འདི་ནི་ཟླ་2ཚེས་14ཉིན། ཅང་ཤིས་ཞིང་ཆེན་ཀའོ་ཨན་གྲོང་ཁྱེར་པ་ཅིང་གྲོང་རྡལ་གྱི་ཁ་ཐོར་རྣམ་པའི་རླུང་ཤུགས་གློག་འདོན་དང་གཅིག་སྡུད་རྣམ་པའི་འོད་ཤུགས་གློག་འདོན་ས་ཚིགས་ཀྱི་ཡུག་འབྲེལ་འོད་ཤུགས་གློག་འདོན་ཤེལ་ལེབ་དང་། འགྱིང་ངེར་གནས་པའི་རླུང་ཤུགས་གློག་འདོན་འཕྲུལ་ཆས་རི་ཆུ་དང་ཞིང་ཁ་དང་འབྲེལ་ནས་མཛེས་སྡུག་ལྡན་པའི་རྣམ་པ་ཞིག་མངོན་བཞིན་པ། （ཀྲུའུ་ཧའེ་ཕེང་གིས་པར་བླངས）

དབྱེ་ཞིབ་བྱས་པ་ལས་མངོན་པར། 2024ལོར་ཀྲུང་གོའི་ནུས་རྒྱུ་གཙང་མའི་ལས་རིགས་ཀྱི་བྲིན་ཚོང་དང་མ་འཇོག་དངུལ་འབོར་མི་དམངས་ཤོག་སྒོར་དུང་ཕྱུར་ཁྲི་13.6ཙམ་ཟིན་ནས་ཀྲུང་གོའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར（GDP）ལ་ལེགས་སྐྱེས་འབུལ་ཚད་10%ཟིན་ཏེ། ཉི་ནུས་དང་། ནུས་རྒྱུ་གསར་པའི་རླངས་འཁོར། གློག་རྫས་ཐོན་ལས་བཅས་འཕེལ་རྒྱས་ཕྱིན་ནས་ཀྲུང་གོའི་ནུས་རྒྱུ་གཙང་མའི་ལས་རིགས་མགྱོགས་མྱུར་འཕེལ་རྒྱས་འགྲོ་བར་ནུས་པ་གལ་ཆེན་ཐོན་ཡོད།

དབྱིན་ཇིའི་གནམ་གཤིས་གསར་འགྱུར་དྲ་ཚིགས“ཐཱན་གནད་བསྡུས”ནང་། དབྱེ་ཞིབ་དེའི་ནང་ནུས་རྒྱུ་གཙང་མའི་ལས་རིགས་ཀྱི་ཁྱབ་ཆེ་བའི་མཚན་ཉིད་སྤྱད་ཡོད། དེའི་ནང་བསྐྱར་སྐྱེས་ནུས་རྒྱུ་དང་། ཉིང་ནུས། གློག་དྲ། ནུས་རྒྱུ་གསོག་འཇོག གློག་སྒུལ་རླངས་འཁོར་དང་ལྕགས་ལམ་བཅས་ཚུད་ཡོད། གློག་སྒུལ་རླངས་འཁོར་དང་རླངས་འཁོར་གྱི་གློག་རྫས་ནི་ན་ནིང་ཀྲུང་གོའི་ནུས་རྒྱུ་གཙང་མའི་དཔལ་འབྱོར་ལ་ལེགས་སྐྱེས་འབུལ་མཁན་ཆེ་ཤོས་སུ་གྱུར་པ་དེས་ལས་རིགས་རིན་ཐང་བསྡོམས་འབོར་གྱི་39%ཙམ་བཟུང་ཡོད།

“ཐཱན་གནད་བསྡུས”ཀྱི་རྩོམ་སྒྲིག་པ་བསླབ་པ་རྒན་གྲས་ཞིས་མོང·ཨའེ་ཝུན་སི་ཡིས། གོ་ལ་ཧྲིལ་པོའི་དུས་བབ་ལ་འགྱུར་ལྡོག་ཇི་འདྲ་བྱུང་རུང་། ཀྲུང་གོས་སྔར་བཞིན་ནུས་རྒྱུ་གཙང་མ་འཕེལ་རྒྱས་གཏོང་བར་གཞོལ་རྒྱུ་རེད། ཀྲུང་གོས་ན་ནིང་གི《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་གི་སྒྲོམ་གཞིའི་སྤྱི་ཆིངས》འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དགུ་པའི（COP29）ཐོག་ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་ཧུར་ཐག་གཅོག་པའི་རྒྱལ་ཁབ་ཀྱི་འཐབ་ཇུས་མུ་མཐུད་ལག་ལེན་བསྟར་རྒྱུ་ཡིན་ལུགས་ཁ་གསལ་བསྟན་ཡོད་ཅེས་བརྗོད།

—— དབྱིན་ཇིའི《སྲུང་སྐྱོབ་ཚགས་པར》ཐོག་གནས་ཚུལ་སྤེལ་བ་གཞིར་བཟུང་།