ཕྱི་རྒྱལ་གྱི་མ་འཇོག་ནི་འཕེལ་རྒྱས་ཀྱི་རྣམ་པ་གསར་པ་བསྐྲུན་པར་མེད་དུ་མི་རུང་བའི་སྟོབས་ཤུགས་ཤིག་ཡིན། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག“ཕྱི་རྒྱལ་གྱི་ཚོང་པའི་མ་འཇོག་ལ་སྐུལ་འདེད་གཏོང་བའི་སྒྲིག་སྲོལ་དང་ལམ་སྲོལ་སྒྱུར་བཅོས་གཏིང་ཟབ་ཏུ་གཏོང་དགོས”ཞེས་དང“‘ཀྲུང་གོར་མ་འཇོག’གི་སྤུས་རྟགས་རྒྱུན་མཐུད་གཏོད་དགོས”ཞེས་བཏོན་ཡོད། འདི་ལོའི《སྲིད་གཞུང་གི་ལས་དོན་སྙན་སྒྲོན》ནང“ཁྲོམ་ར་ཅན་དང་། ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་རྒྱུན་མཐུད་བཏོད་ནས། ཕྱི་རྒྱལ་གྱི་མ་འཇོག་ཁེ་ལས་དེ་བས་ལེགས་པའི་སྒོ་ནས་འཕེལ་རྒྱས་གཏོང་དགོས”ཞེས་བཏོན་ཡོད། དེས་ན། ཕྱི་རྒྱལ་གྱི་མ་འཇོག་བརྟན་དུ་གཏོང་བའི་ལས་དོན་ཇི་ལྟར་སྔར་བས་ལེགས་པར་སྒྲུབ་དགོས་སམ།

རང་བརྟེན་སྒོ་དབྱེ་གོ་རིམ་ལྡན་པའི་སྒོ་ནས་རྒྱ་ཆེར་གཏོང་དགོས། རྒྱལ་ཁབ་འཕེལ་སྒྱུར་ཨུ་ལྷན་གྱིས་ཕྱི་རྒྱལ་གྱི་མ་དངུལ་བེད་སྤྱོད་དང་མངའ་ཁོངས་ཕྱིའི་མ་འཇོག་སིའི་འགན་འཁུར་བ་ཧྭ་ཀྲུང་གིས་ངོ་སྤྲོད་བྱས་དོན། 2025ལོའི་པར་གཞིའི《ཕྱི་རྒྱལ་གྱི་ཚོང་པའི་མ་འཇོག་ལ་ལྕག་སྐུལ་བྱེད་པའི་ཐོན་ལས་དཀར་ཆག》གང་མགྱོགས་འདོན་རྒྱུ་ཡིན་པ་དང་། དཀར་ཆག་གསར་པའི་ནང་སྔོན་ཐོན་བཟོ་སྐྲུན་ལས་རིགས་དང་། དེང་རབས་ཞབས་ཞུའི་ལས་རིགས། མཐོ་གསར་ལག་རྩལ། ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོང་སོགས་ཁྱབ་ཁོངས་ཀྱི་ནང་དོན་གཙོ་གནད་ཐོག་མང་དུ་གཏོང་རྒྱུ་དང་ཆབས་ཅིག ཕྱི་རྒྱལ་གྱི་མ་དངུལ་དེ་བས་མང་བ་དབུས་ནུབ་ས་ཁུལ་དང་བྱང་ཤར་ས་ཁུལ་དུ་གཏོང་བར་ལྕག་སྐུལ་བྱེད་རྒྱུ་རེད། ཕྱི་རྒྱལ་གྱི་མ་འཇོག་ཁེ་ལས་ཀྱིས་མངའ་ཁོངས་ནང་བསྐྱར་དུ་མ་རྩ་གཏོང་བར་ལྕག་སྐུལ་བྱེད་པའི་སྲིད་ཇུས་ཞིབ་འཇུག་དང་འདོན་རྒྱུའི་སྐོར་ལ། ཐོན་སྐྱེད་རྒྱུ་ཆ་སྣ་ཚོགས་ཀྱི་བཀོད་སྒྲིག་ལེགས་སུ་གཏོང་བ་དང་། ཕྱི་རྒྱལ་གྱི་མ་དངུལ་རྣམ་གྲངས་གལ་ཆེན་གྱི་ལས་དོན་ཆེད་དོན་ཚན་ཁག་གི་འདེགས་སྐྱོར་ཤུགས་ཆེ་རུ་གཏོང་བ། རྣམ་གྲངས་ཀྱི་བརྒྱུད་རིམ་ཡོངས་ཀྱི་ཞབས་ཞུར་ཤུགས་སྣོན་རྒྱག་པ་སོགས་ཀྱི་ཕྱོགས་ནས་ཆ་རྐྱེན་དང་མཐུན་པའི་མ་དངུལ་བསྐྱར་འཇོག་རྣམ་གྲངས་ལ་སྤྱི་འདོམས་བྱས་ནས་རྒྱབ་སྐྱོར་བྱེད་རྩིས་ཡོད་པ་རེད།

“ཀྲུང་གོར་མ་འཇོག”གི་སྤུས་རྟགས་རྒྱུན་མཐུད་གཏོད་དགོས། ཚོང་དོན་པུའི་ཕྱི་རྒྱལ་གྱི་མ་འཇོག་དོ་དམ་སིའི་སི་ཀྲང་ཀྲུའུ་པིན་གྱིས་ངོ་སྤྲོད་བྱས་དོན། རྒྱལ་ཁབ་རིམ་པའི་དཔལ་འབྱོར་གསར་སྤེལ་ཁུལ་དང་ཞབས་ཞུའི་ལས་རིགས་ཀྱི་སྒོ་འབྱེད་རྒྱ་ཆེར་གཏོང་བའི་ཕྱོགས་བསྡུས་ཚོད་ལྟའི་ས་ཁུལ་ལ་བརྟེན་ནས“དཔལ་འབྱོར་གསར་སྤེལ་ཁུལ་འདེམས་པ”དང“ཞབས་ཞུའི་སྒོ་འབྱེད་ཕྱོགས་བསྡུས་ཚོད་ལྟའི་ཁུལ་དང་ལག་གདང་སྦྲེལ་བའི”ཡན་ལག་སྤུས་རྟགས་གཉིས་བཏོད་དེ། མཚོན་རྟགས་རང་བཞིན་གྱི་འགྲེམས་ཚོགས་དང་། གཙོ་གནད་བྱེད་སྒོ། གཙོ་གནད་ལས་སྟེགས་བཅས་བརྒྱུད་ཕྱི་རྒྱལ་གྱི་མ་དངུལ་འཇོག་མཁན་ལ་ཀྲུང་གོའི་དཔལ་འབྱོར་གྱི་ཕྱོགས་བསྡུས་ལེགས་ཆ་དང་། ཚོང་གཉེར་ཁོར་ཡུག སྲིད་ཇུས་རབ་དང་རིམ་པ་བཅས་ལ་གསལ་འགྲེལ་དེ་བས་ལེགས་པོ་བྱས་ཏེ། སྤུས་ཚད་མཐོ་བའི་ཕྱི་རྒྱལ་གྱི་མ་དངུལ་རྣམ་གྲངས་དེ་བས་མང་བ་ནང་འདྲེན་བྱེད་དགོས།

ཚོང་གཉེར་ཁོར་ཡུག་ལེགས་སུ་གཏོང་དགོས། ཁྲོམ་ར་ལྟ་འདོམས་སྤྱི་ཁྱབ་ཅུས་ཡིད་རྟོན་ལྟ་འདོམས་དོ་དམ་སིའི་སི་ཀྲང་ཀྲོའུ་ཝེ་ཅུན་གྱིས་བརྗོད་དོན། ཕྱི་རྒྱལ་གྱི་ཚོང་པར་མ་འཇོག་དབང་ཆ་སྤྲོད་པའི་ཐོ་འགོད་སྒྲིག་སྲོལ་འཐུས་སྒོ་ཚང་དུ་གཏོང་བ་དང་། དམིགས་བསལ་བཟའ་བཅའ་ཐོ་འགོད་ཀྱི་མངའ་ཁོངས་ཕྱིའི་ཞིབ་བཤེར་རྒྱུན་རྣམ་ཅན་གྱི་ལས་དོན་ལམ་སྲོལ་རྒྱུན་མཐུད་འཐུས་སྒོ་ཚང་དུ་བཏང་ནས་ཕྱི་རྒྱལ་གྱི་ཚོང་པའི་ཁེ་ལས་ལ་སྤུས་ལེགས་ནུས་ཆེའི་ཁྲོམ་རའི་ཆོག་འཐུས་ཞབས་འདེགས་ཞུ་དགོས། 《དྲང་གཞག་འགྲན་རྩོད་ཞིབ་བཤེར་སྲོལ་ཡིག》ལག་བསྟར་གཏིང་ཟབ་བྱས་ཏེ། རྒྱལ་ཁབ་ཕྱི་ནང་གི་མ་འཇོག་ཁེ་ལས་ལ་གཅིག་མཚུངས་ཀྱི་འདྲ་མཉམ་འགྲན་རྩོད་ཞིབ་བཤེར་ལམ་ལུགས་འཛུགས་པ་དང་འཐུས་སྒོ་ཚང་དུ་བཏང་སྟེ། དབང་བའི་ལམ་ལུགས་སྣ་ཚོགས་ཀྱི་གཉེར་སྐྱོང་བྱེད་པོས་ཐོན་སྐྱེད་རྒྱུ་ཆ་གཙོ་བོ་འདྲ་མཉམ་བེད་སྤྱོད་དང་དྲང་གཞག་ངང་ཁྲོམ་རའི་འགྲན་རྩོད་ནང་ཞུགས་པར་འགོག་རྐྱེན་བཟོ་བའི་སྲིད་ཇུས་དང་བྱེད་ཐབས་གཙང་བཤེར་བྱས་ཏེ། རྒྱལ་ཡོངས་གཅིག་གྱུར་གྱི་ཁྲོམ་ར་ཆེན་པོ་བསྐྲུན་པར་སྐུལ་འདེད་གཏོང་དགོས། ཚོང་དོན་པུའུ་དང་མཉམ་དུ་བཀྲམ་པའི《ཕྱི་རྒྱལ་གྱི་ཚོང་པའི་མ་འཇོག་ཆ་འཕྲིན་སྙན་ཞུར་ལྟ་སྐུལ་ཞིབ་བཤེར་དང་མཛུབ་ཁྲིད》ལག་བསྟར་དོན་འཁྱོལ་བྱས་ཏེ་ཕྱི་རྒྱལ་གྱི་ཚོང་པའི་མ་འཇོག་ཁེ་ལས་ཀྱི་ཆ་འཕྲིན་སྙན་ཞུར་ལྟ་འདོམས་སྔར་བས་ཚད་ལྡན་དུ་གཏོང་དགོས།

ཉེ་ཆར《2025ལོའི་ཕྱི་རྒྱལ་གྱི་མ་འཇོག་བརྟན་གཏོང་གི་བྱ་སྤྱོད་ཇུས་གཞི》ཡོངས་བསྒྲགས་དང་ཁྱབ་བསྒྲགས་བྱས་ནས་རང་བརྟེན་སྒོ་འབྱེད་གོ་རིམ་ལྡན་པའི་སྒོ་ནས་རྒྱ་ཆེར་གཏོང་བ་དང་། མ་འཇོག་ལ་སྐུལ་འདེད་གཏོང་བའི་ཆུ་ཚད་མཐོ་རུ་གཏོང་བ། སྒོ་དབྱེའི་ལས་སྟེགས་ཀྱི་ཕན་ནུས་ཆེ་རུ་གཏོང་བ། ཞབས་ཞུའི་འགན་ལེན་ཤུགས་ཆེར་གཏོང་བ་བཅས་ཕྱོགས་བཞི་ནས་སྲིད་ཇུས་བྱེད་ཐབས་ཁག་20སྔར་བས་བཏོན་ཡོད། ཚོང་དོན་པུའི་པུའུ་ཀྲང་གཞོན་པ་རྒྱལ་སྤྱིའི་ཚོང་དོན་གྲོས་མོལ་གྱི་འཐུས་མི་གཞོན་པ་གཅིག་ལྕོགས་ལིང་ཅི་ཡིས། ས་ཁུལ་ཁག་དང་སྡེ་ཚན་ཁག་དང་མཉམ་དུ་བྱ་སྤྱོད་ཀྱི་ཇུས་གཞི་དོན་འཁྱོལ་ཏན་ཏིག་བྱེད་པ་དང་ཕྱི་རྒྱལ་གྱི་མ་འཇོག་ཁེ་ལས་ལ་ཞབས་འདེགས་ཡག་པོ་ཞུ་རྒྱུ་ཡིན། ཚོང་དོན་པུའུ་ཡིས་ད་དུང་རྒྱལ་ཡོངས་ཁྱབ་ཁོངས་སུ“ཕྱི་རྒྱལ་གྱི་ཁེ་ལས་ལ་ཞབས་འདེགས་ཞུ་བ་དང་འགན་ལེན་བྱེད་པའི”ལས་དོན་སྤེལ་ནས་རིམ་ཁག་ཕྱི་རྒྱལ་གྱི་མ་འཇོག་ཆེད་དོན་ཚན་ཁག་གི་ནུས་པ་བཏོན་ཏེ་ཕྱི་རྒྱལ་གྱི་མ་འཇོག་ཁེ་ལས་སུ་འཚམས་འདྲི་དང་རང་སར་ཁེ་ལས་ཀྱི་རེ་འདུན་ཤེས་རྟོགས་བྱས་ཏེ་ཕྱི་རྒྱལ་གྱི་མ་འཇོག་ཁེ་ལས་ཀྱི་ལུགས་མཐུན་གྱི་རེ་འདུན་ཐག་གཅོད་ཏན་ཏིག་བྱེད་རྒྱུ་ཡིན་ཞེས་བརྗོད།