དུས་རབས་གསར་པ་ཚུན། ཀྲུང་གོས་རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི་འདུ་ཤེས་མཐའ་འཁྱོངས་བྱས་ཏེ་སྐྱེ་ཁམས་སྔོན་ལ་འཇོག་པ་དང་ལྗང་མདོག་གི་འཕེལ་རྒྱས་ལམ་བུར་བློ་བརྟན་འགྱུར་མེད་ངང་བསྐྱོད་ཡོད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་རྒྱལ་སྤྱིའི་མི་སྣས་ཀྲུང་གོས་རང་རྒྱལ་ཁབ་ལ་དཔལ་འབྱོར་འཕེལ་རྒྱས་དང་ཁོར་ཡུག་སྲུང་སྐྱོང་མཐུན་སྦྱོར་མཉམ་སྤེལ་བྱེད་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུ་ཞིག་འཚོལ་ཞིབ་བྱས་པ་མ་ཟད། གོ་ལ་ཧྲིལ་པོའི་ཁོར་ཡུག་བཅོས་སྐྱོང་དང་ལྗང་མདོག་ཕྱོགས་སྒྱུར་ལ་ཀྲུང་གོའི་བློ་གྲོས་དང་ཀྲུང་གོའི་སྟོབས་ཤུགས་ཀྱང་ལེགས་སྐྱེས་སུ་ཕུལ་བའི་ངོས་འཛིན་བྱས་པ་རེད།

“ཀྲུང་གོས་ལྗང་མདོག་འཕེལ་རྒྱས་ཁྱབ་ཁོངས་སུ་འབད་བརྩོན་ལྷོད་མེད་བྱས་པར་དངོས་དངོས་རྗེན་རྗེན་གྱི་གྲུབ་འབྲས་ཐོབ་པ”

ཉེ་བའི་ལོ་ཤས་རིང་། ཀྲུང་གོས་གནད་སྨིན་ངང་སྦགས་བཙོག་འགོག་བཅོས་དང་། ཚན་རིག་དང་མཐུན་པའི་ངང་སྦགས་བཙོག་འགོག་བཅོས། ཁྲིམས་ལྟར་སྦགས་བཙོག་འགོག་བཅོས་བཅས་མཐའ་འཁྱོངས་བྱས་ཏེ་སྐྱེ་ཁམས་ཁོར་ཡུག་རྒྱུན་མཐུད་ལེགས་སུ་གཏོང་བ་དང་། ཕྱོགས་ཡོངས་ནས་ལེགས་སུ་གཏོང་བ། རྩ་བའི་ཆ་ནས་ལེགས་སུ་གཏོང་བ་བཅས་ལ་སྐུལ་འདེད་ཤུགས་ཆེན་བཏང་བས། མཛེས་སྡུག་ལྡན་པའི་ཀྲུང་གོའི་རྣམ་པ་ཞིག་རིམ་བཞིན་གྲུབ་ཡོད་པ་རེད།

རུའེ་ཝུའུ་ཧྥུང་གིས་ཧྲང་ཧའེ་རུ་བཅའ་སྡོད་འཇར་མན་གྱི་སྤྱི་ཁྱབ་ཁེ་སྐྱོང་བའི་འགན་ཐེངས་གཉིས་འཁུར་བ་དང་ཀྲུང་གོར་ལས་ཀ་བྱེད་པ་དང་འཚོ་བ་བསྐྱལ་ནས་ལོ་20ལྷག་ཙམ་སོང་རིང་ཀྲུང་གོའི་གྲོང་ཁྱེར་གྱི་ལྗང་མདོག་འཕོ་འགྱུར་ལ་དཔང་པོ་བྱས་ཡོད། “ང་ལྷ་སར་འགྲོ་མྱོང་ཡོད། ལྷ་སའི་གཡའ་དག་པའི་ནམ་མཁས་ང་རང་ལ་བག་ཆགས་ཟབ་མོ་བཞག་བྱུང” རུའེ་ཝུའུ་ཧྥུང་གིས་འཇར་མན་དང་ཀྲུང་གོས་སྐྱེ་ཁམས་ཁོར་ཡུག་སྲུང་སྐྱོང་ཁྱབ་ཁོངས་ཀྱི་མཉམ་ལས་ལ་སྔར་བས་ཤུགས་སྣོན་བརྒྱབ་ནས་གནམ་གཤིས་འགྱུར་ལྡོག་གི་འགྲན་སློང་ལ་ལག་གདང་སྦྲེལ་ནས་ཁ་གཏད་གཅོག་རྒྱུའི་རེ་བ་ཡོད་ཅེས་བརྗོད་པ་རེད།

ཀྲུང་གོར་ལོ་མང་འཚོ་བ་སྐྱེལ་མྱོང་བའི་སོ་ཏི་ཨ་རབ་རི་ཡ་ཏེའི་ཆབ་སྲིད་དང་འཐབ་ཇུས་ཞིབ་འཇུག་ལྟེ་གནས་ཀྱི་ཞིབ་འཇུག་པ་ཨ་པུའུ་ཏུའུ་ལེ·ཨ་ཆི་ཚི·ཧྲ་པ་ཉི་ཡིས“སྔོ་ལྗང་གིས་རབ་ཏུ་བརྒྱན་པའི་མེ་ཏོག་ལྡུམ་ར་མང་པོ་ཡོད་པ་དེས་གྲོང་ཁྱེར་དེ་བས་མཛེས་པར་བྱས་ཤིང་། ཀྲུང་གོས་ལྗང་མདོག་འཕེལ་རྒྱས་ཁྱབ་ཁོངས་སུ་འབད་བརྩོན་ལྷོད་མེད་བྱས་པར་དངོས་དངོས་རྗེན་རྗེན་གྱི་གྲུབ་འབྲས་ཐོབ་ཡོད། ལྗང་མདོག་ལག་རྩལ་འཕེལ་རྒྱས་ཤུགས་ཆེན་བཏང་ནས་ལྗང་མདོག་ཕྱོགས་སྒྱུར་བྱས་པ་བརྒྱུད་དཔལ་འབྱོར་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་ནས། ཀྲུང་གོ་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ཀྱི་དཔེ་མཚོན་ཞིག་ཏུ་འགྱུར་བཞིན་ཡོད”ཅེས་བརྗོད་པ་རེད།

“གོ་ལ་ཧྲིལ་པོའི་སྐྱེ་ཁམས་བཅོས་སྐྱོང་ནང་ཧུར་ཐག་ཞུགས་ནས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ཀྲུང་གོའི་བློ་གྲོས་དང་ཇུས་གཞི་ལེགས་སྐྱེས་སུ་ཕུལ་བ”

དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལྗང་མདོག་ཅན་དང་ཐཱན་ཉུང་ཅན་ལ་སྐུལ་འདེད་གཏོང་རྒྱུ་ནི་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པའི་འགག་རྩའི་ལྷུ་ཚིགས་ཤིག་ཡིན། རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི་འདུ་ཤེས་ཀྲུང་གོའི་མི་སེམས་སུ་གཏིང་ཟབ་ཟུག་པ་མ་ཟད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་འཛམ་གླིང་དུ་ཕྱོགས་པ་དང་བསྟུན་ནས་གསོན་ཉམས་དོད་ཅིང་ཞིབ་ཕྲའི་ལག་ལེན་གྱི་གྲུབ་འབྲས་ཀྱང་ཐོབ་ཡོད།

སི་རི་ལན་ཁའི་ཁུ་ལུན་ཕོ་གྲུ་ཁའི་གྲོང་གི་རྣམ་གྲངས་ཀྱི་རླབས་འགོག་ཆུ་རགས་ཐོག་རང་བྱུང་བྱུ་རུ་འབོར་ཆེན་སྐྱེ་འཚར་དང་ཉ་རིགས་སྣ་ཚོགས་ཀྱིས་བྱུ་རུའི་འགྲམ་དུ་ཟས་འཚོལ་བཞིན་ཡོད། “སི་ཀྲུང་རྒྱལ་ཁབ་གཉིས་ཀྱིས་མཉམ་དུ་བསྐྲུན་པའི་ཁུ་ལུན་ཕོ་གྲུ་ཁའི་གྲོང་གི་རྣམ་གྲངས་ཀྱིས་འཛུགས་སྐྲུན་དང་གཉེར་སྐྱོང་བྱེད་རིང་ཁོར་ཡུག་རྒྱུན་མཐུད་ཆོག་པའི་རང་བཞིན་ལ་ཚད་མཐོའི་མཐོང་ཆེན་བྱེད་ཀྱི་ཡོད། དེའི་ནང་བྱེད་ཐབས་གལ་ཆེན་ཞིག་ནི་གྲུ་ཁའི་གྲོང་གི་མིས་བཟོས་གཙང་པོ་བསྐྲུན་ནས་རང་བྱུང་གི་བྱ་ཐབས་བརྒྱུད་གྲོང་ཁྱེར་གྱི་ཆུ་དྭངས་གཙང་ཡོང་བ་བྱ་རྒྱུ་དེ་ཡིན”ཞེས་ཁུ་ལུན་ཕོ་གྲུ་ཁའི་གྲོང་གི་རྣམ་གྲངས་ཀྱི་གློག་རླངས་ལག་རྩལ་ཆེ་མོ་བ་དང་བློ་འདྲི་བ་སང་ཅི་ཝས་བརྗོད། སང་ཅི་ཝ་དུས་རབས་གོང་མའི་ལོ་རབས་80པར་ཀྲུང་གོར་སློབ་སྦྱོང་བྱེད་པར་ཡོང་མྱོང་བ་དང་། 2017ལོ་དང་2022ལོར་ཀྲུང་གོའི་བྱེད་སྒོར་ཐེངས་གཉིས་ཞུགས་ནས་ཀྲུང་གོའི་ལྗང་མདོག་འཕེལ་རྒྱས་ལ་ཐོབ་པའི་གྲུབ་འབྲས་ལ་དཔང་པོ་བྱས་ཡོད། “ཀྲུང་གོས་རང་རྒྱལ་ཁབ་ཀྱི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་བར་ཕན་འབྲས་མངོན་གསལ་དོད་པོ་ཐོབ་པ་མ་ཟད། ད་དུང་གོ་ལ་ཧྲིལ་པོའི་སྐྱེ་ཁམས་བཅོས་སྐྱོང་ནང་ཧུར་ཐག་ཞུགས་ནས་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ཀྲུང་གོའི་བློ་གྲོས་དང་ཇུས་གཞི་ལེགས་སྐྱེས་སུ་ཕུལ་ཡོད། རི་སྔོན་ཆུ་དྭངས་གསེར་རི་དངུལ་རི་ལས་ལྷག་པའི་འདུ་ཤེས་དེ་ཁུ་ལུན་ཕོ་གྲུ་ཁའི་གྲོང་གི་རྣམ་གྲངས་ནང་ལག་ལེན་ཧུར་ཐག་བསྟར་ཡོད”

“‘རྒྱུད་གཅིག་ལམ་གཅིག’མཉམ་སྐྲུན་གྱི་གྲོས་འགོས་གོ་ལ་ཧྲིལ་པོའི་ལྗང་མདོག་རྣམ་གྲངས་མང་པོ་ལག་བསྟར་བྱེད་པར་སྐུལ་ཁྲིད་བྱས་པ་མ་ཟད། མཉམ་སྐྲུན་རྒྱལ་ཁབ་ཀྱི་ལྗང་མདོག་ཐོན་ལས་འཕེལ་རྒྱས་ལ་སྐུལ་ཁྲིད་ཀྱང་བྱས་ཡོད”

ལྗང་མདོག་ཕྱོགས་སྒྱུར་འཕེལ་རྒྱས་ཀྱི་བགྲོད་ལམ་ཐོག་ཀྲུང་གོ་ནི་ཐོག་མཐའ་བར་གསུམ་དུ་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་ལམ་རོགས་པ་ཞིག་ཡིན།

སྐྱེ་དངོས་སྣ་མང་རང་བཞིན་ལ་གཏོར་སྐྱོན་ཕོག་པ་དང་། ཐང་རྒོད་ཅན་དུ་གྱུར་པ། གནམ་གཤིས་འགྱུར་ལྡོག་ཆེ་བ་སོགས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་ཆེད། ཀྲུང་གོའི་བྱ་སྤྱོད་ལས་རྒྱལ་ཁབ་ཆེན་པོའི་འགན་འཁྲི་མངོན་ཡོད། “རྒྱུད་གཅིག་ལམ་གཅིག”ལྗང་མདོག་འཕེལ་རྒྱས་ཀྱི་རྒྱལ་སྤྱིའི་མནའ་འབྲེལ་འཛུགས་རྒྱུར་སྐུལ་འདེད་བཏང་བ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་42དང་གནམ་གཤིས་འགྱུར་ལྡོག་གི་ལྷོ་ལྷོ་མཉམ་ལས་ཀྱི་བསམ་ཤེས་དྲན་ཐོ་53ལ་མིང་རྟགས་བཀོད་པ། གནམ་གཤིས་འགྱུར་ལྡོག་ཆུང་དུ་གཏོང་བ་དང་དེ་དང་འཚམ་པའི་རྣམ་གྲངས་ལག་བསྟར་བྱས་པ་སོགས། ཀྲུང་གོས་རྒྱལ་ཁབ་ཁག་དང་ལག་གདང་སྦྲེལ་ནས་གནམ་གཤིས་འགྱུར་ལྡོག་ལ་ཁ་གཏད་བཅག་ཡོད། 2022ལོའི་ཟླ་12པར། མཉམ་འབྲེལ་རྒྱལ་ཚོགས་ཀྱི《སྐྱེ་དངོས་སྣ་མང་རང་བཞིན་གྱི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་བཅོ་ལྔ་པར་ཀྲུང་གོས་སྔོན་ལ་མི་དམངས་ཤོག་སྒོར་དུང་ཕྱུར་15བཏང་ནས་ཁུན་མིང་སྐྱེ་དངོས་སྣ་མང་རང་བཞིན་གྱི་ཐེབས་རྩ་བཙུགས་པ་དང་། 2024ལོའི་ཟླ་10པར། མཉམ་འབྲེལ་རྒྱལ་ཚོགས་ཀྱི《སྐྱེ་དངོས་སྣ་མང་རང་བཞིན་གྱི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་བཅུ་དྲུག་པའི་རིང་ཁུན་མིང་སྐྱེ་དངོས་སྣ་མང་རང་བཞིན་གྱི་ཐེབས་རྩས་རྒྱབ་སྐྱོར་བྱས་པའི་ཁག་དང་པོའི་གྲངས་འབོར་ཉུང་བའི་རྣམ་གྲངས་9ལ་གྲོས་འཆམ་བྱུང་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་སྐྱེ་དངོས་སྣ་མང་རང་བཞིན་གྱི་སྲུང་སྐྱོང་བྱ་གཞག་ལ་རྒྱབ་སྐྱོར་བྱས་ཏེ། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་པར་སྟོབས་ཤུགས་ལེགས་སྐྱེས་སུ་ཕུལ་ཡོད།

མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཞོན་པ་ཟུར་པ་ཨའེ་ལི་ཁེ·སོར་ཧའེ་མུའུ་ཡིས“‘རྒྱུད་གཅིག་ལམ་གཅིག’མཉམ་སྐྲུན་གྱི་གྲོས་འགོས། གོ་ལ་ཧྲིལ་པོའི་ལྗང་མདོག་རྣམ་གྲངས་མང་པོ་ལག་བསྟར་བྱེད་པར་སྐུལ་ཁྲིད་བྱས་པ་མ་ཟད། མཉམ་སྐྲུན་རྒྱལ་ཁབ་ཀྱི་ལྗང་མདོག་ཐོན་ལས་འཕེལ་རྒྱས་ལ་སྐུལ་ཁྲིད་ཀྱང་བྱས་ཡོད”ཅེས་བརྗོད་པ་རེད།