ལྔ། མེ་སྐྱོན་ཐོག་མར་ཐོན་སྐབས་གཞི་རྩའི་མེ་གསོད་སྟངས།

1.གྲང་མོ་བཟོ་ཐབས། ཆུ་མདའ་དང་མེ་གསོད་ཆས་སོགས་སྤྱད་ནས་འབར་དངོས་ལ་ཆུ་གཏོར་ན། འབར་དངོས་གྲང་མོ་ཆགས་ནས་མེ་ཐད་ཀར་གསོད་ཐུབ།

2.ལོགས་སུ་འཇོག་ཐབས། མེ་ཤོར་སའི་ས་ཆའམ་ཡང་ན་དངོས་རྫས་ཉེ་འགྲམ་གྱི་འབར་སླ་བའི་དངོས་པོ་ལོགས་སུ་འཇོག་པའམ་ཡང་ན་སྤོ་དགོས། དེ་ལྟར་བྱས་ཚེ་འབར་སླ་བའི་དངོས་པོ་མེད་པའི་དབང་གིས་མེ་འབར་མཚམས་ཆད་སྲིད།

3.དབུགས་འགག་གི་མེ་གསོད་ཐབས། སྲིང་བལ་ཉལ་ཆས་རློན་པ་དང་། རྩྭ་རས་རློན་པ། སྲིང་བལ་གདན་རློན་པ་སོགས་འབར་དངོས་ཐོག་གཡོག་དགོས། དེ་ལྟར་བྱས་ཚེ་དབྱང་རླུང་ཟད་ནས་མེ་འབར་མཚམས་ཆད་སྲིད།

དྲུག རང་བྱུང་གནོད་འཚེའི་ཉེན་ཁ་ལས་གཡོལ་ཐབས།

(གཅིག) ས་ཡོམ།

1.ཕྱི་རོལ། སྲང་ལམ་གུ་དོག་པོ་དང་། དུ་ཁུང་མཐོ་པོ། གློག་སྒྱུར་ཆས་བཅས་དང་། དེ་བཞིན་འབར་སླ་གས་སླའི་ཁུལ་བཅས་དང་ཐག་རིང་ཙམ་སྡོད་པ་དང་། གུ་ཡངས་སར་ཙོག་པུར་སྡོད་པའམ་ཡང་ན་ཉལ་བ། རྦབ་རྡོ་དང་མཉམ་དུ་རི་གཤམ་དུ་རྒྱུག་མི་འགྲོ་བར། རི་ཁུག་ཏུ་ཡིབ་ནས་སྡོད་པ་དང་ཆབས་ཅིག བྲག་རི་གཡང་གཟར་དང་ཐག་རིང་ཙམ་བྱས་ཏེ། གས་རྡིབ་དང་རི་ཉིལ་བ་སོགས་ཀྱི་ཉེན་ཁ་མི་ཐོན་སྔོན་འགོག་བྱེད་དགོས།

2.ཁང་ནང་། ཁྱིམ་ཆས་མཁྲེགས་པོའི་འོག་ཡིབ་ནས་མགོ་ལ་སྲུང་སྐྱོང་བྱེད་དགོས། ཁང་པའི་ཕྱི་རོལ་དུ་བྲེལ་འཚུབ་ངང་བྲོས་མི་རུང་། གལ་ཏེ་བྲོས་ཚེ་སྒེའུ་ཁུང་གི་ཤེལ་སྒོ་དང་བརྡ་ཁྱབ་བྱང་བུ་སོགས་ཟགས་ནས་རྨས་སྐྱོན་ཕོག་རྒྱུར་ཟོན་དགོས། ཁ་འགྲེམས་ཁྲིད་སྟོན་པའི་ཕྱོགས་སྟོན་ལྟར་གོ་རིམ་ལྡན་པའི་ངང་ཁ་འགྲེམས་བྱེད་དགོས།

(གཉིས) ཆུ་རུད།

དྲག་ཆར་དང་འཕྲད་ཚེ་མྱུར་དུ་བདེ་འཇགས་ཀྱི་མཐོ་སར་སྤོ་དགོས། རོང་མཐིལ་ལམ་ཡང་ན་གཡང་གཟར་སར་བསྡད་ནས་ཉེན་གཡོལ་བྱེད་མི་རུང་། ཆུ་རུད་ཐོན་བཟོ་ཡོད་པ་ཤེས་ཚེ། འཕྲལ་དུ་ས་དབྱིབས་ལ་ལྟ་ཞིབ་བྱས་ཏེ་མྱུར་དུ་གྲོག་རོང་གི་གཞོགས་གཉིས་ཀྱི་རི་ལྡེབས་སམ་ཡང་ན་མཐོ་སར་བྲོས་དགོས་པ་ལས། གྲོག་རོང་དེད་ནས་བྲོས་མི་རུང་། ཤིང་སྡོང་ལ་འཛེགས་ནས་ཉེན་གཡོལ་བྱེད་མི་རུང་ལ། གཡང་གཟར་གྱི་ས་དོང་ངམ་ཡང་ན་རྦབ་རྡོ་དང་རྡོ་ཕུང་གི་རྒྱབ་ཏུ་ཡིབ་མི་རུང་། དྲག་ཆར་བབས་ཐག་ཆད་རྗེས། བྲེལ་འཚུབ་ངང་གྲོག་རོང་གི་སྡོད་གནས་སུ་ལོག་མི་རུང་བར་དུས་ཡུན་ངེས་ཅན་ཞིག་སྒུག་དགོས།

(གསུམ) ཆུ་ལོག་གི་གནོད་འཚེ།

དྲག་ཆར་འཕྲད་སྐབས། མཐའ་འཁོར་གྱི་ཆུ་བོའི་ཆུ་ཁ་དང་རི་བོར་རྒྱུན་གཏན་མིན་པའི་གནས་ཚུལ་ཡོད་མེད་ལ་ཡང་སེ་ལྟ་ཞིབ་བྱས་ཏེ་གནས་སྤོའི་གྲ་སྒྲིག་བྱེད་དགོས་ལ། གནས་སྤོ་སྐབས་ཐག་ཉེ་སར་མགྱོགས་མྱུར་སྤོས་ནས། སྔོན་ལ་མི་དང་རྗེས་སུ་རྒྱུ་ནོར་སྤོ་བ་དང་། སྔོན་ལ་རྒན་རྒོན་དང་། ཕྲུ་གུ ནད་པ། དབང་པོ་སྐྱོན་ཅན་བཅས་སྤོས་རྗེས་གཞི་ནས་མི་གཞན་སྤོ་དགོས། ཐོག་ཁ་དང་། སྡོང་པོ་ཆེན་པོ། གྱང་མཐོ་པོ་སོགས་ཡོད་སར་སྤོ་གང་ཐུབ་བྱེད་དགོས། རི་ཁུལ་དུ་དྲག་ཆར་བབས་ཚེ་གཙང་པོ་སྒྲོལ་བའམ་ཡང་ན་གྲོག་རོང་ཁུལ་དུ་མི་འགྲོ་གང་ཐུབ་བྱེད་པ་དང་ཆུ་ལོག་གིས་མ་འཁྱེར་སྔོན་འགོག་བྱེད་དགོས།

(བོད་རང་སྐྱོང་ལྗོངས་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གིས་མཁོ་འདོན་བྱས)