དབུ་ཤོག>གསར་འགྱུར།>རྒྱལ་ནང་།རྒྱལ་སྤྱི།>རྒྱལ་སྤྱི།
  • ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་མོ་རོ་ཁོའི་ཏན་ཅིར་ཚན་རྩལ་གྲོང་ལ་བཅར་འདྲི་བྱས་པ།

    —— “མོ་རོ་ཁོ་དར་རྒྱས་དེ་བས་ཆེ་བའི་འབྱུང་འགྱུར་ཕྱོགས་སུ་སྐྱོད་པར་རམ་འདེགས་བྱེད་ཐུབ་ངེས་རེད”

  • ཡོང་ཁུངས།  མི་དམངས་ཉིན་རེའི་ཚགས་པར།   |     རྩོམ་པ་པོ།  ཧོང་ཕེ་ཀྲའོ།   |     སྤེལ་དུས།  2025-03-19

    ཏན་ཅིར་ཚན་རྩལ་གྲོང་དུ་གནས་པའི་སེན་ཆི་ལིན་འགྱིག་འཁོར(མོ་རོ་ཁོ)ཚད་ཡོད་ཀུང་སིའི་འཁོར་ཁང་ནང་། ཀྲུང་མོ་རྒྱལ་ཁབ་གཉིས་ཀྱི་ལག་རྩལ་པ་དང་བཟོ་པས་སྒྲིག་ཆས་ལ་སྐོར་བཤེར་རྒྱག་བཞིན་པ།

    ཀྲུང་གོ་ལམ་ཟམ་ལས་གྲྭ་ཚད་ཡོད་འགན་འཁྲི་ཀུང་སིས་སྐྲུན་འགན་འཁུར་བའི་མོ་རོ་ཁོ་མུའུ་ཧན་མོ་ཏེ་ཁྲི་ཐོག་དྲུག་པའི་ཏན་ཅིར་ཚན་རྩལ་གྲོང་ཁྱེར(གཤམ་དུ“ཏན་ཅིར་ཚན་རྩལ་གྲོང”ཞེས་བསྡུ་རྒྱུ)ནང་། པེ་ཐེ་རུའེ་ས་དབུས་རྒྱ་མཚོའི་མོ་སྣེ་རྒྱུ་ཆ་གསར་པའི་ཚན་རྩལ་ཀུང་སིའི(གཤམ་དུ“ས་དབུས་རྒྱ་མཚོའི་མོ་སྣེ”ཞེས་བསྡུ་རྒྱུ)བཟོ་གྲྭ་གསར་པ་ཚ་ཚ་འུར་འུར་ངང་སྐྲུན་བཞིན་ཡོད།

    ཏན་ཅིར་ཚན་རྩལ་གྲོང་དེ་མོ་ཀྲུང་གི་སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱི་གཉིས་ཕན་མཉམ་ལས་ཀྱི་དཔེ་མཚོན་ཞིག་རེད་ཅེས་ས་གནས་དེ་གར་བརྗོད་ཀྱི་ཡོད། མོ་རོ་ཁོ་སྲིད་གཞུང་གིས་རྣམ་གྲངས་དེ་རྒྱལ་ཁབ་ཀྱི་དཔལ་འབྱོར་འཕར་བའི་སྒུལ་ཤུགས་གསར་པ་ཞིག་ཏུ་གྱུར་ནས་སྤྱི་ཚོགས་དང་དཔལ་འབྱོར་འཕེལ་རྒྱས་ལ་སྒུལ་ཤུགས་གསར་པ་མཁོ་འདོན་བྱ་རྒྱུའི་རེ་བ་བྱེད་ཀྱི་ཡོད་པ་རེད།

    ཁེ་ལས་གོ་ལ་ཧྲིལ་པོ་ཅན་གྱི་འཐབ་ཇུས་བཀོད་སྒྲིག་གི་གྲུབ་ཆ་གལ་ཆེན་ཞིག་ཡིན་པའི་ཀྲུང་གོའི་ལིས་གློག་རྡུལ་གློག་རྫས་ཁེ་ལས་པེ་ཐེ་རུའེ་རྒྱུ་ཆ་གསར་པ་ཚོགས་པ་མ་རྐང་ཚད་ཡོད་ཀུང་སིས་ཏན་ཅིར་ཚན་རྩལ་གྲོང་དུ་ལོ་རེར་ཏུན་ཁྲི་5ཐོན་པའི་ལིས་གློག་རྫས་ཕོ་སྣེ་རྒྱུ་ཆའི་རྣམ་གྲངས་ལ་མ་འཇོག་བྱས་ནས་བསྐྲུན་ཞིང་། ད་ལོར་ཕྱོགས་ཡོངས་ནས་ཐོན་སྐྱེད་བྱེད་འགོ་འཛུགས་རྩིས་ཡོད་པ་རེད།

    ཉེ་བའི་ལོ་ཤས་རིང་། གོ་ལ་ཧྲིལ་པོའི་གློག་རྫས་ཀྱི་དགོས་མཁོ་མུ་མཐུད་ཆེ་རུ་ཕྱིན་པ་དང་། ལྷག་པར་དུ། གློག་སྒུལ་རླངས་འཁོར་དང་ནུས་གསོག་ཁྲོམ་ར་མགྱོགས་མྱུར་འཕེལ་རྒྱས་ཕྱིན་པ་དེས་ཕོ་སྣེ་དང་མོ་སྣེའི་རྒྱུ་ཆའི་དགོས་མཁོ་མགྱོགས་མྱུར་ཆེ་རུ་འགྲོ་བར་སྐུལ་འདེད་བཏང་ཡོད། གོ་ལ་ཧྲིལ་པོའི་ཕོ་སྣེ་དང་མོ་སྣེའི་རྒྱུ་ཆའི་ཁྲོམ་རའི་ཐོག་འཁྲུག་ཆ་དོད་པའི་ཁེ་ལས་གཙོ་བོ་ཞིག་ཡིན་པའི་ངོས་ནས། མོ་རོ་ཁོར་ས་དབུས་རྒྱ་མཚོའི་མོ་སྣེ་བཀོད་སྒྲིག་བྱས་པ་དེས་ས་གནས་དེ་གའི་འབྲེལ་ཡོད་ལས་རིགས་ཀྱི་ཐོན་ལས་འཁོར་འབྲེལ་འཕེལ་རྒྱས་གཏོང་བ་དང་ས་ཁོངས་རང་བཞིན་གྱི་ནུས་རྒྱུའི་ལག་རྩལ་ལྟེ་གནས་སྐྲུན་པར་རམ་འདེགས་བྱ་རྒྱུ་རེད།

    དེང་རབས་ཅན་གྱི་ཐོན་སྐྱེད་བརྒྱུད་རིམ་ལྔ་རིམ་བཞིན་བསྒྲིགས་ཡོད་པ་དང་། ལས་གོས་གྱོན་པའི་ལག་རྩལ་བཟོ་པ་བྲེལ་འཚུབ་ཆེ་བ། རང་འགུལ་སྣེ་ཁྲིད་འཕྲུལ་འཁོར་ཕར་འགྲོ་ཚུང་འོང་བྱེད་བཞིན་ཡོད་པ་བཅས་ཏན་ཅིར་ཚན་རྩལ་གྲོང་དུ་སེན་ཆི་ལིན་འགྱིག་འཁོར(མོ་རོ་ཁོ)ཚད་ཡོད་ཀུང་སིའི་རྒྱ་ཆེ་ལ་དཀར་ཆ་དོད་པའི་བཟོ་གྲྭའི་འཁོར་ཁང་དུ་བྲེལ་འཚུབ་ཆེ་བའི་རྣམ་པས་ཁེངས།

    འཁོར་ཁང་གི་ལས་མི་ཧ་ལི་ཏེ་ཡིས་འདི་ག་ཚགས་པར་གྱི་གསར་འགོད་པར“ཀྲུང་གོའི་དགེ་རྒན་རྣམས་ལ་ཐུགས་རྗེ་ཆེ་ཞུ་གི་ཡིན། ཁོང་ཚོས་རང་ཉིད་ལ་འགྱིག་འཁོར་གྱི་མཁྲེགས་ཚད་དང་བརྡར་བཟོད་རང་བཞིན་མཐོ་རུ་གཏོང་བའི་འགག་རྩའི་ལག་རྩལ་རབ་དང་རིམ་པ་ངང་རྒྱུད་རིང་ལ་ཞིབ་ཚགས་པོས་བསླབས་བྱུང”ཞེས་བརྗོད།

    སེན་ཆི་ལིན་འགྱིག་འཁོར(མོ་རོ་ཁོ)ཚད་ཡོད་ཀུང་སིའི་དོ་དམ་ལྟེ་གནས་ཀྱི་སྤྱི་ཁྱབ་ཅིང་ལི་ཞུས་རུང་ཧྭ་ཡིས་འདི་ག་ཚགས་པར་གྱི་གསར་འགོད་པར། 2023ལོའི་ཟླ་10ཚེས་21ཉིན་རྣམ་གྲངས་དངོས་སུ་ལས་འགོ་བཙུགས་པ་ནས་2024ལོའི་ཟླ་9ཚེས་30ཉིན་འགྱིག་འཁོར་ཐོན་རྫས་ཁག་དང་པོ་ཐོན་པའི་བར། ཀུང་སིས་ཟླ་བ་11ནང་འགྱིག་འཁོར་རིག་ནུས་བཟོ་སྐྲུན་བཟོ་གྲྭ་ཞིག་བསྐྲུན་པ་རེད། སྔོན་དཔག་བྱས་ན། ད་ལོར་ཕྱོགས་ཡོངས་ནས་ཐོན་སྐྱེད་བྱེད་འགོ་ཚུགས་རྗེས། བཟོ་གྲྭས་ལོ་རེར་གཤིས་ནུས་མཐོ་བའི་འཇིབ་ཆུང་སོགས་ཀྱི་འགྱིག་འཁོར་ཁྲི་600ཐོན་སྐྱེད་བྱས་ནས་གོ་ལ་ཧྲིལ་པོའི་ཁྲོམ་རར་སྤུས་ཚད་མཐོ་བའི་ཐོན་རྫས་མཁོ་འདོན་བྱ་རྒྱུ་ཡིན་ཞེས་བརྗོད།

    “སྔོན་དཔག་བྱས་ན། 2027ལོའི་ལོ་མཇུག་ཏུ་རྣམ་གྲངས་དེས་མོ་རོ་ཁོར་ཐད་ཀར་ལས་ཞུགས་ལས་གནས་600ཙམ་བཏོད་དེ་ས་གནས་དེ་གའི་དཔལ་འབྱོར་འཕར་རྒྱུར་སྔར་བས་སྐུལ་ཁྲིད་བྱ་རྒྱུ་ཡིན་ཞིང་། འབྱུང་འགྱུར་བཟོ་གྲྭའི་ཐོན་ནུས་དེ་འགྱིག་འཁོར་ཁྲི་1200བར་འཕར་བ་དང་ལོ་རེའི་ཕྱིར་ཚོང་དངུལ་འབོར་སྔོན་དཔག་བྱས་ན་ཡོ་སྒོར་དུང་ཕྱུར་5.5ཟིན་པ་བྱས་ནས། མོ་རོ་ཁོ་དང་ཐ་ན་གོ་ལ་ཧྲིལ་པོའི་ཁྲོམ་རར་སྤུས་ལེགས་ཐོན་རྫས་དེ་བས་མང་བ་མཁོ་འདོན་བྱ་རྒྱུ་ཡིན་ཞེས་ཞུས་རུང་ཧྭ་ཡིས་བརྗོད།

    2023ལོའི་ཟླ་2པར་ཚོང་འགུག་གཉེར་སྐྱོང་དངོས་སུ་བྱེད་འགོ་ཚུགས་པ་ནས་བཟུང་། ཏན་ཅིར་ཚན་རྩལ་གྲོང་དུ་རིམ་རྩིས་བརྒྱབ་ན་ཁེ་ལས་30ཙམ་ཞུགས་རྒྱུའི་གན་རྒྱ་བཞག་པ་དང་། སྔོན་དཔག་བྱས་ན་གླིང་དུ་ཞུགས་པའི་ཁེ་ལས་ཀྱིས་མ་དངུལ་བསྡོམས་འབོར་ཨ་སྒོར་དུང་ཕྱུར་30ཙམ་བཏང་ཡོད། “རྣམ་གྲངས་སྤྱིའི་འཆར་འགོད་ནང་བཟུང་བའི་རྒྱ་ཁྱོན་སྤྱི་ཆིང་2167ཟིན་པ་དེ་བཟོ་ལས་མགྱོགས་སྣོན་ཁུལ་དང་གྲོང་ཁྱེར་གྱི་ལེ་ལག་ཚང་བའི་ཁུལ་ཁག་ཆེན་པོ་གཉིས་སུ་དབྱེ་ཡོད། ཚང་མ་བསྐྲུན་རྗེས་ལས་ཞུགས་ལས་གནས་ཁྲི་10མཁོ་འདོན་དང་མི་ཁྲི་30ཤོང་བའི་སྡོད་གནས་དང་འཚོ་བ་སྐྱེལ་སའི་གཅིག་བསྡུས་བཟོ་ལས་དང་། ཚོང་ལས། སྡོད་གནས། སྤྱི་པའི་ཞབས་ཞུ། རོལ་རྩེད་སྤྲོ་གསེང་བཅས་གཞི་གཅིག་ཏུ་འདུས་པའི་ཕྱོགས་བསྡུས་དེང་རབས་ཅན་གྱི་ཐོན་ལས་གྲོང་ཁྱེར་གསར་པ་ཞིག་ཏུ་འགྱུར་རྒྱུ་རེད”ཅེས་ཀྲུང་གོ་ལམ་ཟམ་ལས་གྲྭ་ཚད་ཡོད་འགན་འཁྲི་ཀུང་སི་མོ་རོ་ཁོ་དོན་གཅོད་ཁྲུའི་སྤྱི་ཁྱབ་ཅིང་ལི་གཞོན་པ་དང་ཏན་ཅིར་ཚན་རྩལ་གྲོང་ཁྱེར་འཛུགས་སྐྲུན་ཀུང་སིའི་ལས་འཛིན་པ་དང་སྤྱི་ཁྱབ་ཅིང་ལི་གཞོན་པ་གཅིག་ལྕོགས་ཧྲི་ཞའོ་པོ་ཡིས་བརྗོད།

    “ཏན་ཅིར་ཚན་རྩལ་གྲོང་གིས་མོ་རོ་ཁོའི་ཚན་རྩལ་མཐོ་བའི་གློག་རྫས་དང་རྩེར་སོན་འགྱིག་འཁོར་བཟོ་སྐྲུན་སོགས་ཁྱབ་ཁོངས་ཀྱི་འཕེལ་རྒྱས་ལ་སྐུལ་འདེད་བཏང་སྟེ། མོ་རོ་ཁོར་སྔར་བྱུང་མྱོང་མེད་པའི་འཕེལ་རྒྱས་ཀྱི་གོ་སྐབས་གཏོད་རྒྱུ་རེད” མོ་རོ་ཁོའི་དཔལ་འབྱོར་དང་ནོར་སྲིད་བློན་ཆེན་ཟུར་པ་ཧྥ་ཐ་ལཱ·ཝ་ལཱ་ལུའུ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། “ཀྲུང་གོའི་ཁེ་ལས་བཅའ་སྡོད་བྱས་པ་དེས་མོ་རོ་ཁོའི་ཐོན་སྐྱེད་མཁོ་སྤྲོད་འཁོར་འབྲེལ་སྔར་བས་འཐུས་སྒོ་ཚང་དུ་བཏང་ནས་ས་གནས་དེར་རྩལ་ནུས་མཐོ་བའི་ལས་ཞུགས་ལས་གནས་དེ་བས་མང་བ་གཏོད་པ་དང་དཔལ་འབྱོར་སྣ་མང་ཅན་འཕར་བར་སྐུལ་འདེད་བཏང་སྟེ། མོ་རོ་ཁོ་འདི་ཉིད་དར་རྒྱས་དེ་བས་ཆེ་བའི་འབྱུང་འགྱུར་ཕྱོགས་སུ་སྐྱོད་པར་རམ་འདེགས་བྱེད་ཐུབ་ངེས་རེད”ཅེས་བརྗོད།

    འགན་འཁུར་རྩོམ་སྒྲིག་པ། བསོད་ནམས་དབང་འདུས།

མཉམ་སྤྱོད།

འབྲེལ་ཡོད་གསར་འགྱུར།