བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། གསར་འགོད་པར་རང་སྐྱོང་ལྗོངས་ནོར་སྲིད་ཐིང་ནས་ཤེས་རྟོགས་བྱུང་བར། 2011ལོའི་ཀྲུང་དབྱང་ཤེས་དཔལ་སྲོལ་གཏོད་གཞུང་དོན་ཁང་དང་། ནོར་སྲིད་པུའུ། སློབ་གསོ་པུའུ་བཅས་ཀྱིས་ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་བཏང་ནས་གྲོང་གསེབ་སློབ་གྲྭའི་བྱིས་པའི་ཕོ་བྲང་ལ་རྒྱབ་སྐྱོར་བྱེད་པའི་རྣམ་གྲངས་ལག་བསྟར་བྱས་ཚུན། བོད་ཀྱི་གྲོང་གསེབ་སློབ་གྲྭའི་བྱིས་པའི་ཕོ་བྲང་འཛུགས་སྐྲུན་ལ་ཕན་འབྲས་མངོན་གསལ་དོད་པོ་ཐོན་ནས་མིག་སྔར་ལྗོངས་ཡོངས་ཀྱི་རྫོང(ཆུས)74ཡི་ཤང་དང་གྲོང་རྡལ་685ལ་སྤྱིའི་ཆ་ནས་ཁྱབ་ཐུབ་པ་བྱུང་ཡོད།

2011ལོ་ནས་2024ལོ་བར་རིམ་རྩིས་བྱས་ན། རང་སྐྱོང་ལྗོངས་ནོར་སྲིད་ཀྱིས་ཀྲུང་དབྱང་གི་ཆེད་དོན་རྒྱན་ཤོག་གི་སྤྱི་ཕན་མ་དངུལ་སྒོར་དུང་ཕྱུར་1.9བཏང་ནས་གྲོང་གསེབ་ཀྱི་སློབ་གྲྭའི་བྱིས་པའི་ཕོ་བྲང་ལ་རྒྱབ་སྐྱོར་བྱས་པ་དང་། ལྗོངས་ཡོངས་ཀྱི་ཆ་རྐྱེན་དང་འཚམ་པའི་གྲོང་གསེབ་ཀྱི་སློབ་གྲྭའི་བྱིས་པའི་ཕོ་བྲང་671ལ་སྒྲིག་བཀོད་དང་སྒྲིག་ཆས་འཐུས་སྒོ་ཚང་དུ་གཏོང་བ་དང་། དགེ་རྒན་གསོ་སྦྱོང་བྱེད་པ། དེའི་འཁོར་སྐྱོད་བརྟན་པོ་ཡོང་བར་འགན་ལེན་བཅས་བྱེད་པར་རྒྱབ་སྐྱོར་བྱས་པ་དང་། རིམ་རྩིས་བརྒྱབ་ན་སློབ་མ་ཁྲི་95ལྷག་ཙམ་ལ་ཕན་པ་ཐོབ་ཡོད།

མ་དངུལ་རྒྱུན་མཐུད་གཏོང་བའི་འགན་ལེན་བརྟན་པོའི་འོག་2023ལོའི་ཟླ་9པ་ནས་12པའི་བར་རང་སྐྱོང་ལྗོངས་ཤེས་དཔལ་སྲོལ་གཏོད་གཞུང་དོན་ཁང་དང་། ནོར་སྲིད་ཐིང། སློབ་གསོ་ཐིང་བཅས་ཀྱིས་བརྟག་ཞིབ་གཏིང་ཟབ་བྱས་ནས་རང་སྐྱོང་ལྗོངས་རིམ་པའི་རྣམ་གྲངས་འཛུགས་སྐྲུན་གྱི་འཆར་གཞིར་ཞིབ་འཇུག་གྲོས་འདོན་བྱས་ཡོད། རང་སྐྱོང་ལྗོངས་ནོར་སྲིད་ཀྱིས་ཆེད་དོན་མ་དངུལ་སྒོར་ཁྲི་1095བཏང་ནས་གྲོང་གསེབ་ཀྱི་སློབ་གྲྭའི་བྱིས་པའི་ཕོ་བྲང་76བསྐྲུན་ཏེ་ཐག་རིང་ལུང་ཁུག་ས་ཁུལ་དུ་བྱིས་པའི་ཕོ་བྲང་མེད་པའི་སྟོང་ཆ་བསྐངས་ཡོད། 2024ལོའི་ཟླ་5པར་མ་དངུལ་དམིགས་སར་འབྱོར་བ་མ་ཟད། རིམ་པ་བཞི་པའི་མཉམ་འགུལ་ལྟ་སྐུལ་མཛུབ་ཁྲིད་བྱས་ནས་རྣམ་གྲངས་འཛུགས་སྐྲུན་དང་མ་དངུལ་བེད་སྤྱོད་ཚད་ལྡན་དང་ཕན་འབྲས་ཐོན་པའི་འགན་ལེན་བྱས་ཡོད།

ད་ཆ་བོད་ཀྱི་གྲོང་གསེབ་ཀྱི་སློབ་གྲྭའི་བྱིས་པའི་ཕོ་བྲང་གི་རྣམ་གྲངས་ལག་བསྟར་བྱས་པའི་སློབ་གྲྭ་ཁག་གིས་ཀུན་སྤྱོད་སློབ་གསོ་དང་། རིག་གནས། སྒྱུ་རྩལ། ལུས་རྩལ་སོགས་ཀྱི་སློབ་ཚན་མང་པོ་དང་ས་ཁོངས་དང་མི་རིགས་ཀྱི་ཁྱད་ཆོས་ལྡན་པའི་སྤུས་རྟགས་བྱེད་སྒོ་ཧུར་ཐག་སྤེལ་ནས་སློབ་མའི་སློབ་ཕྱིའི་འཚོ་བ་ཕུན་སུམ་ཚོགས་སུ་བཏང་སྟེ། སློབ་གྲྭ་དང་། ཁྱིམ་ཚང་། སྤྱི་ཚོགས་བཅས་ཀྱི་སློབ་གསོ་སྦྲེལ་མཐུད་ནུས་ལྡན་ཐུབ་རྒྱུར་སྐུལ་འདེད་བཏང་བ་དང་ཞིང་འབྲོག་ཁུལ་གྱི་སློབ་གསོའི་ཐོན་ཁུངས་ཀྱི་ཞན་ཆ་བསལ་བས་ས་གནས་དེ་གའི་དགེ་སློབ་དང་། ཁྱིམ་བདག ཞིང་འབྲོག་མང་ཚོགས་བཅས་ཀྱི་དགའ་བསུ་ཆེན་པོ་ཐོབ་ཡོད།