ཉེ་ཆར། བཟོ་ལས་དང་ཆ་འཕྲིན་ཅན་པུའུ་དང་ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་མཉམ་དུ《རིག་ནུས་དྲ་སྦྲེལ་རླངས་འཁོར་ཐོན་རྫས་ཆོག་འཐུས་དང་། ཚུར་བསྡུ། མཉེན་ཆས་དྲ་ཐོག་རིམ་སྤོར་དོ་དམ་བཅས་ལ་སྔར་བས་ཤུགས་སྣོན་རྒྱག་རྒྱུའི་སྐོར་གྱི་བརྡ་ཐོ》(གཤམ་དུ《བརྡ་ཐོ》ཞེས་བསྡུ་རྒྱུ)ཁྱབ་བསྒྲགས་བྱས་ཤིང་། དེའི་དམིགས་ཡུལ་ནི་རིག་ནུས་དྲ་སྦྲེལ་གྱི་རླངས་འཁོར་ཆོག་འཐུས་དང་། ཚུར་བསྡུ། མཉེན་ཆས་དྲ་ཐོག་རིམ་སྤོར(OTA)དོ་དམ་སྔར་བས་ཚད་ལྡན་དུ་གཏོང་བ་དང་། རླངས་འཁོར་གྱི་བདེ་འཇགས་འགན་ལེན་ཏན་ཏིག་བྱེད་པ། རིག་ནུས་དྲ་སྦྲེལ་རླངས་འཁོར་ཐོན་རྫས་ཀྱི་བདེ་འཇགས་ཆུ་ཚད་མཐོ་རུ་གཏོང་བ་བཅས་བྱས་ནས། རླངས་འཁོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་དེ་རེད།

2024ལོར་རང་རྒྱལ་གྱིས་རླངས་འཁོར་ཚུར་བསྡུ་ཐེངས་233བྱས་པར་རླངས་འཁོར་ཁྲི་1123.7དང་འབྲེལ་བ་ཡོད་པ་དེ་ལོ་གོང་མ་ལས་8.9%དང་67%སོ་སོར་འཕར་ཡོད། 《བརྡ་ཐོའི》ནང་ཁེ་ལས་ཀྱི་ཐོན་རྫས་སྤུས་ཚད་བདེ་འཇགས་ཀྱི་བྱེད་པོའི་འགན་འཁྲི་ཆེ་རུ་གཏོང་བ་དང་། ཐོན་རྫས་ཆོག་འཐུས་དང་ཕྱིར་ཚུར་བསྡུ་དོ་དམ་གྱི་བླང་བྱ་ཞིབ་ཕྲ་བཟོ་བ། ཐོན་རྫས་ལྟ་འདོམས་གཏིང་ཟབ་ཏུ་གཏོང་བ། དོན་རྐྱེན་ལས་འཛོལ་གྱི་སྙན་ཞུ་དང་ཞིབ་འཇུག་བརྡར་གཅོད་ལམ་སྲོལ་འཐུས་སྒོ་ཚང་དུ་གཏོང་བ། ཁས་ལེན་ཞབས་ཞུ་དང་དོ་དམ་ལ་ཤུགས་སྣོན་རྒྱག་པ་སོགས་ལ་བརྟེན་ནས་རིག་ནུས་དྲ་སྦྲེལ་གྱི་རླངས་འཁོར་ཐོན་རྫས་ཆོག་འཐུས་དང་ཚུར་བསྡུ་དོ་དམ་ལ་ཤུགས་སྣོན་ཏན་ཏིག་རྒྱག་དགོས་པའི་བླང་བྱ་བཏོན་ཡོད།