ཤིན་ཧྭ་གསར་འགྱུར་ཁང་གྲོང་ཁྱེར་ཐེ་རི་ནི་ཏ་དང་ཐོ་པ་ཀོའི་ཁེ་ལང་ཅའོ་ནས་ཟླ་3ཚེས་15ཉིན་གློག་འཕྲིན་འབྱོར་གསལ། ཐེ་རི་ནི་ཏ་དང་ཐོ་པ་ཀོའི་ཙུང་ལི་ལུའོ་ལི་ཡིས་ཚེས་15ཉིན་ཐེ་རི་ནི་ཏ་དང་ཐོ་པ་ཀོས་མིག་སྔར་ཀྲུང་གོ་དང་སྤེལ་བཞིན་པའི་མཉམ་ལས་ལ་བློ་ཡིད་ཧ་ཅང་ཚིམ་པོ་བྱུང་ལ། འབྱུང་འགྱུར་མཉམ་ལས་ཐད་གོ་སྐབས་དེ་བས་མང་བ་ཐོབ་རྒྱུའི་རེ་སྒུག་ཀྱང་བྱེད་བཞིན་ཡོད་ཅེས་བརྗོད།

ལུའོ་ལི་ཡིས་ཉིན་དེར་ཐོ་པ་ཀོའི་གླིང་ཕྲན་གྱི་ལྷོ་ནུབ་རྒྱུད་ཀྱི་གྲོང་ཁྱེར་དང་གྲོང་རྡལ་ཁེ་ལང་ཅའོ་རུ་ཀྲུང་གོ་ལྕགས་ལམ་འཛུགས་སྐྲུན་རྒྱལ་སྤྱིའི་ཚོགས་པ་ཚད་ཡོད་ཀུང་སིས་སྐྲུན་འགན་འཁུར་བའི་ལུའོ་པིན་ཤུན་རྒྱལ་སྤྱིའི་གནམ་ཐང་གི་གནམ་ཐང་གསར་པའི་རྣམ་གྲངས་ལེགས་གྲུབ་མཛད་སྒོར་ཞུགས་སྐབས་གོང་གསལ་གྱི་སྐད་ཆ་དེ་བརྗོད་པ་རེད། ལུའོ་ལི་ཡིས་ཤིན་ཧྭ་གསར་འགྱུར་ཁང་གི་གསར་འགོད་པའི་བཅར་འདྲི་དང་ལེན་གནང་སྐབས། ཐེ་རི་ནི་ཏ་དང་ཐོ་པ་ཀོ་ནི་ཀྲུང་གོ་དང“རྒྱུད་གཅིག་ལམ་གཅིག”མཉམ་སྐྲུན་གྱི་བསམ་ཤེས་དྲན་ཐོར་མིང་རྟགས་བཀོད་མཁན་སྔ་ཤོས་ཡིན་པའི་ཅ་ལེ་པིའི་རྒྱལ་ཁབ་ཀྱི་གྲས་ཤིག་ཡིན་པས། ཐེ་རི་ནི་ཏ་དང་ཐོ་པ་ཀོ་ཡིས་གྲོས་འགོ་དེའི་དོན་སྙིང་ལ་གོ་བ་གཏིང་ཟབ་བླངས་ཐུབ་པ་བྱུང་ལ། དེའི་ཁྲོད་ནས་ཕན་པ་ཐོབ་ཡོད་ཅེས་བརྗོད།

ལུའོ་ལི་ཡིས་ཤིས་ཚིག་སྒྲོན་སྐབས་ད་དུང་གནམ་ཐང་དེའི་སྔོན་ཐོན་སྒྲིག་ཆས་ལ་བསྔགས་བརྗོད་གནང་ཞིང་། ཁོང་གིས་རྣམ་གྲངས་དེ་དངོས་སུ་གཉེར་སྐྱོང་བྱས་རྗེས་གནམ་ཐང་གིས་ལོར་འགྲུལ་པ་སྐྱེལ་འདྲེན་བྱེད་ཚད་མི་ཐེངས་ཁྲི་300ཟིན་ནས་ཐེ་རི་ནི་ཏ་དང་ཐོ་པ་ཀོའི་མི་མང་པོར་ཕན་པ་ཐོབ་རྒྱུ་རེད་ཅེས་བརྗོད།

ལྕགས་ལམ་འཛུགས་སྐྲུན་གྱི་རྒྱལ་སྤྱིའི་ཏུང་ཧྲི་ཀྲང་ལི་ཁྲུང་དབྱང་གིས་གསར་འགོད་པར། རྣམ་གྲངས་ལག་བསྟར་བྱེད་པའི་བརྒྱུད་རིམ་ཁྲོད་ལྕགས་ལམ་འཛུགས་སྐྲུན་རྒྱལ་སྤྱིས་ས་གནས་དེ་གའི་ཁག་བགོས་འགན་གཙང་ཚོང་པ་དང་མཁོ་སྤྲོད་ཚོང་པ་60ཙམ་དང་མཉམ་ལས་བྱས་པ་དང་ཨར་ལས་བྱེད་པའི་དུས་ཚོད་ཡག་ཤོས་སུ་ས་གནས་དེ་གའི་ལས་མི་600ཙམ་བསྡུས་ནས་ས་གནས་དེར་ལས་ཞུགས་གོ་སྐབས་བཏོད་པ་དང་འབྲེལ་ལག་རྩལ་བཟོ་པ་ཁག་གཅིག་གསོ་སྐྱོང་ཡང་བྱས་ཡོད་ཅེས་བརྗོད།