ཕྱི་ཕྱོགས་ཚོང་དོན་ནི་སྒོ་དབྱེ་རྣམ་པའི་དཔལ་འབྱོར་གྱི་གྲུབ་ཆ་གལ་ཆེན་ཞིག་ཡིན་ལ། རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་ཤར་བགྲོད་ཐུབ་པར་བྱེད་པའི་འགག་རྩའི་ལྟེ་བ་ཡང་རེད། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག“ཆུ་ཚད་མཐོ་བའི་ཕྱི་ཕྱོགས་ལ་སྒོ་མོ་འབྱེད་རྒྱ་ཆེ་རུ་བཏང་ནས་ཕྱི་ཕྱོགས་ཚོང་དོན་བརྟན་པོ་དང་ཕྱི་རྒྱལ་གྱི་མ་དངུལ་བརྟན་པོ་ཡོང་བར་བྱེད་དགོས”དང“ཞབས་ཞུའི་ཚོང་དོན་དང་། ལྗང་མདོག་ཚོང་དོན། གྲངས་འཛིན་ཚོང་དོན་བཅས་འཕེལ་རྒྱས་ཧུར་ཐག་གཏོང་དགོས”ཞེས་བཏོན་ཡོད། འདི་ལོའི《སྲིད་གཞུང་གི་ལས་དོན་སྙན་སྒྲོན》ནང“ཕྱི་ཕྱོགས་ཚོང་དོན་བརྟན་པོ་ཡོང་བའི་སྲིད་ཇུས་འདོན་ཤུགས་ཆེ་རུ་བཏང་ནས་ཁེ་ལས་ཀྱི་མངགས་ཐོ་བརྟན་པོ་དང་ཁྲོམ་ར་རྒྱ་སྐྱེད་གཏོང་བར་རྒྱབ་སྐྱོར་བྱེད་དགོས”ཞེས་བཏོན་ཡོད། ཇི་ལྟར་བྱས་ནས་ཆུ་ཚད་མཐོ་བའི་ཕྱི་ཕྱོགས་ལ་སྒོ་མོ་འབྱེད་རྒྱ་མུ་མཐུད་ཆེ་རུ་བཏང་སྟེ་ཕྱི་ཕྱོགས་ཚོང་དོན་གྲངས་འབོར་བརྟན་པོ་དང་སྤུས་ཚད་མཐོ་རུ་འགྲོ་བར་སྐུལ་འདེད་གཏོང་དགོས་སམ།

ཕྱི་ཕྱོགས་ཚོང་དོན་གྱི་སྒུལ་ནུས་གསར་པ་སྐྱེད་སྲིང་བྱེད་དགོས། “2025ལོར། ང་ཚོས་འགག་སྒོ་ལས་ཁུངས་ཀྱི་རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་སྣོལ་འདྲེས་ཀྱི་ལྟེ་བའི་ནུས་པ་འདོན་པ་དང་། རང་འགུལ་ངང་བྱས་རྗེས་ཧུར་ཐག་འཇོག་པ། སྲིད་ཇུས་མཁོ་སྤྲོད་ཀྱི་གནད་སྨིན་རང་བཞིན་དང་ནུས་ལྡན་རང་བཞིན་ཆེ་རུ་གཏོང་བ་བཅས་བྱས་ཏེ་ཕྱོགས་ཁག་གི་དགེ་མཚན་ལྡན་པའི་རྒྱུ་རྐྱེན་དང་མཐུན་རྐྱེན་དེ་བས་ལེགས་པའི་སྒོ་ནས་ཕྱི་ཕྱོགས་ཚོང་དོན་གྱི་སྤུས་ཚད་མཐོ་བའི་འཕེལ་རྒྱས་ཀྱི་ནུས་ཕྱོད་ལ་འགྱུར་བར་སྐུལ་འདེད་གཏོང་གི་ཡིན”ཞེས་འགག་སྒོ་སྤྱི་ཁྱབ་ཧྲུའུ་ཡི་ཧྲུའུ་ཀྲང་སུན་མེ་ཅུན་གྱིས་ངོ་སྤྲོད་བྱས།

ཚོང་དོན་པུའི་འབྲེལ་ཡོད་འགན་འཁུར་བས། འབྲེལ་ཡོད་སྡེ་ཚན་དང་ས་གནས་དང་མཉམ་དུ་ཕྱི་ཕྱོགས་ཚོང་དོན་འཁོར་རྒྱུག་གི་གནས་ཚུལ་ལ་རྗེས་འདེད་དམ་ཟབ་དང་། དུས་བབ་འཕེལ་རྒྱས་དང་འགྱུར་ལྡོག་ལ་མཐའ་དཔྱོད། ཕྱི་ཕྱོགས་ཚོང་དོན་ཁྱབ་ཁོངས་ཀྱི་སྲིད་ཇུས་དོན་འཁྱོལ་ལ་དམ་འཛིན་ཡག་པོ། ཕྱི་ཕྱོགས་ཚོང་དོན་ཁེ་ལས་ཀྱི་མངགས་ཐོ་བརྟན་པོ་དང་ཁྲོམ་ར་རྒྱ་སྐྱེད་ལ་རོགས་རམ་བཅས་བྱས་ཏེ། དཔལ་འབྱོར་ཡང་བསྐྱར་ལེགས་ཕྱོགས་སུ་འཕེལ་བར་འདེགས་སྐྱོར་བྱེད་ཀྱི་ཡིན་ཞེས་ངོ་སྤྲོད་བྱས།

གསོག་ཚད་དང་འཕར་ཚད་ཀྱི་སྲིད་ཇུས་ལ་མཉམ་དུ་ཤུགས་རྒྱག་པར་སྐུལ་འདེད་གཏོང་དགོས། ཕྱི་ཕྱོགས་ཚོང་དོན་སྤུས་ཚད་མཐོ་པོ་དང་གྲངས་འབོར་བརྟན་པོ་ཡོང་བ་བྱེད་པ་དེ་སྲིད་ཇུས་ཀྱི་རྒྱབ་སྐྱོར་ཤུགས་ཆེན་པོ་དང་ཁ་འབྲལ་ཐབས་མེད། 2025ལོར། རྒྱལ་ཡོངས་ཀྱི་འགག་སྒོ་ལས་ཁུངས་ཀྱིས་ཕྱི་ཕྱོགས་ཚོང་དོན་འཕར་སྣོན་བརྟན་པོ་ཡོང་བར་སྐུལ་འདེད་གཏོང་བའི་བྱ་ཐབས་འགའ་ཞིག་ནུས་ཤུགས་ཡོད་རྒུས་དོན་འཁྱོལ་བྱེད་པ་དང་། འགག་སྒོའི་ཚོང་གཉེར་ཁོར་ཡུག་སྔར་བས་ལེགས་སུ་གཏོང་བ་དང་ཁེ་ལས་ཀྱི་འགག་སྒྲོལ་སྟབས་བདེར་སྐུལ་འདེད་གཏོང་བའི་འགག་སྒོ་ལས་ཁུངས་ཀྱི་བྱ་ཐབས་ཁག་16ལག་བསྟར་བྱེད་ཤུགས་ཆེ་རུ་གཏོང་བ། “ཁས་ལེན་དཔང་འདོན་བྱས་པའི་གཉེར་སྐྱོང་མཁན”(AEO)ཁེ་ལས་ཀྱི་གཟིགས་སྐྱོང་ལོངས་སྤྱོད་བྱ་ཐབས་ཀྱི་གསལ་ཐོ་མང་དུ་གཏོང་བ། འགག་སྒོ་ལས་ཁུངས་ཀྱིས་ཕྱི་ཕྱོགས་ཚོང་དོན་འཕར་སྣོན་བརྟན་པོ་ཡོང་བར་སྐུལ་འདེད་གཏོང་བའི་དམིགས་བསལ་བྱ་ཐབས་འདོན་པ། ཁེ་ལས་ལ་ཕྱིར་གཏོང་བྱེད་རྒྱ་ཆེ་རུ་གཏོང་བ་དང་ཁྲོམ་རའི་ཐོབ་སྐལ་བརྟན་པོ་ཡོང་རོགས་བཅས་བྱེད་དགོས།

འགག་སྒོའི་ཚོང་གཉེར་ཁོར་ཡུག་རྩེ་གྲ་རྒྱུན་མཐུད་གཏོད་དགོས། 2025ལོར་རྒྱལ་སྒྲོལ་ཚོང་དོན་སྟབས་བདེ་ཅན་ལ་སྐུལ་འདེད་གཏོང་བའི་ཆེད་དོན་བྱ་སྤྱོད་སྤེལ་བ་དང་། རྒྱལ་སྤྱིའི་ཚོང་དོན་གྱི“སྐར་ཁུང་རྐྱང་པའི”ཞབས་འདེགས་ཞུ་ཐབས་གསར་གཏོད་ལ་སྐུལ་འདེད་གཏོང་བ། མཁའ་འགྲུལ་འགག་སྒོའི་འགག་སྒྲོལ་སྟབས་བདེ་ཅན་ལ་སྔར་བས་སྐུལ་འདེད་གཏོང་བའི་བྱ་ཐབས་འགའ་ཞིག་ལག་བསྟར་བཅས་བྱྱེད་དགོས། གཞུང་ལམ་དང་ལྕགས་ལམ་མཉམ་འདྲེན་སོགས་ཀྱི་ཟོག་འགྲེམས་རྣམ་གྲངས་འཛུགས་སྐྲུན་ལ་རྒྱབ་སྐྱོར་བྱས་ཏེ། ཀྲུང་ཡོའི་དུས་གཏན་མེ་འཁོར་དང་ནུབ་རྒྱུད་སྐམ་མཚོའི་བགྲོད་ལམ་གསར་པའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རོགས་བྱེད་དགོས།