ཟླ་3ཚེས་14ཉིན། ཀན་སུའུ་གློག་ཤུགས་མ་འཇོག་ཁྲང་ལེ་གློག་གཏོང་ཚད་ཡོད་འགན་འཁྲི་ཀུང་སིས་རྒྱས་སྐྲུན་བྱེད་པའི་ཀྲའོ་ཝ་2×1000གི་རྡོ་སོལ་འཕྲུལ་ཚན་རྣམ་གྲངས་འཛུགས་སྐྲུན་བྱ་ཡུལ་དུ་ཨར་སྐྲུན་བཟོ་པ་3800ལྷག་ཙམ་གྱིས་བྲེལ་འཚུབ་ངང་ལས་ཀ་བྱེད་ཅིང་། འཕྲུལ་ཚན་ལྔ་པ་དང་དྲུག་པའི་ཁྲོ་ཐབ་ཀྱི་དྲོད་ལེན་ངོས་ལ་ཚ་ལ་རྒྱག་པའི་ས་གནས་ས་ཐོག་ཏུ་བཟོ་པ་800ལྷག་ཙམ་གྱིས་ནུས་ཤུགས་ཡོད་རྒུས་ཁྲོ་ཐབ་ཀྱི་ཆུ་གྲང་བཟོའི་སྦུ་གུར་ཚ་ལ་བརྒྱབ་སྟེ། ལོ་དེའི་ནང་རྣམ་གྲངས་ནས་གློག་གཏོང་ཐུབ་ཆེད་ལས་དུས་འཕར་མ་བྱེད་བཞིན་ཡོད།

2024ལོའི་ཟླ་9པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀན་སུའུ་རུ་རྟོག་ཞིབ་གནང་སྐབས“སེམས་ཤུགས་དེ་བས་ཆེན་པོ་དང་ཆོད་སེམས་དེ་བས་ཆེན་པོས་སྒྱུར་བཅོས་གཏིང་ཟབ་དང་སྒོ་མོ་འབྱེད་རྒྱ་ཆེ་རུ་གཏོང་དགོས”ཞེས་བསྟན་གནང་ཡོད་ལ། ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“གཙོ་རྐྱེན་ཁྲོམ་ར་ཅན་གྱི་བཀོད་སྒྲིག་བྱེད་སྟངས་སྒྱུར་བཅོས་གཏིང་ཟབ་བྱས་ནས་ས་གནས་ཀྱི་སྲུང་སྐྱོང་དང་། ཁྲོམ་རས་ཁག་བགོས། ‘གྲིམ་མདུད་རྣམ་པའི”འགྲན་རྩོད་བཅས་རང་འགུལ་ངང་མེད་པ་བཟོ་དགོས”ཞེས་དང“དབང་བའི་ལམ་ལུགས་ཀྱི་ཁེ་ལས་སྣ་ཚོགས་ལ་ལྟ་སྟངས་འདྲ་མཉམ་འཛིན་ནས་ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་དགོས”ཞེས་ནན་བཤད་གནང་ཡོད།

2024ལོར་ཀན་སུའུ་ཡི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་13003ཟིན་ནས་དུས་མཚུངས་ལས་5.8%འཕར་ཞིང་། རིམ་རྩིས་བརྒྱབ་ན་ཚོང་འགུགས་མ་འདྲེན་རྣམ་གྲངས་5431ལག་ལེན་བསྟར་བ་དང་ཚོང་གཉེར་ཁོར་ཡུག་ལེགས་སུ་གཏོང་བའི་གཙོ་གནད་ལས་འགན་ཁག་27དང་དོན་ཚན་310དོན་འཁྱོལ་བྱས་ཡོད། འདི་ལོ་ནས་བཟུང་ཀན་སུའུ་ཡིས་བབ་བསྟུན་འཕྲལ་སྒྲུབ་ངང་ཚོང་གཉེར་གྱི་ནང་ངོས་མཐུན་རྐྱེན་ལེགས་སུ་མགྱོགས་མྱུར་གཏོང་བ་དང་འཕེལ་རྒྱས་ཀྱི་སྟོབས་ཤུགས་ཆེ་རུ་ནུས་ཤུགས་ཡོད་རྒུས་བཏང་ཡོད། “མ་དངུལ་ཁྱོན་སྒོར་དུང་ཕྱུར་539.18བཏང་བ་དང་སྒྲིག་ཆས་བཟོ་སྐྲུན་དང་། སྐྱེ་དངོས་སྨན་རྫས། རྒྱུ་ཆ་གསར་པ། ནུས་རྒྱུ་གསར་པ་སོགས་ཁྱབ་ཁོངས་དང་འབྲེལ་བ་ཡོད་པའི་གཙོ་གནད་ཐོན་ལས་དང་ཚན་རྩལ་གསར་གཏོད་རྣམ་གྲངས་ཁག་གཅིག་གི་གན་རྒྱ་གཅིག་སྡུད་ཐོག་བཞག་ཡོད” ཉིན་ཤས་གོང་ལན་ཀྲོའུ་གྲོང་ཁྱེར་གྱི་ཞིང་ཆེན་ལྟེ་བའི་གྲོང་ཁྱེར་སྟོབས་ཆེར་གཏོང་བའི་ཚོགས་ཆེན་ཐོག་ད་ལོའི་གཟེངས་སུ་ཐོན་པའི་གྲུབ་འབྲས་ཐོག་མ་ངོམ་སྟོན་བྱས་པ་དང་དེ་དམངས་གཉེར་ཁེ་ལས་སོགས་གཉེར་སྐྱོང་བྱེད་པོ་རྒྱ་ཁྱབ་ངང་ཞུགས་པ་དང་ཁ་འབྲལ་ཐབས་མེད་པ་ཞིག་རེད།

དམངས་གཉེར་ཁེ་ལས་ནི་ཚོང་འགུགས་མ་འདྲེན་བྱ་ཡུལ་ཙམ་མ་ཟད། ས་གནས་ཀྱི་དཔལ་འབྱོར་དང་ཐོན་ལས་རིམ་སྤོར་གྱི་སྟོབས་ཤུགས་གལ་ཆེན་ཞིག་ཀྱང་རེད། ཀན་སུའུ་ཞིང་ཆེན་གྱི་ཚོང་འགུག་མ་འདྲེན་དང་ཚོང་གཉེར་ཁོར་ཡུག་ལེགས་གཏོང་ཚོགས་ཆེན་ཐོག“གཞི་རྒྱ་ཆེ་རིགས་ནང་འདྲེན་དང་། སྟོབས་ཤུགས་ཆེ་རིགས་ནང་འདྲེན། གཙོ་ཆེ་རིགས་ནང་འདྲེན་བཅས་བྱེད་རྒྱུ”དང“ཚོང་གཉེར་ཁོར་ཡུག་ལེགས་སྒྱུར་དང་ཕྱོགས་ཡོངས་ཀྱི་མཐོར་གཏོང་ལོ”སོགས་ཀྱི་ལས་དོན་བཀོད་སྒྲིག་བྱས་པ་རེད། ཚོང་གཉེར་ཁོར་ཡུག་ལེགས་སུ་གཏོང་བར་ཚད་མཐོའི་མཐོང་ཆེན་བྱེད་པ་དང་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཀན་སུའུ་ཡི་ཆོད་སེམས་དང་བྱ་སྤྱོད་ལས་ང་ཚོའི་སེམས་ཤུགས་ཀྱང་དེ་བས་ཆེ་རུ་ཕྱིན་སོང”ཞེས་ཀན་སུའུ་ཞིང་ཆེན་ཅང་སུའུ་ཚོང་ཚོགས་ཀྱི་དྲུང་ཆེ་གཞོན་པ་ཧེང་ཕུའུ་ཞི་ཡིས་བཤད།

ལན་ཀྲོའུ་གྲོང་ཁྱེར་ཀའོ་ལན་རྫོང་སྲིད་དོན་ཚོམས་ཆེན་གྱི“ལས་ཕྱོད་ཆེན་པོས་བྱ་བ་གཅིག་སྒྲུབ་པའི”སྐར་ཁུང་གི་ལས་དོན་མི་སྣས་ཡིད་རྟོན་ལྟ་འདོམས་དང་ཁྲལ་དོན་སོགས་སྡེ་ཚན་དང་མཐུན་སྦྱོར་བྱས་ཏེ། གྲོང་མི་ལི་ལགས་ལ་ལོ་རེའི་ཁ་གསབ་སྙན་ཞུ་དང་དཔྱ་ཁྲལ་གཙང་བཤེར་གྱི་དཔང་ཡིག་འབྲི་བའི་ལས་སྒོ་བདེ་བླག་ངང་གཉེར་བ་རེད། “ངས་གློག་ཀླད་བཀོལ་སྤྱོད་བྱེད་ཤེས་ཀྱི་མེད། སྟབས་ལེགས་པ་ཞིག་ལ་ཁྱེད་ཚོ་ཡོད་པས་སྟབས་ཧ་ཅང་བདེ་པོ་བྱུང”ཞེས་ལི་ལགས་ཀྱིས་ཐུགས་རྗེ་ཆེ་ཞུ་ལུགས་མཚོན་པར་བྱེད་བཞིན་བཤད།

ཀའོ་ལན་རྫོང་གིས་སྡེ་ཚན་ལས་བརྒལ་བའི་མཐུན་སྦྱོར་ཞིབ་མཆན་སོགས་ཀྱི་རྣམ་པ་བརྒྱུད་བསྒྲུབ་རྒྱུར་ལུས་པའི་དོན་དག་གཅིག་གྱུར་འཆར་འགོད་དང་གཅིག་སྡུད་བྱས་པ་དང་། དྲ་ཕྱིར་སློབ་གསོ་དང་། ཁྲོམ་ར་ལྟ་འདོམས། མི་སྤྱི། འཕྲོད་བསྟེན་སོགས་འགན་ནུས་སྐར་ཁུང་བསྡུ་སྒྲིལ་བྱས་པ་དང་ཆབས་ཅིག་དྲ་ཐོག་ནས་ཀན་སུའུ་ཞིང་ཆེན་སྲིད་དོན་ཞབས་ཞུའི་དྲ་བ་བརྒྱུད་དེ་མཚུངས་ཀྱི་ཞབས་ཞུ་མཁོ་འདོན་བྱས་པ། དྲ་ཐོག་དང་དྲ་ཕྱི་ཟུང་འབྲེལ་གྱིས་ལས་སྒྲུབ་ལས་ཕྱོད་ཆེ་རུ་བཏང་ནས་ཁེ་ལས་དང་མང་ཚོགས་ལ་སྟབས་བདེ་བསྐྲུན་ཡོད།

ད་ལོའི《སྲིད་གཞུང་གི་ལས་དོན་སྙན་སྒྲོན》ནང“གྲངས་འཛིན་སྲིད་གཞུང་འཛུགས་སྐྱོང་མགྱོགས་པོ་བྱས་ཏེ། ‘ལས་ཕྱོད་ཆེན་པོས་བྱ་བ་གཅིག་སྒྲུབ་པའི’གཙོ་གནད་ལས་དོན་རྩིས་ཐོ་དོ་དམ་དང་རྒྱུན་གཏན་ཅན་གྱི་སྐུལ་འདེད་ལམ་སྲོལ་འཐུས་སྒོ་ཚང་དུ་གཏོང་བ་དང་རྒྱལ་ཡོངས་ལ་ཁྱབ་པའི་གཞི་གཅིག་ཅན་གྱི་དྲ་ཐོག་སྲིད་དོན་ཞབས་ཞུའི་སྟེགས་བུ་འཐུས་སྒོ་ཚང་དུ་གཏོང་དགོས”ཞེས་བཏོན་ཡོད། ཀའོ་ལན་རྫོང་གི་ལག་ལེན་དང་འཚོལ་ཞིབ་ནི་གསོན་ཉམས་ལྡན་པའི་མཆན་འགྲེལ་ཞིག་ཡིན་པ་སྨོས་ཅི་དགོས།

གཞིས་ཆགས་ཁེ་ལས་ཀྱི་གྲངས་འབོར་རྒྱུན་ཆད་མེད་པར་འཕར་བ་དང་ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་ཕྱིན་ཞིང་། ཀན་སུའུ་ཞིང་ཆེན་ཡོངས་ཀྱིས་ཚོང་གཉེར་ཁོར་ཡུག་ལེགས་སུ་གཏོང་རྒྱུ་དེ་སྤུས་ཚད་མཐོ་བའི་འཕེལ་རྒྱས་ཀྱི་གཙོ་གནད་ལས་གྲྭ་ཞིག་ཏུ་བརྩི་ཡི་ཡོད། ལུང་ཡོན་ས་གཞི་ཆེན་པོས་ཕྱོགས་བཞི་མཚམས་བརྒྱད་ཀྱི་ཚོང་པས་མ་འཇོག་བྱས་ནས་བྱ་གཞག་དར་རྒྱས་གཏོང་བ་དང་ཐུན་མོང་འཕེལ་རྒྱས་གཏོང་ཐབས་འཚོལ་ཞིབ་བྱེད་པར་ཡོང་རྒྱུར་སྤྲོ་སེམས་འཁོལ་པོས་དགའ་བསུ་ཞུ་བཞིན་ཡོད།