ཧྭ་ཅིན་ཨ་མེ་ཞིབ་ཚགས་རྫས་འགྱུར་བཟོ་ལས་དང་དེ་བཞིན་མ་བཅོས་རྒྱུ་ཆ་ལས་གྲྭའི་རྣམ་གྲངས་ཨར་སྐྲུན་བྱེད་བཞིན་ཡོད་པ་དང་ཐོན་སྐྱེད་བྱེད་འགོ་ཚུགས་རྗེས་སྔོན་དཔག་བྱས་ན་ལོ་རེའི་ཕྱིར་ཚོང་ཡོང་འབབ་སྒོར་དུང་ཕྱུར་1000ལྷག་ཙམ་ཟིན་རྒྱུ་དང་། ཨན་ཀང་ངར་ལྕགས་དེ་པེན་ཀང་ངར་ལྕགས་ལ་བསྐྱར་སྒྲིག་བྱས་རྗེས་པེན་ཀང་ངར་ལྕགས་ཐོན་ལས་ཀྱི“རིག་ལྡན་སྟོན་གྲངས”31.7%འཕར་བ་ལ་སོགས་ཉེ་ཆར་ཀྲུང་དབྱང་དང་ས་གནས་མཉམ་ལས་ཀྱི་རྣམ་གྲངས་རེ་རེ་བཞིན་ལེའོ་ཧྲེན་ས་གཞི་ཆེ་མོར་རྩ་བ་ཚུགས་པ་དང་འབྲས་བུ་ཐོན་ཡོད།

2022ལོའི་ཟླ་8པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལེའོ་ཉིང་དུ་རྟོག་ཞིབ་གནང་སྐབས“དུས་རབས་གསར་པའི་བྱང་ཤར་དར་རྒྱས་ཐད་འགན་འཁྲི་འཁུར་སེམས་དང་བྱས་རྗེས་དེ་བས་ཆེ་བ་མངོན་པར་བྱས་ནས་ལེའོ་ཉིང་དར་རྒྱས་གོང་འཕེལ་གྱི་རྣམ་པ་གསར་པ་འབད་བརྩོན་ཆེན་པོས་གསར་གཏོད་བྱེད་དགོས”ཞེས་ནན་བཤད་གནང་བ་དང་ཁོང་གིས་འདི་ལོའི་རྒྱལ་ཡོངས་ཀྱི་ཚོགས་འདུ་གཉིས་ཀྱི་ཐོག“སྒྱུར་བཅོས་སྒོ་དབྱེ་གཏིང་ཟབ་ཏུ་བཏང་ནས་འགལ་རྐྱེན་ཟམ་མི་ཆད་པར་སེལ་བ་དང་སྒུལ་ནུས་ཆེ་རུ་གཏོང་དགོས”ཞེས་ནན་བཤད་གནང་བ་རེད།

ལེའོ་ཉིང་གིས་ཀྲུང་དབྱང་ཁེ་ལས་དེ་དར་རྒྱས་གོང་འཕེལ་གྱི་ཐོན་ཁུངས་གལ་ཆེན་ཞིག་ཏུ་བརྩིས་ནས་སྒྱུར་བཅོས་སྒོ་དབྱེ་གཏིང་ཟབ་ཏུ་གཏོང་བ་དང་། ཀྲུང་དབྱང་དང་ས་གནས་ཀྱི་མཉམ་ལས་བྱེད་སྟངས་གསར་གཏོད་བྱེད་པ། ཀྲུང་དབྱང་དང་ས་གནས་ཀྱི་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། ཐོན་ལས་ཕྱོགས་སྒྱུར་གྱི་འགོག་རྐྱེན་སེལ་བ། འཕེལ་རྒྱས་ཀྱི་སྒུལ་ཤུགས་གསར་པ་སྐྱེད་སྲིང་བཅས་བྱས་ཡོད། 2024ལོར་ལེའོ་ཉིང་གིས་གཏན་འཇཌ་རྒྱུ་ནོར་ལ་མ་དངུལ་གཏོང་ཚད་དུས་མཚུངས་ལས་5.3%འཕར་བའི་ནང་ཀྲུང་དབྱང་གི་རྣམ་གྲངས་ལ་མ་དངུལ་གཏོང་ཚད་27.8%འཕར་ཡོད།

2025ལོ་ནི་ལེའོ་ཉིང་ཁྱོན་ཡོངས་ནས་དར་རྒྱས་ཀྱི་ཚད་བརྒལ་གསར་པའི་ལོ་གསུམ་གྱི་བྱ་སྤྱོད་ཀྱི་མཇུག་བསྡུའི་ལོ་ཡིན། “ང་ཚོས་ཞབས་ཞུར་ཤུགས་སྣོན་བརྒྱབ་ནས་ཀྲུང་དབྱང་དང་ས་གནས་མཉམ་ལས་ཀྱི་རྒྱུ་རྐྱེན་ཁག་གི་འགན་སྲུང་ནུས་པ་ཆེ་རུ་གཏོང་བ་དང་། ལས་གྲྭ་ཅན་དང་། རྣམ་གྲངས་ཅན། གསལ་ཐོ་ཅན་བཅས་ཀྱི་སྒོ་ནས་ཀྲུང་དབྱང་དང་ས་གནས་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས”ཞེས་ལེའོ་ཉིང་ཞིང་ཆེན་གཞུང་རྒྱུ་ཨུ་ལྷན་གྱི་འགན་འཁུར་བློ་མཐུན་གཙོ་བོས་བརྗོད་པ་རེད།

འདི་ལོའི་ཟླ་1པོར་ལེའོ་ཉིང་ཞིང་ཆེན་དང་ཧྲེན་དབྱང་གྲོང་ཁྱེར་གྱི“ཀྲུང་དབྱང་ཁེ་ལས་ཁྱིམ་གཞིས”ཀྱི་སྒོ་བྱང་དངོས་སུ་བཀལ་ནས་ཀྲུང་དབྱང་དང་ས་གནས་མཉམ་ལས་ཀྱི་གཅིག་འཐུས་རྣམ་པའི་ཞབས་ཞུའི་ལས་སྟེགས་བསྐྲུན་ཡོད། ཚོང་འགུགས་འོས་སྦྱོར་ངོ་སྤྲོད་དང་། ཚན་རྩལ་སྤྲོ་གླེང་ཁང་། རྣམ་གྲངས་སྐྱེད་སྲིང་། འབྲེལ་མཐུད་བཞུགས་མོལ་ལ་སོགས་ལེའོ་ཉིང་ཞིང་ཆེན་གཞུང་རྒྱུ་ཨུ་ལྷན་གྱི་ཀྲུང་དབྱང་ཁེ་ལས་ཞབས་ཞུ་ཁྲུའུ་དང་པོའི་ལས་དོན་པ་ལི་ཙན་གྱིས་ངོ་སྤྲོད་བྱས་པར་གཞིགས་ན། སྒོ་བྱང་བཀལ་ནས་ཟླ་བ་གཅིག་ཀྱང་མ་འགོར་བར་རྣམ་གྲངས་གྲ་སྒྲིག་ཚོགས་ཆུང་5དང་ཀྲུང་དབྱང་ཁེ་ལས་དང་ཞིང་ཆེན་ཁོངས་གཏོགས་ཁེ་ལས་ཀྱི་འཐུས་མི་21“ཀྲུང་དབྱང་ཁེ་ལས་ཁྱིམ་གཞིས”ནང་བཅའ་སྡོད་བྱས་ཡོད་པ་རེད།

ལེའོ་ཉིང་ཞིང་ཆེན་གཞུང་རྒྱུ་ཨུ་ལྷན་གྱི་ཚན་རྩལ་གསར་གཏོད་དང་ཆ་འཕྲིན་ཅན་ཁྲུའུ་ཡི་ལས་དོན་པ་ཀྲའོ་པིན་གྱིས“ཀྲུང་དབྱང་ཁེ་ལས་ཀྱིས་བཏོན་པའི་གནད་དོན་གཅིག་གྱུར་བྱུང་ན་སྡེ་ཚན་མང་པོས་མཐུན་སྦྱོར་ཐག་གཅོད་བྱེད་པར་སྟབས་བདེ་ཡོད”ཅེས་བཤད། ལེའོ་ཉིང་གིས་ལེའོ་ཉིང་དུ་བཅའ་སྡོད་ཀྲུང་དབྱང་ཁེ་ལས་ཀྱི་ཆ་འཕྲིན་མཛོད་དང་། ལེའོ་ཉིང་དུ་བཅའ་སྡོད་ཀྲུང་དབྱང་ཁེ་ལས་ཀྱི་གཙོ་གནད་རྣམ་གྲངས་མཛོད། ལེའོ་ཉིང་དུ་བཅའ་སྡོད་ཀྲུང་དབྱང་ཁེ་ལས་ཀྱི་གལ་ཆེའི་ཞབས་ཞུའི་ནང་དོན་གསལ་ཐོ་བཅས“མཛོད་གཉིས་དང་གསལ་ཐོ་གཅིག”གི་ལམ་སྲོལ་དྲ་ཐོག་ནས་མཐོང་བའི་འཁོར་སྐྱོད་ལ་སྐུལ་འདེད་བཏང་སྟེ་རིམ་རྩིས་བརྒྱབ་ན་ལེའོ་ཉིང་དུ་བཅའ་སྡོད་ཀྲུང་དབྱང་ཁེ་ལས་ཀྱི་ཞབས་ཞུའི་དོན་ཚན་ཁག་500ལྷག་ཙམ་བསྡུ་རུབ་བྱས་པ་རེད།

ཀྲུང་དབྱང་དང་ས་གནས་མཉམ་ལས་ཀྱི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་སྦྲེལ་མཐུད་ལས་སྟེགས་སྐྲུན་མགྱོགས་སུ་བཏང་ནས་སྦྲེལ་ཐག་སྣུར་སྲིང་དང་། ཁ་གསབ། སྟོབས་ཆེར་གཏོང་བ་བཅས་བྱས་པ་དང་། ཀྲུང་དབྱང་ཁེ་ལས་ཀྱིས་ཞིང་ཆེན་རིམ་པའི་ཚན་རྩལ་འཆར་གཞིའི་རྣམ་གྲངས་ལ་སྣེ་ཁྲིད་བྱེད་པའམ་ཡང་ན་ལག་བསྟར་ནང་ཞུགས་པར་སྐུལ་འདེད་བཏང་སྟེ་གསར་གཏོད་ལས་སྟེགས་གལ་ཆེན་འཛུགས་སྐྲུན་ལ་ཐུན་མོང་ཐོག་ཤུགས་སྣོན་བརྒྱབ་པ་སོགས་ལེའོ་ཉིང་གི་ཀྲུང་དབྱང་དང་ས་གནས་མཉམ་ལས་ཀྱི་དར་རྒྱས་མཉམ་ཤུགས་རྒྱུན་ཆད་མེད་པར་གཅིག་སྒྲིལ་བྱས་ཡོད། 2024ལོའི་ལོ་མཇུག་བར་ལེའོ་ཉིང་གི་ཀྲུང་དབྱང་དང་ས་གནས་མཉམ་ལས་རྣམ་གྲངས་གལ་ཆེན་193གྱི་ཁྲོད་ནས་141དངོས་སུ་ལས་འགོ་བཙུགས་པར་མ་དངུལ་སྒོར་དུང་ཕྱུར་2390བཏང་ཡོད་པ་རེད།