ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་ཟླ་3ཚེས་14ཉིན་གློག་འཕྲིན་འབྱོར་གསལ། ཚེས་14ཉིན། པར་ཙིར་གྱི་འབོ་གསེར་རྒྱལ་ཁབ་ཀྱི་ལས་དོན་མཐུན་སྦྱོར་པ་དང་ཕྱི་འབྲེལ་པུའུ་ཀྲང་གཞོན་པ་ལི་ལི་ཨའོ་ཡིས་འབོ་གསེར་ལམ་སྲོལ་ནི་གོ་ལ་ཧྲིལ་པོའི་ལྷོ་ཕྱོགས་མཉམ་ལས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཡིན་པ་དང་འབོ་གསེར་མཉམ་ལས་ཀྱི་གྲུབ་འབྲས་དངོས་ཀྱིས་རྒྱ་ཆེའི་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ལ་ཕན་པ་ཐོབ་ཡོད་ཅེས་བརྗོད།

དེ་ཉིན་ལི་ལི་ཨའོ་ལི་གཡོད་རེ་ནེ་ལུའུ་ཕྱི་རྒྱལ་གསར་འགོད་པའི་མཐུན་ཚོགས་ཀྱིས་སྒྲིག་འཛུགས་བྱས་པའི་གསར་འགོད་པའི་དྲ་ཐོག་ཚོགས་འདུར་ཞུགས་ཤིང་། ཁོང་གིས་ཤིན་ཧྭ་གསར་འགྱུར་ཁང་གི་གསར་འགོད་པའི་དྲི་བར་ལན་རྒྱག་སྐབས། རྒྱ་ཆེར་བཏང་རྗེས་ཀྱི་འབོ་གསེར་རྒྱལ་ཁབ་ཀྱིས་མི་འབོར་དང་དཔལ་འབྱོར་སྤྱི་འབོར་སོགས་ཐད་གོ་ལ་ཧྲིལ་པོའི་ཁྱབ་ཁོངས་སུ་བསྡུར་ཚད་གལ་ཆེན་བཟུང་ཡོད་པ་དང་། འབོ་གསེར་ལམ་སྲོལ་གྱིས་གོ་ལ་ཧྲིལ་པོའི་བཅོས་སྐྱོང་འཐུས་སྒོ་ཚང་དུ་གཏོང་བའི་ཐད་ནུས་པ་གལ་ཆེན་འདོན་བཞིན་ཡོད། འབོ་གསེར་མཉམ་ལས་ཀྱི་གྲུབ་འབྲས་དངོས་མང་པོ་ཞིག་གིས་འབོ་གསེར་རྒྱལ་ཁབ་ལ་ཕན་པ་ཐོབ་རྒྱུ་མ་ཟད། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལའང་དགེ་མཚན་ལྡན་པའི་ཤུགས་རྐྱེན་ཐེབས་རྒྱུ་རེད་ཅེས་བརྗོད།

ལི་ལི་ཨའོ་ཡིས་འདི་ལོ་པར་ཙིར་གྱིས་འབོ་གསེར་རྒྱལ་ཁབ་ཀྱི་ཀྲུའུ་ཞིའི་རྒྱལ་ཁབ་ཀྱི་འགན་ཁུར་ནས་སྤྱི་པའི་འཕྲོད་བསྟེན་མ་ལག་ལེགས་སུ་གཏོང་བ་དང་། དཔལ་འབྱོར་གཞི་གཅིག་ཅན་ལ་སྐུལ་འདེད་གཏོང་བ། མི་ཐབས་རིག་ནུས་བཀོལ་སྤྱོད་ལ་སྐུལ་མ་གཏོང་བ་སོགས་སྔོན་ལ་སྤེལ་བའི་ལས་དོན་གྱི་གྲོས་གཞིར་བརྩི་གི་ཡིན་ཞེས་ནན་བཤད་བྱས་ཤིང་། ཁོང་གིས“འབོ་གསེར་རྒྱལ་ཁབ་ཀྱིས་ངེས་པར་དུ་ཞིབ་འཇུག་དང་གསར་གཏོད་ལ་སྐུལ་འདེད་བཏང་ནས་གོ་ལ་ཧྲིལ་པོའི་རང་བཞིན་གྱི་སྐྱོན་བྲལ་འགྲན་སློང་ལ་ཁ་གཏད་གཅོག་དགོས། འབོ་གསེར་རྒྱལ་ཁབ་ཀྱིས་ངེས་པར་དུ་མི་ཐབས་རིག་ནུས་དེ་འདྲ་མཉམ་མིན་པའི་རིགས་ཉུང་དུ་གཏོང་བའི་བྱེད་ཐབས་ཤིག་ཏུ་འགྱུར་བར་བྱེད་དགོས་པ་ལས། འདྲ་མཉམ་མིན་པའི་རིགས་ཇེ་སྡུག་ཏུ་གཏོང་བའི་རྒྱུ་རྐྱེན་ཞིག་ཏུ་འགྱུར་མི་རུང་བའི་འགན་ལེན་བྱེད་དགོས”ཞེས་བརྗོད།