བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། གསར་འགོད་པར་2025ལོའི་བོད་རང་སྐྱོང་ལྗོངས་ཀྱི་བཟོ་ལས་ཁྱབ་ཁོངས་ཀྱི་ལྕགས་ལམ་སྐྱེལ་འདྲེན་འགན་སྲུང་གི་ཆེད་དོན་ཚོགས་འདུའི་ཐོག་ནས་ཤེས་རྟོགས་བྱུང་བར། ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིས་ཟོག་འདྲེན་ཟོག་འགྲེམས་ཐོན་རྫས་གསར་གཏོད་དང་། ཟོག་འགྲེམས་དངུལ་རྩའི་ཞབས་ཞུ་རྒྱ་སྐྱེད། ཟོག་འགྲེམས་ཁེ་ལས་ཀྱི་ཐོན་ཁུངས་བསྡུ་སྒྲིལ་དང་། དེ་བཞིན་ལྕགས་ལམ་འཛུགས་སྐྲུན་འཆར་འགོད་སོགས་འགག་རྩའི་ཁྱབ་ཁོངས་མང་པོའི་ཐད་རང་སྐྱོང་ལྗོངས་འཕེལ་སྒྱུར་ཨུ་ལྷན་དང་། ཚོང་དོན་ཐིང་། འགྲིམ་འགྲུལ་སྐྱེལ་འདྲེན་ཐིང་སོགས་སྡེ་ཚན་དང་ལས་རིགས་མཐུན་ཚོགས་དང་། བོད་ནང་ཁུལ་གྱི་ཐོན་སྐྱེད་དང་ཟོག་འགྲེམས་ཚོང་དོན་ཁེ་ལས་ཁག་30ཡི་འགན་འཁུར་བ། ནག་ཆུ་དང་། ཉིང་ཁྲི། ལྷོ་ཁ། གཞིས་རྩེ། མངའ་རིས་སོགས་ས་ཁུལ(གྲོང་ཁྱེར)གྱི་འབྲེལ་ཡོད་སྡེ་ཚན་གྱི་འགན་འཁུར་བ་བཅས་དང་གྲོས་བསྡུར་གཏིང་ཟབ་དང་བློ་བསྡུས་དགེ་འཚོལ་གྱིས་ཕྱོགས་མང་པོ་དང་མཐུན་སྦྱོར་ཧུར་ཐག་བྱས་པ་བརྒྱུད། ཁེ་ལས་ཀྱི་ཐོན་རྫས་སྐྱེལ་འདྲེན་བྱེད་རིང་འཕྲད་པའི་དཀའ་གནད་སྣ་ཚོགས་མཐུན་སྦྱོར་ཐག་གཅོད་བྱས་ཏེ། བོད་ཀྱི་ཕྱིར་གཏོང་ནང་འདྲེན་དངོས་ཟོག་གི་ལྕགས་ལམ་སྐྱེལ་འདྲེན་འགན་སྲུང་ནུས་པ་རྒྱུན་ཆད་མེད་པར་ཆེ་རུ་གཏོང་གང་ཐུབ་བྱེད་བཞིན་ཡོད།

ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིས་ས་མཐོའི་ལྕགས་ལམ་དེང་རབས་ཅན་གྱི་ཟོག་འགྲེམས་འཕེལ་རྒྱས་བརྒྱུད་རིམ་ཁྲོད་བཏོན་པའི་ཁྱད་ལྡན་ཐོན་རྫས་ཞབས་ཞུ་རབ་དང་རིམ་པ་ངོ་སྤྲོད་ཞིབ་ཕྲ་བྱས་པའི་ནང་། སྤྱོད་དུད་ཞབས་ཞུའི་སྙིང་ཉེའི་བྱེད་ཐབས་དང་། རྒྱལ་སྤྱིའི་མཉམ་འདྲེན་གྱི་སྟབས་བདེའི་བགྲོད་ལམ། ལྕགས་ལམ་གྱི་རིན་གོང་འགན་ལེན་དང་འགན་བཅོལ་གྱི་བློ་བདེ་འགན་ལེན་སོགས་ཕྱོགས་མང་པོའི་ཐད་ཀྱི་ནང་དོན་ཚུད་ཡོད།

ཤེས་རྟོགས་བྱུང་བར་གཞིགས་ན། ཉེ་ཆར། ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིས་བོད་ལྗོངས་པའེ་དབྱིན་རྒྱལ་སྤྱིའི་ཟོག་འགྲེམས་ཚད་ཡོད་ཀུང་སི་དང་བོད་ལྗོངས་ཙི་ཅིན་ཟོག་འགྲེམས་ཚད་ཡོད་ཀུང་སི་དང་མཉམ་ལས་འདོད་མཐུན་བཞག་ནས། ཕྱོགས་གཉིས་པོས་སྐྱེལ་འདྲེན་བྱེད་ཚད་ཏུན་ཁྲི་50ཟིན་པའི《སྐྱེལ་འདྲེན་ནུས་པ་དང་སྐྱེལ་འདྲེན་བྱེད་ཚད་ཕན་ཚུན་འགན་ལེན་གྱི་གན་རྒྱ》དང་སྐྱེལ་འདྲེན་བྱེད་ཚད་ཏུན་ཁྲི་45ཟིན་པའི《སྐྱེལ་འདྲེན་ནུས་པ་དང་སྐྱེལ་འདྲེན་བྱེད་ཚད་ཕན་ཚུན་འགན་ལེན་གྱི་གྲོས་མཐུན》ལ་མིང་རྟགས་སོ་སོར་བཀོད་པ་རེད།