འདི་ནི་ཡུན་ནན་ཞིང་ཆེན་ཤོན་ཝུའེ་གྲོང་ཁྱེར་ཕུའུ་ལིས་ཤང་ཉི་ཀྲུའུ་ཧོ་གྲོང་ཚོའི་སློབ་ཆུང་སློབ་མ་ཚོས་མཁའ་དབྱིངས་ཀྱི་འབྲེང་འཁོར་བསྡད་ནས་སློབ་གྲྭར་སྐྱོད་པ།

ཟླ་2ཚེས་23ཉིན་ནི་ཡུན་ནན་ཞིང་ཆེན་ཤོན་ཝུའེ་གྲོང་ཁྱེར་ཕུའུ་ལིས་ཤང་ཀོན་ཀྲའེ་ཆ་ཚང་སློབ་ཆུང་གི་འབྱོར་ཐོ་འགོད་པའི་ཉིན་མོ་ཡིན་ཞིང་། ཉི་ཀྲུའུ་ཧོ་གྲོང་ཚོར་སྡོད་མཁན་སློབ་ཆུང་སློབ་མ་ཚོ་གཅིག་ཏུ་འཛོམས་ཏེ་ཉིན་བཅུ་ཡི་གྱོན་གོས་བསྡུ་གསོག་བརྒྱབ་པ་དང་དཔེ་ཁུག་འཁུར་ཏེ་སློབ་གྲྭར་འབྱོར་ཐོ་བཀོད་པར་སྐྱོད། སློབ་ཆུང་སློབ་མ་གཞན་དག་དང་མི་འདྲར་ཁོང་ཚོ་ནི“མཁའ་དབྱིངས་ཀྱི་སློབ་འཁོར”བསྡད་ནས་སློབ་གྲྭར་སྐྱོད་ཀྱི་ཡོད། ཉི་ཀྲུའུ་ཧོ་གྲོང་ཚོ་ནི་གྲོག་རོང་དུ་ཆགས་པའི་རི་གྲོང་ཆུང་ཆུང་ཞིག་ཡིན་པ་དང་གྲོང་ཚོའི་ཉེ་འཁོར་གྱི་ཉི་ཀྲུའུ་གཙང་པོ་ནི་གྲོག་རོང་གི་ལྷོ་ནས་བྱང་དུ་གྱ་གྱུའི་ངང་རྒྱུག དེའི་གཞོགས་གཅིག་ནི་ཡུན་ནན་ཤོན་ཝུའེ་ཡིན་པ་དང་གཞོགས་གཞན་ཞིག་ནི་ཀུའེ་ཀྲོའུ་ལིའུ་ཕན་ཧྲུའེ་ཡིན་པ་རེད། དེ་གོང་ལུང་ཤུར་དུ་སྡོད་མཁན་གྲོང་མི་རོང་ས་ནས་རི་རྩེར་འགྲོ་བའི་ལམ་ཉེ་ཤོས་ནི་རོང་སའི་ཁྲོད་ཀྱི་གཡང་གཟར་ལམ་བུ་དེ་རེད། རི་མཐོ་གཡང་གཟར་ཡིན་པས་ལམ་བར་དུ་ཕར་འགྲོ་ཚུར་འོང་བྱེད་ཐེངས་རེར་ཆུ་ཚོད་6ཙམ་འགོར་གྱི་ཡོད། སློབ་གྲྭར་སྐྱོད་ཆེད་གྲོང་ཚོའི་ཕྲུ་གུ་དང་ཁྱིམ་བདག་ཚོས་ཉིན་10རེར་ཉུང་མཐར་ཡང་ལམ་དེར་ཐེངས་རེ་འགྲོ་དགོས་ཀྱི་ཡོད། 2022ལོར“རི་མཐོ་བ་དང་། རོང་ཟབ་པ། གཡང་གཟར་བ”བཅས་ཀྱི་སློབ་གྲྭར་སྐྱོད་སའི་ལམ་ལ་འགྱུར་ལྡོག་བྱུང་ཞིང་། ས་གནས་དེ་གའི་ཉི་ཀྲུའུ་གཙང་པོའི་གྲོག་རོང་ཆེ་མོའི་སྐྱེ་ཁམས་རིག་གནས་ཡུལ་སྐོར་མཛེས་ལྗོངས་ཁུལ་དངོས་སུ་བསྐྲུན་ནས་གཉེར་སྐྱོང་བྱས་ཏེ། མཐོ་ཚད་ལ་སྨི་268ཡོད་པའི་གློག་སྐས་དང་མཐོ་དམན་ཁྱད་པར་ལ་སྨི་200ཙམ་ཆོད་པའི་མཁའ་དབྱིངས་ཀྱི་འབྲེང་འཁོར་དངོས་སུ་སྤྱོད་འགོ་ཚུགས་པ་དང་ཆབས་ཅིག ཉི་ཀྲུའུ་ཧོ་གྲོང་ཚོ་དང་དེ་བཞིན་ཉེ་འགྲམ་གྱི་གྲོང་མིར་རིན་མེད་ངང་སྒོ་ཕྱེ་ནས་ཕྲུ་གུ་ཚོ་སློབ་གྲྭར་སྐྱོད་པར་རི་རྩེར་སླེབས་ཐུབ་པའི“འབྲེང་འཁོར”མཁོ་འདོན་བྱས་ཡོད། ལྷོ་ཕྱོགས་གློག་དྲ་ཡུན་ནན་ཆུས་ཅིང་གློག་འདོན་ཅུས་ཀྱིས་ད་དུང་གློག་སྐས་ལ་གློག་ཁུངས་གཉིས་ཀྱི་གློག་མཁོ་འདོན་བྱས་ནས“མཁའ་དབྱིངས་ཀྱི་སློབ་འཁོར”ལོ་ཧྲིལ་པོར་རྒྱུན་གཏན་ལྟར་འཁོར་སྐྱོད་ཐུབ་པའི་འགན་ལེན་བྱས་ཡོད། ད་ཆ་ས་གནས་དེ་གའི་ཕྲུ་གུ་ཚོས་སྔོན་ལ་སྐར་མ་དྲུག་བདུན་ཙམ་འགོར་བའི་ལྗོངས་གཟིགས་རླངས་འཁོར་ལ་སྡོད་པ་དང་། དེ་ནས་ལྗོངས་གཟིགས་གློག་སྐས་བསྡད་དེ་སྨི་268ཡར་འཕགས་རྗེས། སྨི་200ཙམ་གྱི“འབྲེང་འཁོར”ལ་བསྡད་ནས་བསྐྱོད་མཐར་གོམ་པ་སྐར་མ་ཁ་ཤས་བརྒྱབ་པ་ན་སློབ་གྲྭར་སླེབས་ཀྱི་ཡོད། ལམ་ཧྲིལ་པོར་ཆུ་ཚོད་ཕྱེད་ཀ་ལས་འགྲོ་དགོས་ཀྱི་མེད།

（ཤིན་ཧྭ་གསར་འགྱུར་ཁང་གི་གསར་འགོད་པ། ཅང་ཝུན་ཡའོ་ཡིས་པར་བླངས）