ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་14ཉིན་གློག་འཕྲིན་འབྱོར་གསལ། 2025ལོའི་ཟླ་3ཚེས་5ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་ཐོག་གནང་བའི《སྲིད་གཞུང་གི་ལས་དོན་སྙན་སྒྲོན》གྱི་དེབ་རྐྱང་མ་དང་བརྙན་པར་ཡིག་རིས་མི་དམངས་དཔེ་སྐྲུན་ཁང་གིས་པར་སྐྲུན་འགྲེམས་སྤེལ་བྱས་ཡོད། དེབ་དེའི་གློག་རྡུལ་དེབ་དང་སྒྲ་ལྡན་དེབ་སོགས་མཉམ་འདྲེས་སྨྱན་སྦྱོར་གྱི་པར་སྐྲུན་དངོས་པོ་ཡང་དྲ་རྒྱའི་ལས་སྟེགས་མང་པོ་ཞིག་ཏུ་ཡོངས་བསྒྲགས་བྱས་ཡོད།

རྒྱ་ཆེའི་ཀློག་པ་པོས《སྲིད་གཞུང་གི་ལས་དོན་སྙན་སྒྲོན》གྱི་དགོངས་དོན་སྔར་བས་སློབ་སྦྱོང་དང་ཁོང་དུ་ཆུད་པར་སྟབས་བདེ་ཡོང་ཆེད། མི་དམངས་དཔེ་སྐྲུན་ཁང་དང་ཀྲུང་གོ་ཡན་ཧྲི་དཔེ་སྐྲུན་ཁང་གིས་མཉམ་དུ་པར་སྐྲུན་བྱས་པའི《རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི<སྲིད་གཞུང་གི་ལས་དོན་སྙན་སྒྲོན>ཟུར་ཁྲིད་ཀློག་དེབ》དུས་གཅིག་ཏུ་པར་སྐྲུན་འགྲེམས་སྤེལ་བྱས་ཡོད།