2015ལོའི་ཟླ་3པར་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས《གློག་ཤུགས་སྒྲིག་གཞི་སྒྱུར་བཅོས་སྔར་བས་ཟབ་ཏུ་གཏོང་རྒྱུའི་སྐོར་གྱི་བསམ་འཆར་འགའ་ཞིག》བཀྲམ་ནས་རེས་སྐོར་གསར་པའི་གློག་ཤུགས་སྒྲིག་གཞི་སྒྱུར་བཅོས་ཀྱི་ལས་འགན་བཀོད་སྒྲིག་བྱས་ཡོད། ལོ་10ཡི་རིང་། གློག་ཤུགས་ཐོན་སྐྱེད་སྒྲིག་འཛུགས་བྱེད་སྟངས་རིམ་བཞིན་འཆར་གཞི་ནས་ཁྲོམ་རར་བསྒྱུར་བ་དང་། རྒྱལ་ཡོངས་ཀྱི་གཅིག་གྱུར་གློག་ཤུགས་ཁྲོམ་ར་སྐྲུན་པར་མགྱོགས་མྱུར་སྐུལ་འདེད་བཏང་སྟེ། གཙོ་བོ་ཁྲོམ་རས་རིན་གོང་གཏན་འཁེལ་བྱེད་པའི་ལམ་སྲོལ་རགས་ཙམ་ཆགས་ཡོད།

རྒྱལ་ཁབ་ནུས་རྒྱུ་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་གསར་ཤོས་ལས་མངོན་པ་ལྟར་ན། རྒྱལ་ཡོངས་ཁྲོམ་ར་ཅན་གྱི་ཉོ་ཚོང་གློག་ཚད་དེ་2016ལོའི་ཆན་ཝ་ཆུ་ཚོད་དུང་ཕྱུར་ཁྲི་1.1ནས་2024ལོའི་ཆན་ཝ་ཆུ་ཚོད་དུང་ཕྱུར་ཁྲི་6.2བར་འཕར་བ་དང་། སྤྱི་ཚོགས་ཡོངས་ཀྱི་གློག་སྤྱོད་ཚད་ནང་བཟུང་བའི་བསྡུར་ཚད་དེ་17%ནས་63%བར་མཐོ་རུ་ཕྱིན་ཡོད། 2024ལོར་རྒྱལ་ཡོངས་ཀྱི་ཞིང་ཆེན་དང་ས་ཁུལ་ལས་བརྒལ་བའི་ཁྲོམ་ར་ཅན་གྱི་ཉོ་ཚོང་གློག་ཚད་ཆན་ཝ་ཆུ་ཚོད་དུང་ཕྱུར་ཁྲི་1.4ཟིན་པ་དེ་2016ལོ་ལས་ལྡབ་10ལྷག་ཙམ་འཕར་ཡོད།

རེས་སྐོར་གསར་པའི་གློག་ཤུགས་སྒྲིག་གཞི་སྒྱུར་བཅོས་ཀྱི་གཙོ་གནད་གྲས་ཤིག་ནི“དཀྱིལ་དོ་དམ་བྱེད་པ་དང་སྣེ་གཉིས་ལྷུག་གཏོང་གི་སྒྲིག་སྲོལ་གྱི་སྒྲོམ་གཞི”དེ་ཡིན། དཀྱིལ་དོ་དམ་བྱེད་པ་ནི། འདྲེན་སྦྱོར་གློག་དྲའི་ལྷུ་ཚིགས་ལ་སྲིད་གཞུང་གིས་ལྟ་འདོམས་བྱེད་ཤུགས་ཆེ་རུ་བཏང་ནས་གློག་དྲ་དྲང་གཞག་སྒོ་དབྱེ་དང་ཁྲོམ་ར་དྲང་གཞག་ཉོ་ཚོང་ཡོང་བར་འགན་ལེན་བྱས་ཏེ། གློག་དྲའི་གཞི་ཁྱོན་གྱི་ཕན་འབྲས་གང་ལེགས་འདོན་པ་དང་དོ་དམ་གྱི་ལས་ཕྱོད་ཆེ་རུ་གཏོང་རྒྱུ་རེད། སྣེ་གཉིས་ལྷུག་གཏོང་ནི། གློག་གཏོང་མཐའ་སྣེ་དང་གློག་འཚོང་མཐའ་སྣེར་ཁྲོམ་ར་སྒོ་དབྱེའི་ཞུགས་འཐུས་ལག་བསྟར་དང་། འགྲན་རྩོད་ནང་འདྲེན། སྤྱོད་མཁན་གྱི་འདེམས་དབང་ལྷུག་ཏུ་གཏོང་བ་བཅས་བྱས་ནས་རིན་གོང་དེ་ཁྲོམ་ར་ནས་གྲུབ་པ་བྱེད་ཀྱི་ཡོད།

རྒྱལ་ཁབ་ནུས་རྒྱུ་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར། རང་རྒྱལ་དུ་ཞིང་ཆེན་དང་། ཁུལ་ཁོངས། ཞིང་ཆེན་དབར་བཅས་ཀྱི་ཕན་ཆེའི་མཐུན་སྦྱོར་དང་། དུས་ཡུན་རིང་འབྲིང་དང་། གློག་གསོག གཞོགས་འདེགས་ཞབས་ཞུ་བཅས་འབྲེལ་མཐུད་དམ་ཟབ་བྱེད་པའི་རིམ་མང་གཅིག་གྱུར་གྱི་གློག་ཤུགས་ཁྲོམ་རའི་མ་ལག་རགས་ཙམ་ཆགས་ཡོད་པས་ཁྲོམ་ར་འདི་ཉིད་གློག་ཤུགས་ཐོན་ཁུངས་བཀོད་སྒྲིག་བྱེད་པའི་བྱ་ཐབས་གལ་ཆེན་ཞིག་ཏུ་གྱུར་ཡོད། 2015ལོར་སྒྱུར་བཅོས་བྱེད་འགོ་ཚུགས་མ་ཐག་དང་བསྡུར་ན་གློག་ཤུགས་ཁྲོམ་ར་འཛུགས་སྐྲུན“མེད་པ་ནས་ཡོད་པའི”བར་ཚད་བརྒལ་བྱུང་ཡོད།

རྒྱལ་ཁབ་ནུས་རྒྱུ་ཅུས་ཀྱི་འབྲེལ་ཡོད་འགན་འཁུར་བས། རེས་སྐོར་གསར་པའི་གློག་ཤུགས་སྒྲིག་གཞི་སྒྱུར་བཅོས་ཀྱི་ཁེ་ཕན་ནུས་ལྡན་ཐོན་ནས་གློག་ཤུགས་ཁྲོམ་རས“མཁོ་སྤྲོད་འགན་ལེན་དང་། ཕྱོགས་སྒྱུར་སྐུལ་འདེད། རིན་གོང་བརྟན་པོ”བཅས་ཡོང་བའི་ནུས་པ་སྔར་བས་ཐོན་ཡོད་ཅེས་བརྗོད།

གློག་ཤུགས་མཁོ་སྤྲོད་འགན་ལེན་བྱས་ཤིང་། གློག་ཤུགས་ཀྱི་དུས་ཡུན་རིང་འབྲིང་ཉོ་ཚོང་གློག་ཚད་ཀྱིས་ཁྲོམ་ར་ཅན་གྱི་གློག་ཚད་བསྡུར་ཚད་ལས་90%བརྒལ་བས། “གྲུ་རྡོའི”ནུས་པ་གང་ལེགས་བཏོན་ཡོད། འགན་འཁུར་བ་དེས་2024ལོའི་དབྱར་དུས་སུ་གློག་སྤྱོད་ཚད་སྔོན་ཆད་ལས་ཆེས་ཆེ་བའི་གནས་ཚུལ་འོག དུས་ཡུན་རིང་འབྲིང་གི་ཁྲོམ་ར་དང་ཞིང་ཆེན་དབར་གྱི་གློག་གསོག་ཁྲོམ་རར་བརྟེན་ནས་ས་ཁོངས་བརྒལ་བའི་གློག་ལམ་ནས་གློག་གཏོང་ནུས་པ་ཆེ་ཤོས་ཆན་ཝ་དུང་ཕྱུར་1.42ཟིན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གློག་སྤྱོད་དགོས་མཁོ་འགན་ལེན་ནུས་ལྡན་ཐུབ་ཡོད་ཅེས་ངོ་སྤྲོད་བྱས།

ཐཱན་ཉུང་ཕྱོགས་སྒྱུར་ལ་སྐུལ་འདེད་བཏང་ཞིང་། 2024ལོར་རྒྱལ་ཡོངས་ཀྱི་ནུས་རྒྱུ་གསར་པའི་སྒྲིག་སྦྱོར་འཕྲུལ་འཁོར་ཆན་ཝ་དུང་ཕྱུར་14.5ཟིན་ནས་སྤྱིའི་སྒྲིག་སྦྱོར་འཕྲུལ་འཁོར་གྱི་43%བཟུང་བ་དང་ནུས་རྒྱུ་གསར་པའི་གློག་50%ལྷག་ཙམ་ཁྲོམ་ར་ཅན་གྱི་བྱེད་སྟངས་ནས་བཏང་ཡོད། 2024ལོར་ལྗང་མདོག་ལག་ཁྱེར་ཡོད་པའི་ལྗང་མདོག་གློག་ཉོ་ཚོང་བསྡོམས་འབོར་ཆན་ཝ་ཆུ་ཚོད་དུང་ཕྱུར་4460ཟིན་པ་དེ་དུས་མཚུངས་ལས་364%འཕར་ཡོད། ནུས་རྒྱུ་གསར་པ་བཞི་ཆ་གཅིག་ཙམ་གྱིས་ལྗང་མདོག་ལག་ཁྱེར་དང་ལྗང་མདོག་གློག་གི་ཁྲོམ་ར་བརྒྱུད་ཁོར་ཡུག་གི་རིན་ཐང་མངོན་འགྱུར་བྱུང་ཡོད།

ནུས་སྤྱོད་མ་གནས་གཏན་འཇགས་ཡོང་བར་བྱས་ཤིང་། ཉེ་བའི་ལོ་ཤས་རིང་། གོ་ལ་ཧྲིལ་པོའི་ཁྱབ་ཁོངས་ནང་ནུས་རྒྱུ་མཁོ་སྤྲོད་བྱེད་ཤུགས་ཆུང་དུ་འགྲོ་བ་དང་རིན་གོང་འཕར་ཆག་ཆེ་བའི་རྣམ་པའི་འོག རང་རྒྱལ་གྱིས་གློག་རིན་ལམ་སྲོལ་འཐུས་སྒོ་ཚང་དུ་གཏོང་བ་དང་ཁྲོམ་ར་ཅན་གྱི་ཉོ་ཚོང་ལ་སྐུལ་འདེད་གཏོང་བ་སོགས་ཀྱི་བྱེད་ཐབས་བརྒྱུད་གློག་རིན་གཞི་རྩའི་ཆ་ནས་གཏན་འཇགས་ཡོང་བའི་འགན་ལེན་བྱས་ཏེ་ནུས་སྤྱོད་མ་གནས་སྤྱིའི་ཆ་ནས་ཚོད་འཛིན་ཐུབ་ཡོད། གྲོང་མི་དང་བཟོ་ཚོང་ལས་རིགས་ཀྱི་ཆ་སྙོམས་གློག་རིན་ནི་གོ་ལ་ཧྲིལ་པོའི་དཔལ་འབྱོར་དངོས་ཚན་གཙོ་བོ་50ཡི་ཆ་སྙོམས་ཀྱི་32%དང་39%སོ་སོར་ཟིན་ནས་རྒྱལ་སྤྱིའི་ཐོག་ཅུང་དམའ་ཤོས་ཀྱི་གྲས་ཡིན།