ཉེ་ཆར། རི་པིན་གྱི་ཕྱིར་སྡོད་རང་མིའི་ལས་རིགས་ཀྱིས་གཙོ་གཉེར་བྱས་པའི《ཁ་ཕྲལ་ལ་ངོ་རྒོལ་བྱེད་པའི་རྒྱལ་ཁབ་ཀྱི་བཅའ་ཁྲིམས》ལག་བསྟར་བྱས་ནས་ལོ་20འཁོར་བའི་བཞུགས་མོལ་ཚོགས་འདུ་ཐོ་ཁེའོ་རུ་འཚོགས་པ་རེད།

རི་པིན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཝུའུ་ཅང་ཧའོ་ཡིས་ཐའེ་དབན་ནི་ཀྲུང་གོའི་མངའ་ཁོངས་ཀྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་འདི་ནི་ལོ་རྒྱུས་ཡིན་ལ་དོན་དངོས་ཤིག་ཀྱང་རེད། འདི་ལོ་ནི་ཐའེ་དབན་སླར་གསོ་བྱས་ནས་ལོ་80འཁོར་བའི་ལོ་ཞིག་རེད། ཀྲུང་གོ་མི་དམངས་ཀྱི་རི་འགོག་དམག་འཁྲུག་ལ་རྒྱལ་ཁ་ཐོབ་སྟེ་ཐའེ་དབན་སླར་ཡང་ཀྲུང་གོའི་མངའ་ཁོངས་སུ་ལོག་ཡོད། དམག་འཁྲུག་ལ་རྒྱལ་ཁ་ཐོབ་མཁན་རྒྱལ་ཁབ་གཙོ་བོས་ལོ་དེར་སྤེལ་བའི《ཁེ་རོའི་བསྒྲགས་གཏམ》དང《པོ་ཚི་ཐན་གྱི་སྤྱི་བསྒྲགས》ཚང་མའི་ནང་རི་པིན་གྱིས་ཧམ་བཟུང་བྱས་པའི་ཐའེ་དབན་ཀྲུང་གོར་ཕྱིར་སྤྲོད་བྱེད་དགོས་པའི་གཏན་འབེབས་ཁ་གསལ་བྱས་ཡོད་པ་དང་། རི་པིན་གྱིས་ཀྱང《པོ་ཚི་ཐན་གྱི་སྤྱི་བསྒྲགས》ཁས་བླངས་ནས་ཆ་རྐྱེན་གང་ཡང་མེད་པར་མགོ་སྒུར་རྒྱུའི་ཁྱབ་བསྒྲགས་ཀྱང་བྱས་པ་རེད། དེ་དག་ཚང་མས་ཀྲུང་གོས་ཐའེ་དབན་ལ་འཛིན་པའི་བདག་དབང་ཁས་ལེན་བྱས་པ་མ་ཟད། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་གྱི་གྲུབ་ཆ་གལ་ཆེན་ཞིག་གྲུབ་ཡོད་ཅེས་བརྗོད།

ཝུའུ་ཅང་ཧའོ་ཡིས་ཐའེ་དབན་གྱི་གནད་དོན་ཐག་གཅོད་བྱེད་པ་དང་མེས་རྒྱལ་རྦད་དེ་གཅིག་གྱུར་བྱ་རྒྱུ་ནི་ཀྲུང་གོ་གུང་ཁྲན་ཏང་གི་བློ་བརྟན་འགྱུར་མེད་ཀྱི་ལོ་རྒྱུས་ཀྱི་ལས་འགན་ཞིག་ཡིན་ལ། ཀྲུང་ཧྭའི་བུ་ཕྲུག་ཡོངས་ཀྱི་ཐུན་མོང་གི་རེ་འདུན་ཞིག་ཀྱང་ཡིན། ལོ་20ཡི་གོང“ཐའེ་དབན་རང་བཙན”གྱི་ཁ་ཕྲལ་བྱེད་སྤྱོད་ཉིན་རེ་བཞིན་སྨྱོ་ཧམ་ཆེ་རུ་ཕྱིན་པ་དང་རྒྱལ་ཁབ་ཀྱི་བདག་དབང་དང་མངའ་ཁོངས་ས་ཆ་ཆ་ཚང་ལ་འཇིགས་སྐུལ་ཚབས་ཆེན་བཟོ་བའི་དུས་བབ་འོག“ཐའེ་དབན་རང་བཙན”གྱི་ཁ་ཕྲལ་ལ་ངོ་རྒོལ་དང་བཀག་འགོག་བྱེད་པ་དང་མེས་རྒྱལ་གཅིག་གྱུར་ལ་སྐུལ་འདེད་གཏོང་ཆེད། ཀྲུང་གུང་ཀྲུང་དབྱང་གིས་རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་ཡོངས་ཀྱི་རེ་འབོད་དྲག་པོར་བསྟུན་ནས《ཁ་ཕྲལ་ལ་ངོ་རྒོལ་བྱེད་པའི་རྒྱལ་ཁབ་ཀྱི་བཅའ་ཁྲིམས》ཀྱི་ཐབས་ཇུས་གལ་ཆེན་བཀོད་པ་དང་། རྒྱལ་ཡོངས་མི་དམངས་འཐུས་ཚོགས་སྐབས་བཅུ་པའི་ཚོགས་འདུ་ཐེངས་གསུམ་པའི་ཐོག་བཅའ་ཁྲིམས་འདིར་འདེམས་ཤོག་མང་པོ་ཐོབ་ནས་གྲོས་འཆམ་བྱུང་བ་དང་འབྲེལ་ཁྱབ་བསྒྲགས་ལག་བསྟར་བྱས་པ་དེ་ནི་ངོགས་གཉིས་ཀྱི་འབྲེལ་བའི་ལོ་རྒྱུས་ཐོག་གི་ལམ་ཚད་རྡོ་རིང་གི་དོན་སྙིང་ལྡན་པའི་དོན་ཆེན་ཞིག་རེད་ཅེས་ནན་བཤད་བྱས་པ་རེད།