ཚེས་17ཉིན་རྒྱལ་ཁབ་བསྡོམས་རྩིས་ཅུས་ཀྱིས་ཟླ་དང་པོ་ནས་གཉིས་པའི་བར་གྱི་རྒྱལ་དམངས་དཔལ་འབྱོར་གྱི་འཁོར་རྒྱུག་གནས་ཚུལ་ཁྱབ་བསྒྲགས་བྱས་པ་རེད། གྲངས་གཞི་ལས་མངོན་པར། ཟླ་དང་པོ་ནས་གཉིས་པའི་བར་བཟོ་ལས་ཞབས་ཞུའི་ལས་རིགས་ཅུང་མྱུར་པོ་འཕར་བ་དང་། འཛད་སྤྱོད་མ་འཇོག་མུ་མཐུད་ལེགས་སུ་ཕྱིན་པ། ལས་ཞུགས་གནས་ཚུལ་སྤྱིའི་ཆར་བརྟན་པོ་ཡོད་པ། ཐོན་སྐྱེད་ནུས་ཤུགས་གསར་མ་སྟོབས་ཆེར་ཕྱིན་པ། དཔལ་འབྱོར་འཁོར་རྒྱུག་གི་འགོ་བརྟ྄ན་པོའི་ངང་ཚུགས་པ་བཅས་བྱུང་ནས་འཕེལ་རྒྱས་ཀྱི་རྣམ་པ་ཡག་པོ་མངོན་ཡོད།

བཟོ་ལས་ཐོན་སྐྱེད་ཅུང་མྱུར་པོ་འཕར་བ་དང་སྒྲིག་ཆས་བཟོ་སྐྲུན་ལས་རིགས་དང་ལག་རྩལ་མཐོ་བའི་བཟོ་སྐྲུན་ལས་རིགས་འཕར་ཚད་མགྱོགས་སུ་ཕྱིན་པ་དང་། ཟླ་དང་པོ་ནས་གཉིས་པའི་བར་རྒྱལ་ཡོངས་ཀྱི་གཞི་ཁྱོན་ཡན་གྱི་བཟོ་ལས་ཀྱི་འཕར་ཐང་དུས་མཚུངས་ལས་5.9%འཕར་བ་དེ་ལོ་འཁོར་གོང་མ་ལས་བརྒྱ་ཆའི་གྲངས་0.1འཕར་མགྱོགས་སུ་ཕྱིན་ཞིང་། དེའི་ནང་སྒྲིག་ཆས་བཟོ་སྐྲུན་ལས་རིགས་ཀྱི་འཕར་ཐང་དུས་མཚུངས་ལས་10.6%འཕར་ནས་ལོ་གོང་མ་ལས་བརྒྱ་ཆའི་གྲངས་2.9མགྱོགས་སུ་ཕྱིན་པ། ལག་རྩལ་མཐོ་བའི་བཟོ་སྐྲུན་ལས་རིགས་ཀྱི་འཕར་ཐང་བརྒྱ་ཆ་9.1%འཕར་ནས་བརྒྱ་ཆའི་གྲངས་0.2མགྱོགས་སུ་ཕྱིན་ཡོད།

ཞབས་ཞུའི་ལས་རིགས་ཀྱི་འཕར་ཚད་ལེགས་ཙམ་ཡོད་པ་དང་དེང་རབས་ཞབས་ཞུའི་ལས་རིགས་ཀྱི་འཕར་ཚད་ཅུང་མགྱོགས་པོ་ཡོད། ཟླ་དང་པོ་ནས་གཉིས་པའི་བར་རྒྱལ་ཡོངས་ཀྱི་ཞབས་ཞུའི་ལས་རིགས་ཀྱི་ཐོན་སྐྱེད་སྟོན་གྲངས་དུས་མཚུངས་ལས་5.6%འཕར་ནས་ལོ་གོང་མ་ལས་བརྒྱ་ཆའི་གྲངས་0.4མགྱོགས་སུ་ཕྱིན་ཡོད།

ཁྲོམ་རའི་ཕྱིར་འཚོང་འཕར་ཚད་མགྱོགས་སུ་ཕྱིན་པ་དང་རྙིང་པ་གསར་བརྗེའི་འབྲེལ་ཡོད་ཚོང་ཟོག་ཕྱིར་འཚོང་བྱེད་ཚད་ཅུང་ལེགས་སུ་ཕྱིན་ཡོད། ཟླ་དང་པོ་ནས་གཉིས་པའི་བར་སྤྱི་ཚོགས་འཛད་ཟོག་སིལ་ཚོང་བསྡོམས་འབོར་སྒོར་དུང་ཕྱུར་83731ཟིན་པ་དེ་དུས་མཚུངས་ལས་4.0%འཕར་བ་དང་། ལོ་གོང་མ་ལས་བརྒྱ་ཆའི་གྲངས་0.5མགྱོགས་སུ་ཕྱིན་ཡོད། འཛད་ཟོག་རྙིང་པ་གསར་བརྗེའི་སྲིད་ཇུས་ཀྱི་ཕན་འབྲས་རྒྱུན་མཐུད་མངོན་གསལ་དོད་དུ་ཕྱིན་ཏེ། བཅད་གྲངས་ཡན་གྱི་སྡེ་ཚན་གྱི་འཕྲིན་གཏོང་ཡོ་བྱད་རིགས་དང་། རིག་གནས་གཞུང་ལས་ཡོ་བྱད་རིགས། ཁྱིམ་ཆས་རིགས། ཁྱིམ་སྤྱོད་གློག་ཆས། སྒྲ་བརྙན་ཡོ་བྱད་རིགས་བཅས་ཀྱི་ཚོང་ཟོག་སིལ་འཚོང་བྱེད་ཚད་26.2%དང་། 21.8% 11.7% 10.9%བཅས་ཁག་སོ་སོར་འཕར་ཡོད། རྒྱལ་ཡོངས་ཀྱི་དྲ་ཐོག་སིལ་ཚོང་བྱེད་ཚད་སྒོར་དུང་ཕྱུར་22763ཟིན་པ་དེ་དུས་མཚུངས་ལས་7.3%འཕར་ཡོད།