འདི་ལོའི་ཟླ་2པར། ཆབ་མདོའི་གྲོང་མི་ལིའུ་ལགས་ཀྱིས་སྒོ་རྩིས་ཚོང་ཁང་ཞིག་ནས་ལྷམ་འཁྲུ་འཕྲུལ་ཆས་ཤིག་ཉོས། ཁྱིམ་དུ་ལོག་ནས་ཚོད་ལྟ་བྱེད་སྐབས་ཤོང་ཚད་མི་འདང་བ་ཤེས། ཐག་གཅོད་གང་འདྲ་བྱེད་དགོས་མིན་ཐད་སེམས་ཁྲལ་བྱེད་སྐབས་སྒོ་རྩིས་ཚོང་ཁང་དེ་དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་པའི་ཁས་ལེན་བྱེད་སྒོར་ཞུགས་པ་ཤེས་རྟོགས་བྱུང་། ཁོང་གིས“ཉིན་གཉིས་པར་ངས་སྒོ་རྩིས་ཚོང་ཁང་དུ་ལྷམ་འཁྲུ་འཕྲུལ་ཆས་སློག་པར་ཕྱིན་པ་ཡིན། བརྒྱུད་རིམ་ཧྲིལ་པོ་བདེ་བླག་བྱུང་ལ་ཚོང་ཁང་གི་ཞབས་ཞུའི་རྣམ་འགྱུར་ཡང་ཧ་ཅང་ཡག་པོ་འདུག་པས། དྲ་ཕྱི་ནས་དངོས་ཟོག་ཉོ་བའི་ངའི་ཡིད་ཆེས་དེ་བས་ཆེ་རུ་ཕྱིན་སོང”ཞེས་བརྗོད།

སྒོ་རྩིས་ཚོང་ཁང་དེར་སྐྱོད་སྐབས་སྒོ་རྩིས་ཚོང་ཁང་གི་ཚོང་ཞབས་ལྟེ་གནས་ཀྱི་འགྲམ་དུ“དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་པའི་ཁས་ལེན་ཚོང་ཁང”ཞེས་པའི་སྒོ་བྱང་བཀལ་བ་གསར་འགོད་པས་མཐོང་བྱུང་། སྒོ་རྩིས་ཚོང་ཁང་གི་འགན་འཁུར་བ་ཅིང་ལི་ཀུའུ་ལགས་ཀྱིས“འཛད་སྤྱོད་པས་ཉོས་པའི་ཚོང་ཟོག་དེ་ཐེངས་གཉིས་པ་ཚོང་བར་ཤུགས་རྐྱེན་མི་ཐེབས་པའི་སྔོན་འགྲོའི་ཆ་རྐྱེན་འོག་ཉིན་བདུན་གྱི་དུས་ཚོད་ནང་ཉོ་སྒྲུབ་དཔང་འཛིན་ཁྱེར་ནས་རྒྱུ་མཚན་མེད་པར་དངོས་ཟོག་ཕྱིར་སློག་ཆོག ན་ནིང་ཚོང་ཁང་གིས་དྲ་ཕྱི་ནས་རྒྱུ་མཚན་མེད་པར་དངོས་ཟོག་ཐེངས་11ཕྱིར་སློག་བྱས་པ་ཡིན། ང་ཚོས་ཁས་ལེན་དེ་བརྒྱུད་འཛད་སྤྱོད་པ་དངོས་ཟོག་ཉོ་སྐབས་དེ་བས་བློ་བདེ་པོ་ཡོང་བའི་རེ་བ་བྱེད་ཀྱི་ཡོད། དེ་དང་ཆབས་ཅིག ང་ཚོས་ཀྱང་ཚོང་ཟོག་གི་སྤུས་ཚད་དང་འཛད་སྤྱོད་པར་ཞབས་འདེགས་ཞུ་བའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་གི་ཡིན”ཞེས་བརྗོད།

“དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་ཁས་ལེན་གྱི་དངོས་གཞིའི་ཚོང་ཁང་འཕེལ་རྒྱས་གཏོང་བ་ནི་ཁྲོམ་ར་ལྟ་འདོམས་ཅུས་ཀྱིས་དམངས་འཚོའི་ཁྲིད་སྟོན་ནུས་པ་བཏོན་པ་ཞིག་རེད། ཐོག་མར་འཛད་སྤྱོད་པའི“འགྱོད་པ་སྐྱེ་དབང”འགན་ལེན་བྱས་ནས་དངོས་ཟོག་ཉོ་བའི་བདེ་འཇགས་ཚོར་སྣང་ཆེ་རུ་གཏོང་བ་དང་། དེ་ནས་རྩོད་གཞི་ཐག་གཅོད་བྱེད་པའི་བརྒྱུད་རིམ་ལེགས་སུ་བཏང་ནས་འཛད་སྤྱོད་པའི་ཁེ་དབང་སྲུང་སྐྱོང་གི་མ་གནས་དམའ་རུ་གཏོང་བ་མ་ཟད། ཁེ་ལས་ཀྱི་གཉེར་སྐྱོང་བྱ་སྤྱོད་ཚད་ལྡན་དུ་བཏང་ནས་དྲང་གཞག་གི་འཛད་སྤྱོད་ཁོར་ཡུག་བཏོད་ཡོད”ཅེས་ཆབ་མདོ་གྲོང་ཁྱེར་ཁྲོམ་ར་ལྟ་འདོམས་ཅུས་དྲ་མིག་ཉོ་ཚོང་ལྟ་འདོམས་དང་སྲིད་ཇུས་ཁྲིམས་སྲོལ་ཁོའོ་ཡི་ཁོའོ་ཀྲང་རེན་ཁན་གྱིས་བརྗོད་པ་དང་། ཁོང་གིས། མིག་སྔར་ཆབ་མདོ་གྲོང་ཁྱེར་གྱིས་དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་ཁས་ལེན་གྱི་དངོས་གཞིའི་ཚོང་ཁང་91འཕེལ་རྒྱས་བཏང་ཡོད་ཅེས་བརྗོད།

དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་པའི་ཁས་ལེན་དེ་མིང་དོན་མཚུངས་པར་འགན་ལེན་བྱ་ཆེད། ཆབ་མདོ་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་འགུལ་རྣམ་ལྟ་སྐུལ་ལམ་སྲོལ་བཙུགས་ཏེ་དུས་ངེས་མེད་ངང་ཁས་ལེན་ཚན་པར་ཞིབ་བཤེར་བྱས་པ་དང་། ཁས་ལེན་ལམ་ལུགས་ལྟར་རྒྱུ་མཚན་མེད་པར་དངོས་ཟོག་ཕྱིར་སློག་ཡོད་མེད་ལ་ལྟ་ཞིབ་བྱས་ནས། ཤེས་རྟོགས་ཐུབ་པའི་གནད་དོན་དུས་ཐོག་ཏུ་བཅོས་སྒྲིག་བྱེད་པར་ལྕག་སྐུལ་བཏང་ཡོད། རྒྱལ་ཡོངས་ཀྱི་12315ལས་སྟེགས་ལ་བརྟེན་ནས་ཞུ་འབྱོར་འཕྲལ་སྒྲུབ་ཀྱི་བླང་བྱ་དོན་འཁྱོལ་བྱས་ཏེ། རྒྱུ་མཚན་མེད་པར་དངོས་ཟོག་ཕྱིར་སློག་སྐོར་གྱི་འཛད་སྤྱོད་པའི་ཞུ་གཏུག་དང་ཐེར་འདོན་གོང་ཞུ་དུས་ཐོག་ཏུ་བདག་སྤྲོད་དང་ཐག་གཅོད་བྱས་ཡོད། ཁས་ལེན་ལག་བསྟར་བྱས་མེད་པའི་གཉེར་སྐྱོང་བར་བཅའ་ཁྲིམས་དང་སྒྲིག་སྲོལ་ལྟར་ཐག་གཅོད་བྱས་པ་དང་འབྲེལ་སྤྱི་ཚོགས་ལ་ཡོངས་བསྒྲགས་བྱས་ནས་ཟིལ་གནོན་ནུས་ལྡན་ཆགས་པར་བྱས་ཡོད།

དངོས་འབྲེལ་དྲང་འབྲེལ་གྱི་བྱ་ཐབས་འདི་དག་བརྒྱུད་དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་བྱེད་སྒོར་འཛད་སྤྱོད་པའི་ཁས་ལེན་བྱེད་ཚད་དང་ཞུགས་ཚད་མཐོ་རུ་ཕྱིན་པ་མ་ཟད། རང་ལྗོངས་ཀྱི་འཛད་སྤྱོད་ཁོར་ཡུག་ཉིན་རེ་བཞིན་ལེགས་སུ་ཕྱིན་པ་ཡང་མཚོན་གྱི་ཡོད།

ཤེས་རྟོགས་བྱུང་བར་གཞིགས་ན། མིག་སྔའི་བར། རང་ལྗོངས་ཀྱིས་དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་ཁས་ལེན་གྱི་དངོས་གཞིའི་ཚོང་ཁང་ཁྱོན་118འཕེལ་རྒྱས་བཏང་ཞིང་། འཛད་སྤྱོད་རྩོད་གཞི་1774ཐག་གཅོད་བྱས་པར་ཕྱིར་སློག་དངུལ་འབོར་སྒོར་ཁྲི་41.07ཟིན་ཡོད། དྲ་ཕྱི་ནས་རྒྱུ་མཚན་མེད་པར་དངོས་ཟོག་ཕྱིར་སློག་ཁས་ལེན་བྱེད་སྒོར་དངོས་གཞིའི་ཚོང་ཁང་དེ་བས་མང་བ་ཞུགས་པ་དང་བསྟུན་ནས། རང་ལྗོངས་ཀྱི་འཛད་སྤྱོད་ཁོར་ཡུག་དེ་བས་བློ་བདེ་བ་དང་དེ་བས་ཁོང་ཡངས་ཀྱི་དུས་མཚམས་གསར་པར་རིམ་བཞིན་སླེབས་བཞིན་ཡོད་པ་རེད།