2025ལོའི་ཟླ་3ཚེས་14ཉིན། ཀྲུང་གོ་དང་། ཨུ་རུ་སུ། དབྱི་རན་བཅས་རྒྱལ་ཁབ་གསུམ་པོའི་པེ་ཅིང་ཐུག་འཕྲད་བདེ་བླག་བྱུང་ཞིང་། པེ་ཅིང་ཐུག་འཕྲད་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཕྱི་འབྲེལ་པུའི་པུའུ་ཀྲང་གཞོན་པ་མཱ་ཁྲའོ་ཞུས་ཀྱིས་གཙོ་སྐྱོང་གནང་བ་དང་། ཨུ་རུ་སུ་རྒྱལ་ཕྲན་མཉམ་འབྲེལ་ཕྱི་འབྲེལ་པུའི་པུའུ་ཀྲང་གཞོན་པ་ལི་ཡ་པུའུ་ཁོའོ་ཧྥུའུ་དང་། དབྱི་རན་དབྱི་སི་ལམ་སྤྱི་མཐུན་རྒྱལ་ཁབ་ཕྱི་འབྲེལ་པུའི་པུའུ་ཀྲང་གཞོན་པ་ཅ་ལི་པུའུ་ཨ་པ་ཏི་བཅས་སོ་སོ་ཚོགས་འདུར་ཞུགས་ཡོད།

ཀྲུང་གོ་དང་། ཨུ་རུ་སུ། དབྱི་རན་བཅས་རྒྱལ་ཁབ་གསུམ་པོས་ཉིང་རྡུལ་དང་བཀག་སྡོམ་མེད་པར་བཟོ་བའི་གནད་དོན་ལ་བསམ་འཆར་བརྗེ་རེས་གཏིང་ཟབ་བྱས་ཤིང་། རྒྱལ་ཁབ་གསུམ་པོས་ཁྲིམས་དང་མ་མཐུན་པའི་ཕྱོགས་རྐྱང་པའི་བཀག་སྡོམ་ཡོད་དོ་ཅོག་མཚམས་འཇོག་དགོས་པའི་དགོས་ངེས་རང་བཞིན་ནན་བཤད་བྱས་ཡོད།

ཕྱོགས་གསུམ་པོས་ཕན་ཚུན་བརྩི་འཇོག་གཞི་རྩར་བྱེད་པའི་ཆབ་སྲིད་ཕྱི་འབྲེལ་གྱི་ཐུག་འཕྲད་དང་སྐད་ཆ་ཤོད་རེས་ནི་ནུས་ལྡན་དང་སྤྱོད་འཐུས་ཀྱི་གདམ་ག་གཅིག་པུ་དེ་ཡིན་ཚུལ་བསྐྱར་བསྒྲགས་བྱས་ཡོད།

ཕྱོགས་གསུམ་པོས་འབྲེལ་ཡོད་ཕྱོགས་ཀྱིས་མིག་སྔའི་དུས་བབ་ཀྱི་འབྱུང་རྐྱེན་མེད་པར་བཟོས་ནས་བཀག་སྡོམ་གྱི་གནོན་ཤུགས་དང་། དྲག་ཤུགས་ཀྱིས་འཇིགས་སྐུལ་སྤྲོད་རྒྱུ་འདོར་བར་གཞོལ་དགོས་པའི་ནན་བཤད་བྱས་ཡོད།

ཕྱོགས་གསུམ་པོས་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་ཨང་2231དང་དེའི་དུས་ཚོད་ཀྱི་སྒྲོམ་གཞིའི་གལ་འགངས་རང་བཞིན་ལ་གཞིགས་ནས་འབྲེལ་ཡོད་ཕྱོགས་ཀྱིས་དུས་བབ་ཛ་དྲག་ཏུ་གཏོང་བའི་བྱེད་སྤྱོད་མི་ཐོན་པར་བྱས་ཏེ་མཉམ་དུ་ཕྱི་འབྲེལ་གྱི་འབད་བརྩོན་ལ་བརྟེན་ནས་ཕན་ཡོད་ཀྱི་རྣམ་པ་དང་མཐུན་རྐྱེན་སྐྲུན་དགོས་པའི་ནན་བཤད་བྱས་ཡོད།

ཕྱོགས་གསུམ་པོས《ཉིང་རྡུལ་མཚོན་ཆ་ཁྱབ་འགྱེད་མི་གཏོང་བའི་ཆིངས་ཡིག》སྲུང་སྐྱོང་བྱ་རྒྱུ་དེ་རྒྱལ་སྤྱིའི་ཉིང་རྡུལ་ཁྱབ་འགྱེད་མི་གཏོང་བའི་མ་ལག་གི་གཞི་རྩ་ཡིན་པའི་གལ་འགངས་རང་བཞིན་བསྐྱར་བསྒྲགས་བྱས་ཤིང་། ཀྲུང་གོ་དང་ཨུ་རུ་སུས་དབྱི་རན་གྱིས་རང་རྒྱལ་ཁབ་ཀྱི་ཉིང་རྡུལ་འཆར་གཞི་ཞི་བདེར་སྤྱོད་པའི་ངོ་བོ་དང་། ཉིང་རྡུལ་མཚོན་ཆ་འཕེལ་རྒྱས་གཏོང་རྒྱུ་མེད་ལུགས་བསྐྱར་བསྒྲགས་བྱས་པར་དགའ་བསུ་ཞུས་པ་མ་ཟད། དབྱི་རན་གྱིས《ཉིང་རྡུལ་མཚོན་ཆ་ཁྱབ་འགྱེད་མི་གཏོང་བའི་ཆིངས་ཡིག》ཕྱོགས་ཡོངས་ནས་ལག་ལེན་བསྟར་རྒྱུ་ཁས་ལེན་དང་འགན་སྲུང་ལྟ་སྐུལ་གྱི་གྲོས་དན་འོས་འགན་ཕྱོགས་ཡོངས་ནས་འཁུར་རྒྱུར་དགའ་བསུ་ཞུས་ཏེ། དབྱི་རན་གྱིས་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞི་དང་མུ་མཐུད་མཉམ་ལས་བྱེད་པའི་སྲིད་ཇུས་ལ་རྒྱབ་སྐྱོར་བྱས་ནས། ཆིངས་འཇོག་རྒྱལ་ཁབ་ཅིག་ཡིན་པའི་དབྱི་རན་ལ་ཞི་བདེའི་ངང་ཉིང་རྡུལ་ནུས་པ་ལོངས་སུ་སྤྱོད་དབང་ལ་བརྩི་འཇོག་གང་ལེགས་བྱེད་དགོས་པའི་ནན་བཤད་ཀྱང་བྱས་ཡོད། ཕྱོགས་གསུམ་པོས་རྒྱལ་ཁབ་ཡོད་དོ་ཅོག་ཚང་མས་རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིའི་ཆེད་ལས་དང་། དྲང་གཞག དྲང་བདེན་བཅས་ཀྱིས་ལས་འགན་སྒྲུབ་པར་བཀག་འགོག་བཟོ་བའི་བྱེད་སྤྱོད་མི་ཐོན་པ་བྱེད་དགོས་པའི་ནན་བཤད་ཀྱང་བྱས་ཡོད།

དབྱི་རན་དང་ཨུ་རུ་སུས་ཀྲུང་གོ་ཕྱོགས་ཀྱིས་དགེ་མཚན་ལྡན་པའི་ནུས་པ་བཏོན་པ་དང་ད་ཐེངས་ཀྱི་པེ་ཅིང་ཐུག་འཕྲད་གཙོ་གཉེར་བྱས་པར་བསྔགས་བརྗོད་བྱས་ཤིང་། ཕྱོགས་གསུམ་པོས་མུ་མཐུད་འབྲེལ་གཏུག་དང་མཉམ་ལས་རྒྱུན་འཁྱོངས་བྱ་རྒྱུའི་མོས་མཐུན་བྱས་པ་རེད།

གཞན་ཡང་། ཕྱོགས་གསུམ་པོས་མཉམ་དུ་དོ་ཁུར་བྱེད་པའི་ས་ཁུལ་དང་རྒྱལ་སྤྱིའི་གནད་དོན་ཐད་བསམ་འཆར་བརྗེ་རེས་བྱས་པ་མ་ཟད། འབོ་གསེར་རྒྱལ་ཁབ་དང་ཧྲང་ཧའེ་མཉམ་ལས་རྩ་འཛུགས་སོགས་རྒྱལ་སྤྱིའི་རྩ་འཛུགས་དང་ཕྱོགས་མང་ལམ་སྲོལ་ཁྲོད་མཉམ་ལས་རྒྱུན་འཁྱོངས་དང་དེར་ཤུགས་སྣོན་རྒྱག་རྒྱུར་མོས་མཐུན་ཡང་བྱས་པ་རེད།