ཧེ་ལུང་ཅང་ཞིང་ཆེན་ཅ་མུའུ་སི་གྲོང་ཁྱེར་ཐང་ཡོན་རྫོང་དུ་ཞིང་ཆུ་འདྲེན་ཁུལ་གྱི་འཕྲོ་སྐྱོང་ལེ་ལག་དང་དེང་རབས་ཅན་གྱི་སྒྱུར་བཀོད་རྣམ་གྲངས་བསྐྲུན་འགོ་ཚུགས་ཡོད།

“སྔོན་དཔག་བྱས་ན། ཆུ་འདྲེན་རྒྱ་ཁྱོན་མུའུ་ཁྲི་20.24གསར་འཕར་བྱུང་ནས་ཞིང་ཆུ་འདྲེན་ཁུལ་གྱི་མུའུ་རེའི་ཐོན་ཚད་སྤྱི་རྒྱ་500ནས་སྤྱི་རྒྱ་580བར་འཕར་རྒྱུ་རེད”ཅེས་ཐང་ཡོན་རྫོང་ཆུ་དོན་ཅུས་ཀྱི་ཅུས་ཀྲང་མེང་ལེ་ཡིས་རེ་བ་ཆེན་པོས་བརྗོད།

ན་ནིང་ཧེ་ལུང་ཅང་གི་འབྲུ་རིགས་སྤྱིའི་ཐོན་འབབ་བསྡོམས་འབོར་རྒྱ་མ་དུང་ཕྱུར་1600ཡི་འགག་སྒོ་ཆེན་པོ་ལས་བརྒལ་ནས་ལོ་15བསྟུད་མར་རྒྱལ་ཡོངས་ཀྱི་ཨང་དང་པོར་སླེབས་པ་དང་འབྲུ་རིགས་ལོ་ཏོག་གི་མུའུ་རེའི་ཆ་སྙོམས་ཐོན་འབབ་2.7%མཐོ་རུ་ཕྱིན་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད།

2023ལོའི་ཟླ་9པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧེ་ལུང་ཅང་དུ་རྟོག་ཞིབ་གནང་སྐབས“ཧེ་ལུང་ཅང་གིས་རྒྱལ་ཁབ་ཀྱི་འབྲུ་རིགས་བདེ་འཇགས་ཀྱི་འགན་འཁྲི་ཡག་པོ་ཁུར་དགོས”ཞེས་ནན་བཤད་གནང་ཡོད། ད་ལོའི་རྒྱལ་ཡོངས་ཚོགས་འདུ་གཉིས་སུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅང་སུའུ་འཐུས་མི་ཚོགས་པའི་གྲོས་ཞིབ་ལ་ཞུགས་སྐབས“རྨོ་ཞིང་གི་དམར་ཐིག་བརྟན་པོར་བསྲུངས་ནས་འབྲུ་རིགས་བདེ་འཇགས་ལ་འགན་ལེན་བྱེད་དགོས”ཞེས་ནན་བཤད་གནང་ཡོད།

“ས་ཞིང་རྒྱ་ཁྱོན་ཆེ་རུ་དང་ས་རྒྱུ་ལེགས་སུ་ཕྱིན་ཏེ་ས་ཞིང་གི་མུའུ་རེའི་ཐོན་འཕར་རྒྱ་མ་30ཟིན་ཡོད”ཧྭ་ཁྲོན་རྫོང་ཡའོ་ལིན་ཙི་གྲོང་ཚོར་ཚད་གཞི་མཐོ་བའི་འབྲས་ཞིང་མུའུ་8000ལྷག་ཙམ་བསྐྲུན་རྗེས་ཐོན་འཕར་གྱི་ཕན་པ་ཐོབ་པའི་གྲོང་མི་ཝང་ལན་ཡུང་གི་ངར་ཤུགས་ཆེ་རུ་ཕྱིན་ཡོད།

ད་ཆ། ཧེ་ལུང་ཅང་གིས་རིམ་བརྩིས་བརྒྱབ་ན། ཚད་གཞི་མཐོ་བའི་ས་ཞིང་མུའུ་དུང་ཕྱུར་1.2ཙམ་བསྐྲུན་པ་དང་ལྗང་མདོག་སྐྱེ་ལྡན་བཟའ་བཅའི་རྟེན་གཞིའི་རྒྱ་ཁྱོན་མུའུ་དུང་ཕྱུར་1ལས་བརྒལ་ནས་རྒྱལ་ཡོངས་ཀྱི་མདུན་གྲལ་དུ་སླེབས་ཡོད། ད་ལོ། ཧེ་ལུང་ཅང་གིས་ད་དུང་སྤུས་ཚད་མཐོ་པོས་ཚད་གཞི་མཐོ་བའི་ས་ཞིང་མུའུ་ཁྲི་1169བསྐྲུན་རྒྱུ་ཡིན་པ་རེད།

“རྩལ་བརྟེན་འབྲུ་གསོག་བྱས་པར་བརྟེན་ཞིང་ཆེན་ཡོངས་ཀྱི་ཞིང་ལས་སྐྱེ་དངོས་གཙོ་བོ་གཞི་རྩའི་ཆ་ནས་ཕྱོགས་ཡོངས་ལ་ཁྱབ་ཡོད” ཧེ་ལུང་ཅང་ཞིང་ཆེན་ཞིང་ལས་དང་གྲོང་གསེབ་ཐིང་གི་ཐིང་ཀྲང་གཞོན་པ་ཝང་ཏིས། ད་ལོའི《སྲིད་གཞུང་གི་ལས་དོན་སྙན་སྒྲོན》ནང་བཏོན་པའི“འདེབས་འཛུགས་ལས་རིགས་དར་རྒྱས་གཏོང་བའི་བྱ་སྤྱོད་ལག་བསྟར་གཏིང་ཟབ་བྱེད་དགོས་པའི”བླང་བྱ་དོན་འཁྱོལ་ཡག་པོ་བྱས་ནས། ད་ལོ་ཞིང་ཆེན་ཡོངས་ཀྱིས་དེང་རབས་འདེབས་འཛུགས་ལས་རིགས་མཐོར་འདེགས་འདུ་འགོད་ལག་བསྟར་གཏིང་ཟབ་བྱ་རྒྱུ་རེད་ཅེས་བཤད།

“ང་ཚོས་ཞིང་ལས་ཀྱི་གྲངས་གཞིར་དུས་ཐོག་ཏུ་དབྱེ་ཞིབ་བྱས་ཏེ་ཞིང་ལས་ཀྱི་ནད་འབུའི་གནོད་འཚེ་ཚོད་འཛིན་ཧུར་ཐག་བྱས་ཏེ་འབྲུ་རིགས་ཐོན་འཕར་ཡོང་བར་འགན་ལེན་བྱས་ཡོད”ཧའེ་ལུན་གྲོང་ཁྱེར་ཏུང་ཤིན་དེང་རབས་ཞིང་ལས་འཕྲུལ་ཆས་ཀྱི་ཞིང་པའི་ཆེད་ལས་མཉམ་ལས་ཁང་གི་འགན་འཁུར་བ་ལིའུ་ཁྲུན་ཧྲེང་གིས་སྣེ་ཁྲིད་ནས་མི་མེད་གནམ་གྲུའི་ཞིང་ལས་འདེབས་འཛུགས་སྲུང་སྐྱོང་རུ་ཆེན་བཙུགས་ཤིང་། ད་ཆ་མི་མེད་གནམ་གྲུ་45ཡོད་པ་རེད།

ན་ནིང་ཧེ་ལུང་ཅང་གི་ཞིང་ལས་ལོ་ཏོག་རྨོ་འདེབས་བསྡུ་ལེན་ཕྱོགས་བསྡུས་འཕྲུལ་ཆས་ཅན་དུ་གྱུར་ཚད་99%ལས་བརྒལ་ནས་ཞིང་ལས་ཚན་རྩལ་ཡར་ཐོན་ལ་ལེགས་སྐྱེས་འབུལ་ཚད་70.8%ཟིན་ཡོད། ད་ལོའི《སྲིད་གཞུང་གི་ལས་དོན་སྙན་སྒྲོན》ནང་། སྔོན་ཐོན་དང་སྤྱོད་གོ་ཆོད་པའི་ཞིང་འཕྲུལ་སྒྲིག་ཆས་ཞིབ་འཇུག་གསར་སྤེལ་བཀོལ་སྤྱོད་དང་ཞིང་ལས་ཚན་རྩལ་གྲུབ་འབྲས་གཞི་ཁྱོན་ཆེན་པོས་ཁྱབ་གདལ་གཏོང་དགོས་ཞེས་བཏོན་ཡོད། ཧེ་ལུང་ཅང་གིས་ཞིང་ཆེན་ཡོངས་ཀྱི་གཅིག་གྱུར་རིག་ལྡན་ཞིང་ལས་སྟེགས་བུ་བསྐྲུན་པར་ཤུགས་སྣོན་བརྒྱབ་ནས་དེང་རབས་ཞིང་ལས་ཚན་རྩལ་གྱི་དཔེ་སྟོན་རྟེན་གཞི་100ཡན་དང་མི་མེད་ཅན་གྱི་རིག་ལྡན་ཞིང་ར་20བསྐྲུན་རྒྱུ་རེད།