འདི་ནི་རྒྱལ་སྤྱིའི་ཟོག་འདྲེན་དུས་གཏན་མེ་འཁོར་པེ་ཅིང་ཧྥང་ཧྲན་ཆུས་ནས་ཐོན་ཏེ་ཨུ་ཟ་བྷེ་ཁི་སི་ཐན་གྱི་རྒྱལ་ས་ཐ་ཧྲི་ཀན་དུ་སྐྱོད་བཞིན་པ།

ཉིན་ཤས་གོང་། ཚད་ལྡན་དོས་སྒམ་90ཡི་ནང་ཕྱིར་གཏོང་དངོས་ཟོག་བླུགས་པའི་རྒྱལ་སྤྱིའི་ཟོག་འདྲེན་དུས་གཏན་མེ་འཁོར་པེ་ཅིང་ཧྥང་ཧྲན་ཆུས་ནས་ཐོན་ཏེ་ཨུ་ཟ་བྷེ་ཁི་སི་ཐན་གྱི་རྒྱལ་ས་ཐ་ཧྲི་ཀན་དུ་བསྐྱོད་པ་དེ་ཐོག་ནས་པེ་ཅིང་གྲོང་ཁྱེར་གྱི་ཨེ་ཤེ་ཡ་དབུས་མའི་དུས་གཏན་མེ་འཁོར་ཐོག་མ་དངོས་སུ་གཏོང་འགོ་ཚུགས་པ་མཚོན་ཡོད།

དུས་གཏན་མེ་འཁོར་དེ་པེ་ཅིང་སྐམ་སའི་གྲུ་ཁ་གསར་པ་མཁོ་སྤྲོད་འཁོར་འབྲེལ་ཚད་ཡོད་ཀུང་སིས་གཉེར་སྐྱོང་བྱས་པ་དང་ཀྲུང་གོ་ལྕགས་ལམ་དོས་སྒམ་སྐྱེལ་འདྲེན་ཚད་ཡོད་འགན་འཁྲི་ཀུང་སིས་བརྒྱུད་རིམ་ཧྲིལ་པོའི་སྐྱེལ་འདྲེན་ཞབས་ཞུ་སྒྲུབ་ཡོད། སྔོན་དཔག་བྱས་ན། ཉིན་10ཡས་མས་སུ་ཐ་ཧྲི་ཀན་དུ་འབྱོར་བ་དང་ལམ་ཐག་ཧྲིལ་པོར་སྤྱི་ལེ་5000ལྷག་ཙམ་ཡོད་པ་རེད།

མེ་འཁོར་གཏོང་འགོ་ཚུགས་པའི་མཛད་སྒོའི་ཐོག་པེ་ཅིང་སྐམ་སའི་གྲུ་ཁ་གསར་པ་ཚོགས་པ་དང་། པེ་ཅིང་ཅིན་ཡུས་ཚོགས་པ། པེ་ཅིང་ཅིང་ཧྥང་ཟོག་འགྲེམས་ལྟེ་གནས་ཚད་ཡོད་ཀུང་སི་བཅས་ཀྱིས་འཐབ་ཇུས་མཉམ་ལས་ཀྱི་གྲོས་མཐུན་ལ་སོ་སོར་མིང་རྟགས་བཀོད་ནས་ཧྥང་ཧྲན་ཆུས་སུ་ཐུན་མོང་ཐོག་རྒྱལ་སྤྱིའི་སྐམ་སའི་གྲུ་ཁའི་རྣམ་གྲངས་བསྐྲུན་རྒྱུ་རེད། གྲངས་གཞི་ལས་མངོན་པར། 2024ལོར་ཐེན་ཅིན་གྱིས་ཀྲུང་ཡོའི(ཨེ་ཤེ་ཡ)དུས་གཏན་མེ་འཁོར་600བཏང་བ་དང་ཧོ་པེ་ཧྲི་ཅ་ཀྲོང་གིས་ཀྲུང་ཡོའི(ཨེ་ཤེ་ཡ)དུས་གཏན་མེ་འཁོར་839ཙམ་བཏང་ཡོད། རྨང་གཞི་བརྟན་པ་དེས་ཅིང་ཅིན་ཅི་གསུམ་མཉམ་ལས་ཀྱིས་ཀྲུང་ཡོའི(ཨེ་ཤེ་ཡ)དུས་གཏན་མེ་འཁོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུར་འདེགས་སྐྱོར་བྱས་ཡོད།