ཟླ་གཉིས་པར་སྤྱི་ཚོགས་ཡོངས་ཀྱི་གློག་སྤྱོད་ཚད་དུས་མཚུངས་ལས་8.6%འཕར་བ།
དྲ་སྦྲེལ་དང་འབྲེལ་ཡོད་ཞབས་ཞུའི་ཉིན་རེའི་ཆ་སྙོམས་གློག་སྤྱོད་ཚད་དུས་མཚུངས་ལས་25.2%འཕར་བ།
གསར་འགོད་པར་རྒྱལ་ཁབ་ནུས་རྒྱུ་ཅུས་ནས་ཤེས་རྟོགས་བྱུང་བར། ཟླ་གཉིས་པར། སྤྱི་ཚོགས་ཡོངས་ཀྱི་གློག་སྤྱོད་ཚད་ཆན་ཝ་ཆུ་ཚོད་དུང་ཕྱུར་7434ཟིན་པ་དེ་དུས་མཚུངས་ལས་8.6%འཕར་ཡོད། ཐོན་ལས་མི་འདྲ་བའི་གློག་སྤྱོད་ཚད་ལ་བལྟས་ན། ཐོན་ལས་དང་པོའི་གློག་སྤྱོད་ཚད་ཆན་ཝ་ཆུ་ཚོད་དུང་ཕྱུར་98ཟིན་པ་དེ་དུས་མཚུངས་ལས་10.2%འཕར་བ་དང་། ཐོན་ལས་གཉིས་པའི་གློག་སྤྱོད་ཚད་ཆན་ཝ་ཆུ་ཚོད་དུང་ཕྱུར་4624ཟིན་པ་དེ་དུས་མཚུངས་ལས་12.4%འཕར་བ། ཐོན་ལས་གསུམ་པའི་གློག་སྤྱོད་ཚད་ཆན་ཝ་ཆུ་ཚོད་དུང་ཕྱུར་1420ཟིན་པ་དེ་དུས་མཚུངས་ལས་9.7%འཕར་བ། གྲོང་ཁྱེར་དང་གྲོང་གསེབ་ཀྱི་གྲོང་མིའི་འཚོ་བའི་གློག་སྤྱོད་ཚད་ཆན་ཝ་ཆུ་ཚོད་དུང་ཕྱུར་1292ཟིན་ཡོད།
ཟླ་དང་པོ་ནས་གཉིས་པའི་བར། སྤྱི་ཚོགས་ཡོངས་ཀྱི་གློག་སྤྱོད་ཚད་རིམ་རྩིས་བརྒྱབ་ན་ཆན་ཝ་ཆུ་ཚོད་དུང་ཕྱུར་15564ཟིན་པ་དེ་དུས་མཚུངས་ལས་1.3%འཕར་ཡོད། ཀྲུང་གོ་གློག་ཤུགས་ཁེ་ལས་མཉམ་འབྲེལ་ལྷན་ཚོགས་ཀྱི་འབྲེལ་ཡོད་འགན་འཁུར་བས། ཟླ་བ་དང་པོ་དང་གཉིས་པར་གློག་ཤུགས་འཛད་སྤྱོད་འཕར་ཚད་འགོར་བའི་རྒྱུ་རྐྱེན་ཁག་གཅིག་ནི་ཟླ་དང་པོའི་རྒྱལ་ཡོངས་ཀྱི་ཆ་སྙོམས་དྲོད་ཚད་མཐོ་རུ་ཕྱིན་པའི་ཤུགས་རྐྱེན་ཐེབས་པས་ཡིན། རྒྱལ་ཡོངས་ཀྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་འཚོ་བའི་གློག་སྤྱོད་ཚད་དུས་མཚུངས་ལས་0.1%འཕར་ཡོད་ཅེས་ངོ་སྤྲོད་བྱས་པ་རེད།
“གལ་ཆེན་གཉིས”དང“གསར་པ་གཉིས”སོགས་སྲིད་ཇུས་ཀྱི་སྐུལ་སྤེལ་འོག ལས་རིགས་ཁག་གཅིག་གི་གློག་ཤུགས་འཛད་སྤྱོད་བྱེད་ཚད་སྔར་བཞིན་མཐོ་རུ་འགྲོ་བཞིན་ཡོད། ཟླ་དང་པོ་དང་གཉིས་པར། རྒྱལ་ཡོངས་ཀྱི་ཆ་འཕྲིན་བརྒྱུད་འདྲེན་དང་མཉེན་ཆས་དང་ཆ་འཕྲིན་ལག་རྩལ་ཞབས་ཞུའི་ལས་རིགས་ཀྱི་ཉིན་རེའི་ཆ་སྙོམས་གློག་སྤྱོད་ཚད་དུས་མཚུངས་ལས་13.5%འཕར་བ་དང་། དེའི་ཁྲོད། མི་ཐབས་རིག་ནུས་དང་། གྲངས་གཞི་ཆེན་པོ། སྤྲིན་རྩིས། 5Gསོགས་འཕེལ་རྒྱས་མགྱོགས་མྱུར་འགྲོ་བའི་སྐུལ་ཁྲིད་འོག རྒྱལ་ཡོངས་ཀྱི་དྲ་སྦྲེལ་དང་འབྲེལ་ཡོད་ཞབས་ཞུའི་ཉིན་རེའི་ཆ་སྙོམས་གློག་སྤྱོད་ཚད་དུས་མཚུངས་ལས་25.2%འཕར་ཡོད།
ཟླ་དང་པོ་དང་གཉིས་པར། རྒྱལ་ཡོངས་ཀྱི་སྡེབ་ཚོང་དང་སིལ་ཚོང་ལས་རིགས་ཀྱི་ཉིན་རེའི་ཆ་སྙོམས་གློག་སྤྱོད་ཚད་དུས་མཚུངས་ལས་9.0%འཕར་བ་དང་། དེའི་ཁྲོད། གློག་སྒུལ་རླངས་འཁོར་འཕེལ་རྒྱས་མགྱོགས་མྱུར་འགྲོ་བའི་སྐུལ་ཁྲིད་འོག རྒྱལ་ཡོངས་ཀྱི་གློག་གསོག་དང་གློག་རྫས་བརྗེ་བའི་ཞབས་ཞུའི་ལས་རིགས་ཀྱི་ཉིན་རེའི་ཆ་སྙོམས་གློག་སྤྱོད་ཚད་དུས་མཚུངས་ལས་40.1%འཕར་ཡོད།