང་དུ་གྱུར་ཏེ། གསོན་ཤུགས་རབ་ཏུ་འཕེལ་བའི་མཚོ་སྨད་ཀྱི་ཞིང་ལས་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་པ་ཞིག་བཏོད་ཡོད་པ་རེད།