“གཞི་ཆེའི་སྟངས་འཛིན་ལ་རྒྱུན་ཆད་མེད་པར་ཤུགས་སྣོན་དང་གསར་གཏོད་བྱེད་པ་དང་། གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་བ། ཐོན་ལས་གྲུབ་ཆ་ལེགས་སྒྱུར་རིམ་སྤོར་ལ་སྐུལ་འདེད་ཧུར་ཐག་གཏོང་བ་བཅས་བྱས་ནས། ཀྲུང་གོའི་དཔལ་འབྱོར་མདུན་ཕྱོགས་སུ་འཕེལ་རྒྱས་བརྟན་པོ་འགྲོ་རྒྱུར་སྐུལ་འདེད་གཏོང་བཞིན་ཡོད” ཉེ་ཆར་ཨེ་ཙེ་ཨོ་ཕི་ཡའི་ཨེ་ཏི་སི་ཨ་པ་པ་སློབ་ཆེན་གྱི་སྲིད་ཇུས་ཞིབ་འཇུག་པ་པཱ་ལུའུ·ཏེ་སྨི་ཞི་ཡིས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས“ཚན་རྩལ་གསར་གཏོད་ལ་སྐུལ་འདེད་གཏོང་བ་དང་ལྗང་མདོག་ཕྱོགས་སྒྱུར་མགྱོགས་སུ་གཏོང་བ་སོགས་བརྒྱུད་ཀྲུང་གོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་མདུན་སྐྱོད་བརྟན་པོ་ཐུབ་པ་བྱུང་ཡོད”ཅེས་བརྗོད་པ་རེད།

ན་ནིང་ཟླ་10པར། ཏེ་སྨི་ཞི་ཡིས་ཀྲུང་གོར་འཚམས་འདྲི་གནང་བ་དང་ཀྲུང་གོའི་དཔལ་འབྱོར་བརྟན་པོ་འཕར་བ་དང་ཆུ་ཚད་མཐོ་བའི་སྒོ་དབྱེ་རྒྱུན་ཆད་མེད་པར་རྒྱ་ཆེར་ཕྱིན་པ་དེས་ཁོང་ལ་བག་ཆགས་ཟབ་མོ་བཞག་ཡོད། ཏེ་སྨི་ཞི་ཡིས“རྒྱལ་སྒྲོལ་ཁེ་ལས་སྔར་བས་མང་བ་ཞིག་གིས་ཀྲུང་གོར་ལས་སྒོ་གཉེར་བ་མཐོང་བྱུང་ལ། རྒྱལ་སྤྱིའི་ཡུལ་སྐོར་བ་མང་པོ་ཞིག་ཀྱང་མཐོང་བྱུང་། དེ་ལས་ཀྲུང་གོའི་དཔལ་འབྱོར་ལ་གསོན་ཤུགས་ཀྱིས་ཁེངས་པ་དང་ཀྲུང་གོའི་སྒོ་དབྱེ་བསྟུན་མཁས་མཚོན་ཐུབ། ཀྲུང་གོས་རང་རྒྱལ་ཁབ་ཀྱི་གནས་ཚུལ་ལ་གཞི་བཙུགས་ནས་རང་ཉིད་ལ་དབང་བའི་དེང་རབས་ཅན་གྱི་འགྲོ་ལམ་ཐོག་བསྐྱོད་པ་མ་ཟད་གཡུར་ཟའི་གྲུབ་འབྲས་ཀྱང་ཐོབ་ཡོད་ལ། རྒྱལ་ཁབ་གཞན་གྱིས་དེང་རབས་ཅན་ལ་སྐུལ་འདེད་གཏོང་བར་དགེ་མཚན་ལྡན་པའི་དཔྱད་གཞི་མཁོ་འདོན་ཡང་བྱས་ཡོད”ཅེས་བརྗོད།

ཀྲུང་གོས་སྲོལ་རྒྱུན་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་བཞིན་ཡོད་ཅིང་། རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ཀྱི་འཕེལ་རྒྱས་གོམ་སྟབས་རྒྱུན་ཆད་མེད་པར་མགྱོགས་སུ་ཕྱིན་པ་དང་ཐོན་ལས་གསར་གཏོད་ནུས་པ་རྒྱུན་ཆད་མེད་པར་ཆེ་རུ་ཕྱིན་པ་ཏེ་སྨི་ཞི་ལ་དོ་སྣང་བྱུང་ཡོད། ཁོང་གིས་ཀྲུང་གོ་ནི་འོད་ཤུགས་ཐོན་རྫས་དང་། ལིས་གློག་རྫས། ནུས་རྒྱུ་གསར་པའི་རླངས་འཁོར་ཐོན་སྐྱེད་བཅས་ཐད་གོ་ལ་ཧྲིལ་པོའི་སྔོན་ཐོན་གྱི་གནས་བབ་ཏུ་གནས་ཡོད། ཀྲུང་གོའི་ལྗང་མདོག་ལག་རྩལ་ཕྱིར་གཏོང་མངོན་གསལ་དོད་པོས་འཕར་བ་དེས་རང་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་བ་མ་ཟད། ལྗང་མདོག་དངུལ་རྩ་དང་། རྒྱུན་མཐུད་ཆོག་པའི་རྨང་གཞིའི་སྒྲིག་བཀོད། བསྐྱར་སྐྱེས་ཐུབ་པའི་ནུས་རྒྱུའི་ཁྱབ་ཁོངས་བཅས་ཀྱི་རྒྱལ་སྤྱིའི་མཉམ་ལས་ལ་ཡང་སྐུལ་འདེད་བཏང་བ་རེད། “བསྐྱར་སྐྱེས་ཐུབ་པའི་ནུས་རྒྱུ་དང་། རིག་ནུས་བཟོ་སྐྲུན། ལྗང་མདོག་ལག་རྩལ་བཅས་ལ་མ་འཇོག་རྒྱུན་ཆད་མེད་པར་མང་དུ་བཏང་བ་བརྒྱུད། ཀྲུང་གོས་གོ་ལ་ཧྲིལ་པོའི་ཁོར་ཡུག་མཐུན་འཕྲོད་ཅན་གྱི་བཟོ་ལས་འཕེལ་རྒྱས་གཏོང་བར་ཚད་གཞི་འཛུགས་བཞིན་ཡོད་པའི”ངོས་འཛིན་བྱེད་ཀྱི་ཡོད།

ཉེ་བའི་ལོ་ཤས་རིང་། ཨེ་ཙེ་ཨོ་ཕི་ཡ་དང་ཀྲུང་གོ་ཕྱོགས་གཉིས་པོའི་ཉོ་ཚོང་བརྟན་པོ་འཕར་ཞིང་། ཏེ་སྨི་ཞི་ཡིས“བསྐྱར་སྐྱེས་ཐུབ་པའི་ནུས་རྒྱུ་དང་། རྒྱུན་མཐུད་ཆོག་པའི་འཕེལ་རྒྱས། ལྗང་མདོག་དངུལ་རྩ་སོགས་ཐད་ཨེ་ཙེ་ཨོ་ཕི་ཡ་དང་ཀྲུང་གོའི་དབར་མཉམ་ལས་ཀྱི་བར་མཐོངས་རྒྱ་ཆེན་པོ་ཡོད། ཀྲུང་གོས་ཤེས་བྱ་མཉམ་སྤྱོད་དང་ལག་རྩལ་ནང་བཤུག་སོགས་ཀྱི་བྱ་ཐབས་བརྒྱུད། ཨེ་ཙེ་ཨོ་ཕི་ཡའི་རང་ངོས་ཀྱི་ལྗང་མདོག་ལག་རྩལ་དང་གསར་གཏོད་ཐད་ཀྱི་ནུས་པ་ཆེ་རུ་གཏོང་རོགས་བྱེད་ཀྱི་ཡོད”ཅེས་བརྗོད་ཅིང་། དེས་ཨེ་ཙེ་ཨོ་ཕི་ཡའི་དཔལ་འབྱོར་འཕེལ་རྒྱས་དང་། ལས་ཞུགས་གོ་སྐབས་གཏོད་པ། མ་འཇོག་གི་ཡིད་དབང་འགུགས་པ་བཅས་ལ་ཕན་ཐོགས་ཡོད་པ་མ་ཟད། ཕྱོགས་གཉིས་པོས་ཐུན་མོང་ཐོག་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་མངོན་འགྱུར་བྱེད་པར་སྐུལ་འདེད་གཏོང་ཐུབ་པའི་ངོས་འཛིན་བྱེད་ཀྱི་ཡོད།