ཉེ་ཆར། 《2025ལོའི་ཕྱི་རྒྱལ་གྱི་མ་དངུལ་བརྟན་པོ་ཡོང་བའི་བྱ་སྤྱོད་ཇུས་གཞི》ཁྱབ་བསྒྲགས་བྱས་ཏེ་གོ་རིམ་ལྡན་པའི་སྒོ་ནས་རང་བདག་སྒོ་དབྱེ་རྒྱ་ཆེར་གཏོང་བ་དང་། མ་འཇོག་སྐུལ་སྤེལ་གྱི་ཆུ་ཚད་མཐོ་རུ་གཏོང་བ། སྒོ་དབྱེའི་ལས་སྟེགས་ཀྱི་ཕན་ནུས་ཆེ་རུ་གཏོང་བ། ཞབས་ཞུའི་འགན་སྲུང་བྱེད་ཤུགས་ཆེ་རུ་གཏོང་བ་བཅས་ཕྱོགས་བཞིའི་ཐད་བྱེད་ཐབས་20བསྟན་ནས། སྒོ་དབྱེ་སྔར་བས་རྒྱ་ཆེར་གཏོང་བ་དང་ཕྱི་རྒྱལ་གྱི་མ་དངུལ་འགུག་ཤུགས་ཆེ་རུ་གཏོང་བའི་བརྡ་རྟགས་གསལ་པོ་སྟོན་ཡོད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་ཀྲུང་གོར་ཡོད་པའི་ཕྱི་རྒྱལ་གྱི་མ་འཇོག་ཁེ་ལས་ཀྱི་འཐུས་མིས་ཇུས་གཞི་དེ་ཐོག་ནས་ཀྲུང་གོར་མུ་མཐུད་མ་དངུལ་གཏོང་བའི་ཁོང་ཚོའི་ཡིད་ཆེས་བརྟན་དུ་ཕྱིན་པའི་ངོས་འཛིན་བྱས་པ་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱུན་ཆད་མེད་པར་རྒྱ་ཆེར་གཏོང་བའི་ཀྲུང་གོར་མཉམ་ལས་གཉིས་ཕན་གྱི་གོ་སྐབས་དེ་བས་མང་བ་ཡོང་བ་དང་འཛམ་གླིང་དཔལ་འབྱོར་འཕེལ་རྒྱས་ལ་སྒུལ་ཤུགས་དེ་བས་མང་བ་སྣོན་རྒྱུའི་རེ་སྒུག་བྱེད་བཞིན་ཡོད་པ་རེད།

“ཀྲུང་གོའི་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བའི་བྱེད་ཐབས་གལ་ཆེན”

གློག་འཕྲིན་དང་། སྨན་བཅོས། སློབ་གསོ་སོགས་ཁྱབ་ཁོངས་ཀྱི་སྒོ་དབྱེའི་ཚོད་ལྟ་རྒྱ་ཆེར་གཏོང་བ་དང་། སྐྱེ་དངོས་དང་གསོ་བ་རིག་པའི་ཁྱབ་ཁོངས་གོ་རིམ་ལྡན་པའི་ངང་སྒོ་མོ་འབྱེད་རྒྱ་ཆེ་རུ་གཏོང་བ། ཕྱི་རྒྱལ་གྱི་མ་འཇོག་ཁེ་ལས་ཀྲུང་གོའི་བཟོ་ལས་ཅན་གསར་པའི་འཕེལ་རིམ་ནང་ཞུགས་རྒྱུར་རྒྱབ་སྐྱོར་བྱེད་པ། ཕྱི་རྒྱལ་གྱི་མ་འཇོག་ཁེ་ལས་ཀྱི་ཚོང་དོན་སྟབས་བདེ་ཅན་གྱི་ཆུ་ཚད་མཐོ་རུ་གཏོང་བ་ལ་སོགས་ཕྱི་རྒྱལ་གྱི་མ་འཇོག་ཁེ་ལས་ཀྱིས་ཇུས་གཞིའི་ནང་ཁྱབ་བསྒྲགས་བྱས་པའི་བྱེད་ཐབས་ལ་དོ་ཁུར་ཆེན་པོ་བྱས་ནས་འཕེལ་རྒྱས་ཀྱི་གོ་སྐབས་དེ་བས་མང་བ་མཉམ་སྤྱོད་བྱ་རྒྱུའི་རེ་བ་བྱེད་ཀྱི་ཡོད།

“ཇུས་གཞི་བཏོན་པ་དེ་ནི་ཀྲུང་གོ་སྲིད་གཞུང་གིས་ཕྱི་རྒྱལ་གྱི་མ་དངུལ་ཚུར་འགུག་བྱེད་པའི་དངོས་སྒྲུབ་ཀྱི་བྱ་སྤྱོད་ཅིག་ཡིན་པ་དང་ཀྲུང་གོར་ཕྱི་རྒྱལ་གྱི་མ་འཇོག་ཁེ་ལས་འཕེལ་རྒྱས་གཏོང་བར་སྲིད་ཇུས་ཀྱི་རྒྱབ་སྐྱོར་ནུས་ལྡན་བྱས་པ་དང་ཏི་ཁ་ནུང་སོགས་ཕྱི་རྒྱལ་གྱི་མ་འཇོག་ཁེ་ལས་ཀྲུང་གོའི་ཁྲོམ་རར་རྩ་བ་བརྟན་པོ་འཛུགས་པའི་ཆོད་སེམས་ཆེ་རུ་ཕྱིན་ཡོད”ཧྥ་རན་སིའི་ཏི་ཁ་ནུང་གི་ཀྲུང་གོའི་སྤྱི་པའི་ལས་དོན་སྤྱི་ཁྱབ་ལྟ་ཞིབ་པ་ཀྲའོ་ཅེ་ཡིས། ཏི་ཁ་ནུང་གིས་ཀྲུང་གོར་ཡོད་པའི་ལས་སྒོ་སྔར་བས་རྒྱ་སྐྱེད་བཏང་ནས་ཀྲུང་གོའི་ཁྲོམ་ར་དང་མཉམ་དུ་འཚར་ལོངས་ཡོང་བ་དང་གཉིས་ཁེ་གཉིས་ཕན་ཡོང་བ་བྱ་རྒྱུ་ཡིན་ཞེས་བརྗོད་པ་རེད།

འཇར་མན་གྱི་པེ་ཨེར་ལོ་ཏོག་ཚན་རིག་གི་ཀྲུང་ཧྭ་ཆེན་པོའི་ཁུལ་གྱི་སྤྱི་ཁྱབ་ཅིང་ལི་ཧུའུ་མེང་ཡིང་གིས། ཇུས་གཞིའི་ནང་གི་བྱེད་ཐབས་རབ་དང་རིམ་པས་ཕྱི་རྒྱལ་གྱི་མ་འཇོག་ཁེ་ལས་ཀྲུང་གོར་རྩ་བ་བརྟན་པོ་འཛུགས་པར་དེ་བས་བརྟན་པའི་སྲིད་ཇུས་ཀྱི་སྔོན་དཔག་མཁོ་འདོན་བྱས་ནས། པེ་ཨེར་གྱིས་ཀྲུང་གོར་མ་འཇོག་རྒྱུན་མཐུད་བྱེད་པའི་ཡིད་ཆེས་ཆེ་རུ་ཕྱིན་པའི་ངོས་འཛིན་བྱས་པ་རེད། “ཀྲུང་གོ་ནི་ཡིད་དབང་འཕྲོག་ཤུགས་ཆེན་པོ་ལྡན་པའི་འཐབ་ཇུས་ཁྲོམ་ར་ཞིག་ཡིན་པ་དང་། ལྷག་པར་དུ་ཀྲུང་གོ་སྲིད་གཞུང་གིས་སྒོ་དབྱེའི་ནུས་སྦྱིན་དང་མ་འཇོག་སྐུལ་སྤེལ་ལ་ཚད་མཐོའི་མཐོང་ཆེན་བྱས་ནས་དགེ་མཚན་ལྡན་པའི་སྲིད་ཇུས་རབ་དང་རིམ་པ་བཏོན་ཏེ་ཕྱི་རྒྱལ་ཁེ་ལས་ཀྲུང་གོར་འཕེལ་རྒྱས་འགྲོ་བར་ཁོར་ཡུག་བཟང་པོ་བསྐྲུན་ཡོད”

“ང་ཚོར་ཀྲུང་གོའི་དཔལ་འབྱོར་གྱི་མཉེན་གཤིས་དང་ཁྲོམ་རའི་གསར་གཏོད་ནུས་པར་ཡིད་ཆེས་ཀྱིས་ཁེངས་ཡོད”

ཁྲོམ་རའི་གཞི་ཁྱོན་ཆེན་པོ་དང་། ཐོན་ལས་མ་ལག་ཆ་ཚང་བ། འཐུས་སྒོ་ཚང་བའི་ཐོན་སྐྱེད་མཁོ་སྤྲོད་འཁོར་འབྲེལ། རྒྱུན་ཆད་མེད་པར་ལེགས་སུ་འགྲོ་བའི་ཚོང་གཉེར་ཁོར་ཡུག དཔལ་འབྱོར་ཡུན་རིང་ལེགས་སུ་འགྲོ་བའི་གཞི་རྩའི་ངོས་ལ་སོགས་རྒྱུ་རྐྱེན་དེ་དག་གིས་ཀྲུང་གོའི་ཁྲོམ་རར་ཕྱི་རྒྱལ་གྱི་མ་དངུལ་མུ་མཐུད་གཏོང་བར་ཡིད་དབང་འགུག་ཤུགས་ཆེན་པོ་ལྡན་ཡོད་པ་གསལ་བཤད་བྱས་ཡོད།

“ཀྲུང་གོར་མ་འཇོག་བྱེད་པ་ནི་མ་འོངས་པར་མ་འཇོག་བྱེད་པ་ཞིག་རེད། ང་ཚོར་ཀྲུང་གོའི་དཔལ་འབྱོར་གྱི་མཉེན་གཤིས་དང་ཁྲོམ་རའི་གསར་གཏོད་ནུས་པར་ཡིད་ཆེས་ཆེན་པོ་ཡོད”ཅེས་སོ་ཏི་ཨ་རབ་ཨ་ཅི་ལན་སྤུན་ཟླ་མ་རྐང་ཚོད་འཛིན་ཚོགས་པའི་ཏུང་ཧྲི་ཀྲང་གཞོན་པ་མུའུ་ཧན་མོ་ཏེ·ཨེར·ཨ་ཅི་ལན་གྱིས། 5Gདང་། མིས་བཟོས་རིག་ནུས། རང་འགུལ་ཅན། ནུས་རྒྱུ་གསར་པའི་རླངས་འཁོར་སོགས་གསར་དར་ཁྱབ་ཁོངས་སུ་ཀྲུང་གོ་གོ་ལ་ཧྲིལ་པོའི་སྔོན་དུ་སླེབས་པ་དང་ཐོན་ལས་རིམ་སྤོར་དང་ཚན་རྩལ་གསར་གཏོད་ཀྱིས་ཀྲུང་གོར་འཕར་བའི་སྒུལ་ཤུགས་གསར་པ་བསྣན་པ་མ་ཟད། ཚོགས་པ་དང་ཀྲུང་གོའི་ཁེ་ལས་དབར་གྱི་སྤེལ་རེས་མཉམ་ལས་ལའང་གོ་སྐབས་བྱུང་ཡོད་ཅེས་བརྗོད་པ་རེད།

“དངོས་སྒྲུབ་དང་སྔ་བལྟས་ཕྱི་བསམ་ལྡན་པའི་འཕེལ་རྒྱས་ཀྱི་བློ་གྲོས་མངོན་པ”

ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་བ་དང་། ཕྱི་ཕྱོགས་ཚོང་དོན་བརྟན་པོ། ཕྱི་རྒྱལ་གྱི་མ་འཇོག་བརྟན་པོ་བཅས་ཡོང་བ་བྱ་རྒྱུ་ནི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་བཀོད་སྒྲིག་བྱས་པའི་2025ལོའི་དཔལ་འབྱོར་ལས་དོན་གྱི་གཙོ་གནད་ལས་འགན་གྱི་གྲས་ཤིག་རེད། ཕྱི་རྒྱལ་གྱི་མ་འཇོག་ཁེ་ལས་ཀྱི་འཐུས་མིས་ཀྲུང་གོས་ཐོག་མཐའ་བར་གསུམ་དུ་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་བའི་ཁས་ལེན་ལག་ལེན་བསྟར་བས་ཁོང་ཚོའི་ཀྲུང་གོར་མ་འཇོག་དང་ཀྲུང་གོར་རྩ་བ་བརྟན་པོ་འཛུགས་པའི་ཆོད་སེམས་སྔར་བས་བརྟན་དུ་ཕྱིན་ཡོད།

“ཀྲུང་གོ་ནི་འཛམ་གླིང་དཔལ་འབྱོར་འཕར་བའི་སྒུལ་ཤུགས་གལ་ཆེན་ཞིག་རེད། ཀྲུང་གོའི་ཁྲོམ་ར་ཆེན་པོས་གོ་ལ་ཧྲིལ་པོའི་ཁེ་ལས་ལ་འཕེལ་རྒྱས་ཀྱི་གོ་སྐབས་ཧ་ཅང་ཆེན་པོ་བསྐྲུན་ནས་གོ་ལ་ཧྲིལ་པོའི་དཔལ་འབྱོར་འཕར་བར་སྐུལ་ཁྲིད་བྱས་ཡོད། ཀྲུང་གོས་སྒོ་དབྱེ་མཉམ་ལས་མཐའ་འཁྱོངས་བྱས་པ་དེས་འཛམ་གླིང་དཔལ་འབྱོར་ལ་དོན་སྙིང་གལ་ཆེན་ལྡན་ཡོད”ཅེས་ཀྲའོ་ཅེ་ཡིས་བརྗོད།

འཇར་མན་བཟོ་ལས་རླངས་གཟུགས་དང་བཟོ་སྐྲུན་ཀུང་སིའི་ལིན་ཏེ་ཚོགས་པའི་ཀྲུང་ཧྭ་ཆེན་པོའི་ཁུལ་གྱི་ཙུང་ཚའེ་ལི་ཀྲེན་མིན་གྱིས། ཉེ་བའི་ལོ་ཤས་རིང་། “ཕྱི་རྒྱལ་གྱི་མ་དངུལ་དོན་ཚན་24”ནས“ཕྱི་རྒྱལ་གྱི་མ་དངུལ་བརྟན་པོ་ཡོང་བའི་དོན་ཚན་20”བར། ཀྲུང་གོའི་བྱེད་ཐབས་རབ་དང་རིམ་པས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བརྟན་པོ་གཏོང་བ་དང་སྒོ་དབྱེ་མཉམ་ལས་ལ་ཤུགས་སྣོན་རྒྱག་རྒྱུའི་ཆོད་སེམས་མངོན་ཡོད། ལི་ཀྲེན་མིན་གྱིས། “ལྗང་མདོག་ཐཱན་ཉུང་ཕྱོགས་སྒྱུར་དང་། ཚན་རྩལ་གསར་གཏོད། ཐོན་ལས་རིམ་སྤོར་བཅས་ཐད་ལ་སྐུལ་འདེད་གཏོང་བའི་ཐད་ཀྲུང་གོར་གྲུབ་འབྲས་མངོན་གསལ་དོད་པོ་ཐོབ་ནས་ཕྱི་རྒྱལ་གྱི་མ་འཇོག་ཁེ་ལས་ལ་གོ་སྐབས་ཆེན་་པོ་བསྐྲུན་ཡོད”ཅེས་བརྗོད་པ་རེད།

“ཀྲུང་གོས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་རྒྱུ་མཐའ་འཁྱོངས་ཀྱིས་ཁྲོམ་ར་ཅན་དང་། ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་རྒྱུན་མཐུད་ངང་བཏོད་ནས་དངོས་སྒྲུབ་དང་སྔ་བལྟས་ཕྱི་བསམ་ལྡན་པའི་འཕེལ་རྒྱས་ཀྱི་བློ་གྲོས་མངོན་ཡོད” ཧུའུ་མེང་ཡིང་གིས། ཀྲུང་གོའི་ཞིང་ལས་གྲངས་འཛིན་ཅན་དང་། རིག་ལྡན་ཅན། རྒྱུན་མཐུད་ཆོག་པ་བཅས་ཀྱི་ཕྱོགས་སུ་འཕེལ་རྒྱས་ཕྱིན་ནས་པེ་ཨེར་ལོ་ཏོག་ཚན་རིག་གིས་ཀྲུང་གོར་མ་འཇོག་དང་། གསར་གཏོད། མཉམ་ལས་བཅས་བྱེད་པར་གོ་སྐབས་བསྐྲུན་ཡོད་ཅེས་བརྗོད་པ་རེད། 2024ལོར། པེ་ཨེར་གྱིས་ཁོངས་གཏོགས་ཀྱི་མ་རྩ་མཉམ་འཇོག་ཀུང་སི་བརྒྱུད་ཀྲུང་གོར་མ་རྨོས་ལོ་ཏོག་གི་རིགས་གསར་པ་ལྔ་ཐོག་མར་ཕྱིར་གཏོང་བྱས་ནས་ཀྲུང་གོའི་འདེབས་འཛུགས་ཁུལ་ཁོངས་མང་པོ་ཞིག་ལ་ཁྱབ་སྟེ་ནད་འགོག་གནོད་འགོག་དང་ཐོན་འབབ་ཡག་པོ་ཡོང་བར་རམ་འདེགས་བྱས་ཡོད། པེ་ཨེར་གྱིས་རང་ངོས་ལག་རྩལ་གྱི་ལེགས་ཆར་གཞིགས་ནས་ཀྲུང་གོར་མུ་མཐུད་མ་དངུལ་གཏོང་ཤུགས་ཆེ་རུ་བཏང་སྟེ་ཀྲུང་གོའི་ཞིང་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་འདོད་ཡོད་པ་རེད།