གསར་འགོད་པས་ཚེས་18ཉིན་འཚོགས་པའི་ཀྲུང་གོ་དང་ཨ་ཧྥེ་རི་ཁའི་དཔལ་འབྱོར་ཚོང་དོན་དངོས་མང་སྟོན་ཚོགས་སྐབས་བཞི་པའི་འོས་སྦྱོར་ཚོགས་འདུའི་ནས་ཤེས་རྟོགས་བྱས་པར། ཀྲུང་གོ་དང་ཨ་ཧྥེ་རི་ཁའི་དཔལ་འབྱོར་ཚོང་དོན་དངོས་མང་སྟོན་ཚོགས་སྐབས་བཞི་པ་ཟླ་6ཚེས་12ནས་15ཉིན་བར་ཧུའུ་ནན་ཁྲང་ཧྲ་རུ་འཚོག་རྒྱུ་རེད།

སྐབས་འདིའི་དངོས་མང་སྟོན་ཚོགས་ཀྱིས“ཀྲུང་གོ་དང་ཨ་ཧྥེ་རི་ཁས་མཉམ་དུ་བྱ་སྤྱོད་སྤེལ། དེང་རབས་ཅན་གྱི་ཕུགས་འདུན་དོན་གཉེར་བྱེད”ཅེས་པ་བརྗོད་དོན་གཙོ་བོར་བྱས་ཤིང་། འགྲེམས་ཁང་གཙོ་བོའི་འགྲེམས་སྟོན་རྒྱ་ཁྱོན་སྨི་ངོས་གྲུ་ཁྲི་10ཟིན་པས། ཀྲུང་གོ་དང་ཨ་ཧྥེ་རི་ཁའི་བཟོ་ལས་ཅན་དང་ཞིང་ལས་དེང་རབས་ཅན་མཉམ་ལས་ཀྱི་གྲུབ་འབྲས་འགྲེམས་སྟོན་བྱ་རྒྱུ་མ་ཟད། ནུས་རྒྱུ་གཙང་མ་དང་། ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོང་། སྲོལ་རྒྱུན་གྱི་སྨན་རྫས། རྒྱལ་སྒྲོལ་གློག་རྡུལ་ཚོང་དོན། དེང་རབས་ཞིང་འཕྲུལ། བཟོ་སྐྲུན་འཕྲུལ་ཆས་སོགས་ཁྱབ་ཁོངས་ལ་དམིགས་ནས་ཆེད་དོན་འགྲེམས་སྟོན་ཁུལ་འཛུགས་རྒྱུ་རེད།

ཀྲུང་གོ་དང་ཨ་ཧྥེ་རི་ཁའི་དཔལ་འབྱོར་ཚོང་དོན་དངོས་མང་སྟོན་ཚོགས་2019ལོ་ནས་བཟུང་གྲུབ་འབྲས་ཐོབ་པའི་ངང་སྐབས་གསུམ་གཉེར་བ་དང་། རིམ་རྩིས་བརྒྱབ་ན། ཀྲུང་གོ་དང་ཨ་ཧྥེ་རི་ཁའི་ཁེ་ལས་4600ལྷག་ཙམ་གྱི་ཚོང་པ་ཁྲི་4ཙམ་དངོས་མང་སྟོན་ཚོགས་ནང་ཞུགས་རྒྱུའི་ཡིད་དབང་བཀུག་ཏེ། ཨ་ཧྥེ་རི་ཁའི་རྒྱལ་ཁབ་53དང་ཀྲུང་གོའི་ས་གནས་ཀྱི་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་31ལ་ཁྱབ་ཡོད་པ་རེད། ཕྱོགས་ཁག་གིས་མཉམ་ལས་རྣམ་གྲངས་སམ་གྲོས་མཐུན་ཁག་336ལ་མིང་རྟགས་བཀོད་པར་ཨ་སྒོར་དུང་ཕྱུར་533.2ཟིན་ནས་ཀྲུང་གོ་དང་ཨ་ཧྥེ་རི་ཁའི་མཉམ་ལས་ལ་སྐུལ་འདེད་གཏོང་བའི་ལས་སྟེགས་གལ་ཆེན་ཞིག་ཏུ་གྱུར་ཡོད།