འབྲུ་རིགས་དང་པད་ཁ་འདེབས་འཛུགས་ཀྱི་ཆེད་དོན་དངུལ་བུན་སྐྱེད་གསབ་ཀྱི་ཚོད་ལྟ་སོགས་ཀྱི་སྲིད་ཇུས་ལག་བསྟར་བྱེད་འགོ་ཚུགས་པ།
ད་ལོ་རང་རྒྱལ་གྱིས་འབྲུ་རིགས་དང་སྲན་ཆེན་གྱི་སྲིད་ཇུས་ལ་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་བཏང་བ།
གསར་འགོད་པས་ཞིང་ལས་དང་གྲོང་གསེབ་པུའུ་ནས་ཤེས་རྟོགས་བྱས་པར། ད་ལོ་རྒྱལ་ཁབ་ཀྱིས་ཞིང་ཁའི་ས་ནུས་སྲུང་སྐྱོང་ཁ་གསབ་དང་། ཆུ་འབྲས་ཀྱི་ཁ་གསབ། དེ་བཞིན་བྱང་ཤར་གྱི་མ་རྨོས་ལོ་ཏོག་དང་སྲན་ཆེན་ཐོན་སྐྱེད་བྱེད་མཁན་གྱི་ཁ་གསབ་སོགས་ཀྱི་སྲིད་ཇུས་མུ་མཐུད་ལག་བསྟར་བྱས་ཏེ། འབྲུ་རིགས་དང་པད་ཁ་འདེབས་འཛུགས་ཀྱི་ཆེད་དོན་དངུལ་བུན་ལ་སྐྱེད་གསབ་ཀྱི་ཚོད་ལྟ་དང་བྱང་ཤར་གྱི་སྲན་ཆེན་ས་བོན་ཐུམ་སྒྲིལ་ཁ་གསབ་ལག་ལེན་བསྟར་འགོ་ཚུགས་ནས། འབྲུ་རིགས་དང་སྲན་ཆེན་ཐོན་སྐྱེད་ལ་རྒྱབ་སྐྱོར་བྱེད་པའི་སྲིད་ཇུས་ཀྱི་སྣ་འདུས་ཐབས་བཟང་སྤྱོད་པ་དང་ཐབས་བརྒྱ་ཇུས་སྟོང་ངང་ཞིང་པའི་ཧུར་སེམས་སྐུལ་སློང་བྱས་ཏེ། སྲན་ཆེན་འདེབས་འཛུགས་རྒྱ་ཆེར་གཏོང་བའི་གྲུབ་འབྲས་སྲ་བརྟན་དང་འབྲུ་རིགས་ཐོན་འབབ་རྒྱ་མ་དུང་ཕྱུར་ཁྲི་1.4ཙམ་གྱི་དམིགས་ཚད་མངོན་འགྱུར་བྱེད་པར་སྲིད་ཇུས་ཀྱི་འགན་སྲུང་མཁོ་འདོན་བྱས་ཡོད།
དཔྱིད་དུས་སུ་དཔྱིད་རྨོད་དཔྱིད་འདེབས་ལྷོ་ནས་བྱང་བར་ཕྱོགས་ཡོངས་ནས་བྱེད་འགོ་ཚུགས་ཤིང་། དེའི་རིང་ནི་ད་ལོའི་དཔྱིད་འདེབས་འབྲུ་རིགས་ཀྱི་རྒྱ་ཁྱོན་དོན་འཁྱོལ་དང་འབྲུ་རིགས་ཐོན་སྐྱེད་ཀྱི་རྨང་གཞི་སྲ་བརྟན་དུ་གཏོང་བའི་འགག་རྩའི་དུས་སྐབས་ཤིག་རེད། ཞིང་ལས་དང་གྲོང་གསེབ་པུའུ་ཡིས་ས་གནས་ཁག་ལ་ཞིང་ལས་ལ་ཤུགས་སྣོན་དང་། ཞིང་པར་ཕན་པ། ཞིང་པ་ཕྱུག་པོ་ཆགས་པ་བཅས་ཀྱི་སྲིད་ཇུས་དོན་འཁྱོལ་བྱེད་པར་མཛུབ་ཁྲིད་བྱས་ཏེ་འབྲུ་རིགས་དང་ཞིང་ལས་ཐོན་རྫས་གཙོ་བོའི་རིན་གོང་ལུགས་མཐུན་གྱི་ཆུ་ཚད་ཐོག་རྒྱུན་འཁྱོངས་ཐུབ་པར་སྐུལ་འདེད་བཏང་ནས། འབྲུ་རིགས་འདེབས་མཁན་ཞིང་པའི་གཞི་རྩའི་ཁེ་ཕན་འགན་ལེན་བྱས་ཏེ་ཞིང་པས་འབྲུ་རིགས་འདེབས་པའི་ཧུར་སེམས་སྐུལ་སློང་བྱས་ཡོད། དེ་དང་ཆབས་ཅིག་རྨོ་འདེབས་དོ་དམ་དང་བསྡུ་ལེན་སོགས་འགག་རྩའི་ལྷུ་ཚིགས་ལ་དམིགས་ནས་རིགས་གཅིག་མཁས་ཅན་གྱི་མཛུབ་ཁྲིད་ཚོགས་ཆུང་དང་། ཐོན་ལས་རིགས་གཅིག་མཁས་ཅན་ཞབས་ཞུ་ཚོགས་པ། ཚན་རྩལ་ཡན་ལག་རུ་ཆུང་བཅས་སྒྲིག་འཛུགས་བྱས་ཏེ་རིམ་ཁག་གི་ལག་རྩལ་གསོ་སྦྱོང་བྱས་ནས་ནུས་ཤུགས་ཡོད་རྒུས་ལོ་ལེགས་ཀྱི་རྨང་གཞི་བརྟན་དུ་བཏང་ཡོད།