ཅིང་ཅིན་ཅིའི་འཛད་སྤྱོད་པའི་མཐུན་ཚོགས་རྩ་འཛུགས་ཀྱིས་དྲ་བ་ནས་ཚོང་ཟོག་ཉོ་སྐབས་ཡིད་གཟབ་བྱེད་དགོས་པའི་གནད་དོན་ཁྱབ་བསྒྲགས་བྱས་པ།
ཤིན་ཧྭ་གསར་འགྱུར་ཁང་ཐེན་ཅིན་ནས་ཟླ་3ཚེས་14ཉིན་གློག་འཕྲིན་འབྱོར་གསལ། དྲ་བ་ནས་ཚོང་ཟོག་ཉོ་སྒྲུབ་ནི་འཛད་སྤྱོད་པའི་རྒྱུན་གཏན་གྱི་འཛད་སྤྱོད་བྱེད་སྟངས་གལ་ཆེན་ཞིག་ཏུ་གྱུར་ཞིང་། འཛད་སྤྱོད་པས་ཚན་རིག་དང་མཐུན་པར་ཉོ་བ་དང་མགོ་སྐོར་འོག་མི་ཚུད་པར་ཁྲིད་སྟོན་བྱ་ཆེད། ཉེ་ཆར། པེ་ཅིང་གྲོང་ཁྱེར་འཛད་སྤྱོད་པའི་མཐུན་ཚོགས་དང་། ཐེན་ཅིན་གྲོང་ཁྱེར་འཛད་སྤྱོད་པའི་མཐུན་ཚོགས། ཧོ་པེ་ཞིང་ཆེན་འཛད་སྤྱོད་པའི་ཁེ་དབང་སྲུང་སྐྱོང་ཨུ་ལྷན་བཅས་ཀྱིས་མཉམ་འབྲེལ་ཐོག་དྲ་བ་ནས་ཚོང་ཟོག་ཉོ་སྐབས་ཡིད་གཟབ་བྱེད་དགོས་པའི་གནད་དོན་ཁྱབ་བསྒྲགས་བྱས་པ་མ་ཟད། དྲ་ཚོང་ལས་སྟེགས་གདམ་ག་དང་། གཏོང་སྤྲོད་བདེ་འཇགས། ཉོས་རྗེས་ཀྱི་ཁེ་དབང་སྲུང་སྐྱོང་སོགས་ཀྱི་ལྷུ་ཚིགས་ཐད་གྲོས་འགོ་བཏོན་ཏེ་འཛད་སྤྱོད་པར་ཁེ་དབང་སྲུང་སྐྱོང་བྱེད་རོགས་བྱས་ཡོད།
ས་གནས་གསུམ་གྱི་འཛད་སྤྱོད་པའི་མཐུན་ཚོགས་རྩ་འཛུགས་ཀྱིས་དྲན་སྐུལ་བྱས་དོན། ཚོང་ཟོག་མ་ཉོས་གོང་འཛད་སྤྱོད་པས་སྔོན་ལ་གཉེར་སྐྱོང་གི་འོས་ཚད་ཆ་ཚང་བ་དང་ཉོས་རྗེས་ཀྱི་ཞབས་ཞུ་འཐུས་སྒོ་ཚང་བའི་དྲ་ཚོང་ལས་སྟེགས་ཆེ་གྲས་འདེམས་པ་ལས། ཆ་རྒྱུས་མེད་པའི་སྦྲེལ་མཐུད་དང་། ཧོབ་ཐོན་བརྡ་ཁྱབ་བམ་ཡང་ན་མི་སྒེར་གྱི་འབྲེལ་འདྲིས་ཨང་གྲངས་ནས་ཉོ་ཚོང་མི་བྱེད་པ་དང་། “མགོ་སྐོར་བསླུ་བྲིད་ཀྱི་དྲ་ཚིགས”ལ་དོཌ་ཟོན་བྱེད་དགོས། འཛད་སྤྱོད་པས“ཐོག་མའི་རིན་གོང་རྫུན་བཟོ”དང“ཕབ་ཆ་རྫུན་མ”སོགས་ཀྱི་བསླུ་ཐབས་ལ་དོགས་ཟོན་བྱེད་པ་དང་། རིན་གོང་བསྡུར་བྱེད་ཡོ་བྱད་ནས་རིན་གོང་བསྡུར་ཏེ“ཁེ་གོང་རྫུན་མའི”མགོ་སྐོར་འོག་མི་ཚུད་པ་བྱེད་དགོས། ད་དུང“དྲ་ཐོག་གྲགས་ཅན་གྱི་འོས་སྦྱོར”དང“ཚད་ཡོད་ཀྱི་ཚོང་ཟོག་མགྱོགས་མྱུར་ཉོ་བ”སོགས་ཀྱི་ཚོང་གཉེར་བྱེད་སྟངས་ལ་ཡིད་གཟབ་བྱས་ཏེ་མགོ་སྐོར་འོག་མི་ཚུད་པར་བྱེད་དགོས།
འཛད་སྤྱོད་པས་སྔོན་ལ“ཉིན་བདུན་ནང་རྒྱུ་མཚན་མེད་པར་ཕྱིར་སློག”ཆོག་པའི་ཚོང་ཟོག་འདེམས་པ་དང་། ཚོང་ཟོག་གི་ཚད་གཞི་དང་། རྒྱུ་ཆ། སྤུས་ཚད་འགན་ལེན་དུས་ཚོད། ཉོས་རྗེས་ཀྱི་ཞབས་ཞུའི་དོན་ཚན་སོགས་ཆ་འཕྲིན་ལ་ལྟ་དགོས། ཉོ་མཁན་གྱི་གདེང་འཇོག་ལ་ལྟ་བའི་གོམས་གཤིས་འཇགས་པར་བྱས་ནས“བཙོངས་དངུལ་རྫུན་སྒྲོག”གི་གདེང་འཇོག་རྫུན་མར་དོགས་ཟོན་བྱེད་དགོས།
ས་གནས་གསུམ་གྱི་འཛད་སྤྱོད་པའི་མཐུན་ཚོགས་རྩ་འཛུགས་ཀྱིས་དྲན་སྐུལ་བྱས་དོན། ཚོང་ཟོག་ཉོ་སྐབས་འཛད་སྤྱོད་པས་གཏོང་སྤྲོད་བྱེད་ཐབས་ཀྱི་ཉེན་ཁར་དོགས་ཟོན་བྱས་ནས། སྔོན་ལ་ལས་སྟེགས་ཀྱི་གཞུང་ཕྱོགས་གཏོང་སྤྲོད་ཡོ་བྱད་སྤྱད་དེ་དངུལ་སྤྲོད་པ་ལས། ལྐོག་ཏུ་དངུལ་བསྒྱུར་བའམ་ཡང་ན་རྩ་གཉིས་ཨང་རྟགས་བཤེར་ཏེ་དངུལ་སྤྲོད་མི་རུང་། “ཚོང་ཞབས་ཅིང་ལིས”ཁ་པར་ནས་དངུལ་ཕྱིར་སློག་དང་སྐད་འཕྲིན་བསྣན་ཏེ་ཉོ་ཚོང་བྱེད་པ་སོགས་ཀྱི་རེ་བ་འདོན་སྐབས་ཡིད་ཆེས་བྱེད་མི་རུང་། གོང་ཆེ་བའི་ཚོང་ཟོག་ཉོ་སྐབས། ཚོང་ཟོག་གི་དྲ་ངོས་ཀྱི་བཅད་པར་དང་། གླེང་མོལ་ཟིན་ཐོ། མངགས་ཐོའི་གནས་ཚུལ་ཞིབ་ཕྲ། གཏོང་སྤྲོད་དཔང་ཡིག་བཅས་དང་། དེ་བཞིན་ཟོག་འགྲེམས་ཀྱི་ཆ་འཕྲིན་ཉར་ཚགས་བྱེད་པའི་གོམས་གཤིས་འཇགས་པར་བྱེད་དགོས་པ་དང་། འཛིན་ཤོག་གམ་ཡང་ན་དྲ་ཐོག་ཉོ་ཚོང་དཔང་ཡིག་ལེན་པ་མ་ཟད་ཉར་ཚགས་ཀྱང་ཡག་པོ་བྱས་ཏེ་ཁེ་དབང་སྲུང་སྐྱོང་བྱེད་པར་སྟབས་བདེ་ཡོང་བར་བྱེད་དགོས།
ཚོང་ཟོག་ལེན་སྐབས། འཛད་སྤྱོད་པས་བྱུང་ཐོ་མ་བཀོད་སྔོན་ལ་དངོས་ཟོག་གི་ཕྱི་ཐུམ་དང་། གྲངས་ཚད། བྱེད་ནུས་བཅས་ཆ་ཚང་མིན་ལ་ཞིབ་བཤེར་ཡག་པོ་བྱེད་དགོས་པ་དང་། གལ་ཏེ་ཚོང་ཟོག་ལ་ཆག་སྐྱོན་བྱུང་བའམ་ཡང་ན་མངགས་པའི་ཚོང་ཟོག་དང་གཅིག་པ་མིན་ཚེ་རྩིས་མི་ལེན་པ་དང་། པར་བརྒྱབ་ནས་དཔང་རྟགས་ཉར་དགོས། གོང་ཆེ་བ་དང་། ཆག་སླ་བ། རུལ་སླ་བ་བཅས་ཀྱི་ཚོང་ཟོག་ཡིན་ཚེ་ཁ་ཕྱེ་བའི་བརྒྱུད་རིམ་གྱི་བརྙན་ལེན་ཆོག