ཉེ་ཆར། གསར་འགོད་པས་དངུལ་རྩ་ལྟ་འདོམས་སྤྱི་ཁྱབ་ཅུས་ནས་ཤེས་རྟོགས་བྱས་པར། ཚན་རྩལ་དངུལ་རྩའི་ལས་དོན་ཡག་པོ་བསྒྲུབ་ཆེད། དངུལ་རྩ་ལྟ་འདོམས་སྤྱི་ཁྱབ་ཅུས་ཀྱིས་ཚན་རྩལ་ཁེ་ལས་སྒྲིལ་ཉོའི་དངུལ་བུན་སྲིད་ཇུས་འོས་འཚམ་ལྷུག་ཏུ་གཏོང་བའི་ཚོད་ལྟའི་ལས་དོན་སྤེལ་ཏེ《ཚོང་ལས་དངུལ་ཁང་གི་སྒྲིལ་ཉོའི་དངུལ་བུན་གྱི་ཉེན་ཁར་དོ་དམ་མཛུབ་ཁྲིད》ཀྱི་དོན་ཚན་ཁག་གཅིག་ལྷུག་ཏུ་བཏང་བ་རེད། “མ་རྐང་ཚོད་འཛིན་རྣམ་པའི”སྒྲིལ་ཉོའི་ཐད་དངུལ་བུན་གྱིས་ཁེ་ལས་ཀྱི་སྒྲིལ་ཉོའི་ཉོ་ཚོང་དངུལ་འབོར་གྱི“60%ལས་མཐོ་མི་རུང་བ”དེ“80%ལས་མཐོ་མི་རུང་བའི”བར་ལྷུག་ཏུ་གཏོང་བ་དང་དངུལ་བུན་གྱི་དུས་བཅད“སྤྱིར་བཏང་ལོ་བདུན་ལས་བརྒལ་མི་རུང་བ”ནས“སྤྱིར་བཏང་ལོ་བཅུ་ལས་བརྒལ་མི་རུང་བའི”བར་ལྷུག་ཏུ་གཏོང་བར་ཚོད་ལྟ་བྱས་ནས། ཚན་རྩལ་ཁེ་ལས་དང་ལྷག་པར་དུ་འཁོར་འབྲེལ་གཙོ་བོའི་ཁེ་ལས་ཀྱིས་ཐོན་ལས་བསྡུ་སྒྲིལ་མགྱོགས་སུ་གཏོང་བ་དང་མ་རྩའི་འཁོར་རྒྱུག་ཤར་བགྲོད་ཐུབ་པར་རྒྱབ་སྐྱོར་བྱ་རྒྱུ་རེད།

དངུལ་རྩ་ལྟ་འདོམས་སྤྱི་ཁྱབ་ཅུས་ཀྱིས་འབྲེལ་ཡོད་སྡེ་ཚན་གྱི་བསམ་འཆར་བསྡུ་ལེན་བྱས་པའི་རྨང་གཞིའི་ཐོག་ཚོད་ལྟའི་གྲོང་ཁྱེར་དང་། ཚོད་ལྟའི་དངུལ་ཁང་། ཚོད་ལྟའི་ཚན་རྩལ་ཁེ་ལས་བཅས་ཀྱི་ཚད་གཞི་ཞིབ་འཇུག་གཏན་འབེབས་བྱས་ཡོད། ཚོད་ལྟའི་གྲོང་ཁྱེར་ལ་ཚན་རྩལ་གྱི་ལེགས་ཆའི་ཐོན་ཁུངས་གཅིག་སྡུད་དང་། ཞིབ་འཇུག་གསར་སྤེལ་གྱི་མ་དངུལ་གཏོང་ཤུགས་ཅུང་ཆེ་བ། སྒྲིལ་ཉོ་ཉོ་ཚོང་དང་རྐང་དབང་མ་འཇོག་ཁྲོམ་ར་བཅས་ཡོད་དགོས་པས། ཞིབ་ཕྲ་ནི་པེ་ཅིང་གྲོང་ཁྱེར་དང་། ཧྲང་ཧའེ་གྲོང་ཁྱེར། ཐེན་ཅིན་གྲོང་ཁྱེར། ཁྲུང་ཆིང་གྲོང་ཁྱེར་སོགས་གྲོང་ཁྱེར་18ཡིན་པ་རེད།

ཚོད་ལྟའི་དངུལ་ཁང་ལ་གཉེར་སྐྱོང་གི་གནས་ཚུལ་ལེགས་པ་དང་། ཀུང་སིའི་བཅོས་སྐྱོང་འཐུས་སྒོ་ཚང་བ། གཟབ་ནན་གྱི་ལྟ་འདོམས་དམིགས་ཚད་གཙོ་བོ་ལྟ་འདོམས་ཀྱི་བླང་བྱ་དང་མཐུན་པ། སྒྲིལ་ཉོ་དངུལ་བུན་གྱི་ཆེད་ལས་ཞབས་ཞུའི་ཆུ་ཚད་དང་ཉེན་ཁར་དོ་དམ་ཚོད་འཛིན་བྱེད་པའི་ནུས་པ་ཅུང་ཆེ་བ་བཅས་ལྡན་དགོས། དེའི་ནང་ཚོང་ལས་དངུལ་ཁང་ཆེ་གྲས་དང་། མ་རྐང་ལམ་ལུགས་ཀྱི་ཚོང་ལས་དངུལ་ཁང་། གྲོང་ཁྱེར་གྱི་ཚོང་ལས་དངུལ་ཁང་བཅས་ཚུད་ཡོད། ཚོད་ལྟའི་ཚན་རྩལ་ཁེ་ལས་ལ་ཚན་རིག་ཞིབ་འཇུག་གསོག་འཇོག་དང་གསར་གཏོད་ནུས་པ་ཆེ་བ་དང་། ལག་རྩལ་སྒྱུར་བཀོད་ཀྱི་དགོས་མཁོ་ཆེ་བ། ཚན་རྩལ་གྲུབ་འབྲས་གཞན་སྒྱུར་དང་ཁྲོམ་ར་ཅན་གྱི་མདུན་ལམ་ཡངས་པ། ཡིད་རྟོན་གྱི་ཟིན་ཐོ་བཟང་བ་བཅས་ལྡན་དགོས།

དངུལ་རྩ་ལྟ་འདོམས་སྤྱི་ཁྱབ་ཅུས་ཀྱི་འབྲེལ་ཡོད་སི་ཅུས་ཀྱི་འགན་འཁུར་བས། ཚོད་ལྟའི་ལས་དོན་གྱིས་དངུལ་རྩའི་ཐོན་ཁུངས་དེ་བས་མང་བ་ཚན་རྩལ་གསར་གཏོད་ཐད་སྤྱོད་རྒྱུར་སྐུལ་འདེད་གཏོང་བ་དང་ཚན་རྩལ་གསར་གཏོད་དང་འཚམ་པའི་ཚན་རྩལ་དངུལ་རྩའི་སྒྲིག་སྲོལ་མགྱོགས་མྱུར་འཛུགས་རྒྱུར་སྐུལ་འདེད་གཏོང་དགོས་ཞེས་བཤད། དངུལ་རྩ་ལྟ་འདོམས་སྤྱི་ཁྱབ་ཅུས་ཀྱིས་ཚོད་ལྟའི་དངུལ་ཁང་གིས་ཁྲོམ་ར་ཅན་དང་ཁྲིམས་སྐྱོང་ཅན་གྱི་རྩ་དོན་གཞིར་བཟུང་། ཚན་རྩལ་ཁེ་ལས་སྒྲིལ་ཉོ་དངུལ་བུན་གྱི་ཚོད་ལྟའི་ལས་དོན་གྱི་ཞིབ་སྲོལ་བཟོ་བ་དང་། ཁྱད་པར་ཅན་གྱི་ཡིད་རྟོན་དངུལ་བུན་གྱི་གདེང་འཇོག་མ་ལག་འཐུས་སྒོ་ཚང་དུ་གཏོང་བ། དངུལ་བུན་མ་དངུལ་སྤྱོད་ཡུལ་ལ་ལྟ་སྐུལ་ཚོད་འཛིན་བྱེད་ཤུགས་ཆེ་རུ་གཏོང་བ། ཚན་རྩལ་ལས་རིགས་ཀྱི་རྒྱབ་ལྗོངས་དང་ཁེ་ལས་སྒྲིལ་ཉོ་ཆེད་ལས་ཤེས་བྱའི་ཚན་རྩལ་དངུལ་རྩའི་ཤེས་ལྡན་པའི་དཔུང་ཁག་གསོ་སྐྱོང་བཅས་ལ་ལྟ་སྐུལ་བྱས་ཏེ་ཚན་རྩལ་ཁེ་ལས་སྒྲིལ་ཉོ་བྱེད་པར་དངུལ་རྩའི་རྒྱབ་སྐྱོར་མཁོ་འདོན་བྱ་རྒྱུ་རེད།