ཤིན་ཧྭ་གསར་འགྱུར་ཁང་གྲོང་ཁྱེར་ཨ་ཧྲི་ཁ་པད་ནས་གློག་འཕྲིན་འབྱོར་བ་གཞིར་བཟུང་། ཟླ་3ཚེས་15ནས་19ཉིན་བར་ཀྲུང་གོ་ཚོང་དོན་སྐུལ་འདེད་ལྷན་ཚོགས་ཀྱིས་ཀྲུང་གོའི་ཁེ་ལས་མཁས་ཅན་འཐུས་མི་ཚོགས་པ་སྒྲིག་འཛུགས་བྱས་ཏེ་ཏུར་མེན་སི་ཐན་དུ་འཚམས་འདྲི་བྱས་ནས། ཀྲུང་གོ་དང་ཏུར་མེན་སི་ཐན་གྱི་དཔལ་འབྱོར་ཚོང་དོན་འབྲེལ་བ་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང་རྒྱལ་ཁབ་གཉིས་པོའི་བཟོ་ཚོང་ལས་རིགས་ཀྱི་སྤེལ་རེས་མཉམ་ལས་ལ་སྐུལ་འདེད་བཏང་ཡོད།

འཚམས་འདྲི་བྱེད་རིང་། ཀྲུང་གོའི་ཚོང་དོན་སྐུལ་འདེད་ལྷན་ཚོགས་ཀྱི་ཚོགས་གཙོ་གཞོན་པ་ཡུས་ཅན་ལུང་གིས་ཀྲུང་གོའི་ཁེ་ལས་མཁས་ཅན་གྱི་འཐུས་མི་ཚོགས་པའི་སྣེ་ཁྲིད་དེ་ཏུར་མེན་སི་ཐན་གྱི་སྲིད་དོན་དང་ཚོང་དོན་ལས་རིགས་ཀྱི་མི་སྣ་དང་སྤེལ་རེས་རྒྱ་ཁྱབ་བྱས་པ་དང་ཏུར་མེན་སི་ཐན་གྱི་སྒེར་གཉེར་སྡེ་ཚན་གྱིས་མ་འཇོག་རྒྱལ་ཁབ་ཀྱི་རྒྱལ་སྤྱིའི་གླེང་སྟེགས་ཀྱི་འགོ་ཚུགས་མཛད་སྒོ་དང་། ཏུར་མེན་སི་ཐན་གྱི་བཟོ་ལས་ཁེ་ལས་མནའ་འབྲེལ་བཙུགས་ནས་ལོ་17འཁོར་བའི་འགྲེམས་སྟོན་སོགས་ཀྱི་བྱེད་སྒོར་ཞུགས་རྒྱུའི་ཡིད་དབང་བཀུག་པ་དང་། ཀྲུང་གོའི་དཔལ་འབྱོར་འཕེལ་རྒྱས་དང་ཕྱི་ཕྱོགས་སྒོ་དབྱེའི་བྱེད་ཐབས་གསར་ཤོས་གཙོ་གནད་ཐོག་དྲིལ་བསྒྲགས་ངོ་སྤྲོད་བྱས་ནས་ཀྲུང་གོ་དང་ཨེ་ཤེ་ཡ་དབུས་མའི་བཟོ་ལས་མཁས་ཅན་ཨུ་ཡོན་ལྷན་ཁང་གི་ལམ་སྲོལ་འོག་མཉམ་ལས་བྱེད་ཤུགས་ཆེ་རུ་གཏོང་བ་དང་། ཚོང་དོན་མ་འཇོག་གི་དངོས་སྒྲུབ་མཉམ་ལས་ལ་སྐུལ་འདེད་གཏོང་བ། ས་གནས་ཀྱི་ཚོང་གཉེར་ཁོར་ཡུག་ལེགས་སུ་གཏོང་བ་བཅས་བྱས་ཏེ། ཏུར་མེན་སི་ཐན་གྱི་བཟོ་ཚོང་ལས་རིགས་སྐབས་གསུམ་པའི་ཀྲུང་གོའི་རྒྱལ་སྤྱིའི་མཁོ་སྤྲོད་འཁོར་འབྲེལ་དངོས་མང་སྟོན་ཚོགས་སོགས་ཀྱི་གྲོས་གཞིར་སྤེས་རེས་གཏིང་ཟབ་བྱེད་པར་ཞུགས་རྒྱུར་དགའ་བསུ་ཞུ་རྒྱུ་རེད།