ཤིན་ཧྭ་གསར་འགྱུར་ཁང་གྲོང་ཁྱེར་རི་ནེ་ཝ་ནས་གློག་འཕྲིན་འབྱོར་གསལ། ཉེ་ཆར། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་རང་ཚུགས་རྒྱལ་སྤྱིའི་བརྟག་དཔྱད་ཨུ་ཡོན་ལྷན་ཁང་ཞིག་གིས་སྙན་ཞུ་ཁྱབ་བསྒྲགས་བྱས་ཏེ། 2023ལོའི་ཟླ་10ཚེས་7ཉིན་ཚུན་དབྱི་སི་རལ་གྱིས་ཅ་ཧྲ་ས་ཁུལ་གྱི་ལུས་སྦྱོར་བདེ་ཐང་དང་སྐྱེ་འཕེལ་བདེ་ཐང་གི་སྒྲིག་བཀོད་རྐང་བཙུགས་ནས་རྡུང་གཅོག་དང་འབྲེལ་གཏོར་བརླགས་བཏང་བས་རིགས་རྒྱུད་རྩ་མེད་དུ་གཏོང་བའི་ནག་ཉེས་བསགས་ཡོད་ཅེས་བརྗོད་པ་རེད།

བཙན་བཟུང་བྱས་པའི་ཕ་ལེ་སི་ཐན་གྱི་མངའ་ཁོངས(ཅེ་རུས་ས་ལེམ་ཤར་མ་ཚུད་པ)དང་དབྱི་སི་རལ་གནད་དོན་གྱི་རང་ཚུགས་རྒྱལ་སྤྱིའི་བརྟག་དཔྱད་ཨུ་ལྷན་གྱི་སྙན་ཞུའི་ནང་། དབྱི་སི་རལ་གྱིས་ཅ་ཧྲ་ས་ཁུལ་གྱི་ལུས་སྦྱོར་བདེ་ཐང་དང་སྐྱེ་འཕེལ་བདེ་ཐང་གི་སྒྲིག་ཆས་རྐང་བཙུགས་ནས་གཏོར་བརླགས་བཏང་བའི་ནང་བུད་མེད་དང་བུ་བཙའི་སྨན་ཁང་དང་། སྨན་ཁང་དཀྱུས་མའི་བུ་བཙའི་ནད་ཁང་། དེ་བཞིན་སྦྲུམ་སྦྱོར་ཕྲུ་གུའི་སྨན་བཅོས་ཁང་གཙོ་བོ་བཅས་ཚུད་ཡོད་པ་གཏན་ཁེལ་བྱས་པ་རེད།

སྙན་ཞུའི་ནང་། དབྱི་སི་རལ་གྱི་བདེ་འཇགས་དཔུང་སྡེས་ཅ་ཧྲ་ས་ཁུལ་གྱི་པཱ་སི་མཱ་སྦྲུམ་བརྟེན་ཕྲུ་གུའི་སྨན་བཅོས་ཁང་ལ་རྐང་བཙུགས་ནས་རྡུང་གཅོག་བྱས་པ་དང་འབྲེལ་གཏོར་བརླཌ་བཏང་ཡོད། སྨན་བཅོས་ཁང་དེ་ནི་ཅ་ཧྲ་ས་ཁུལ་གྱི་བུ་བཙའི་ལྟེ་གནས་གཙོ་བོ་ཞིག་ཡིན་ཞེས་བཏོན་ཡོད། གཞན་ཡང་སྙན་ཞུའི་ནང་ད་དུང“སྦྲུམ་བརྟེན་ཕྲུ་གུའི་སྨན་བཅོས་ཁང་དེར་རྡུང་གཅོག་བྱེད་སྐབས་ཁྲིམས་མཐུན་གྱི་དམག་དོན་དམིགས་ཡུལ་གསལ་བཤད་ཐུབ་པའི་དཔང་རྟགས་གཅིག་ཀྱང་རྙེད་མེད”ཅེས་བརྗོད་ཡོད།

སྙན་ཞུའི་ནང་བཏོན་དོན། དབྱི་སི་རལ་གྱིས་ད་དུང་ཅ་ཧྲ་ས་ཁུལ་གྱི་མཐའ་བསྐོར་བ་མ་ཟད། གཞི་ཁྱོན་ཆེ་བའི་མི་ཆོས་རིང་ལུགས་ཀྱི་རོགས་སྐྱོབ་བཀག་འགོག་བྱས་པའི་ནང་བདེ་འཇགས་ངང་མངལ་སྦྲུམ་པ་དང་། ཕྲུ་གུ་སྐྱེ་བ། ཕྲུ་གུ་དམར་འབྱར་བདག་སྐྱོང་བཅས་བྱེད་པར་མཁོ་བའི་གཞི་རྩའི་སྨན་རྫས་དང་སྒྲིག་ཆས་ཚུད་ཡོད་པ་རེད། གཞན་ཡང་དབྱི་སི་རལ་གྱིས་ནད་པ་ཅ་ཧྲ་ས་ཁུལ་ནས་ཁ་བྲལ་ཏེ་སྨན་བཅོས་དང་ལེན་བྱེད་པར་ཆོག་མཆན་སྤྲད་མེད་པའི་ནང་མོ་ནད་ཚན་ཁག་གི་འབྲས་སྐྲན་ཕོག་པའི་ནད་པ་ཚུད་ཡོད་པ་རེད།