ཉེ་ཆར། ཁྲོམ་ར་ལྟ་འདོམས་སྤྱི་ཁྱབ་ཅུས(རྒྱལ་ཁབ་ཚད་གཞི་ཨུ་ལྷན)ཀྱིས《འཛད་ཟོག་བཙོངས་རྗེས་ཀྱི་ཞབས་འདེགས་ཞུ་ཐབས་དང་བླང་བྱའི》རྒྱལ་ཁབ་ཀྱི་ཚད་གཞི་གསར་པ་ཁྱབ་བསྒྲགས་བྱ་རྒྱུའི་ཆོག་མཆན་སྤྲད་པ་དང་ཚད་གཞི་གསར་པ་དེ་2025ལོའི་ཟླ་5ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་རེད།

མིག་སྔར། རང་རྒྱལ་གྱི་འཛད་སྤྱོད་ཁྲོམ་ར་མུ་མཐུད་རིམ་སྤོར་བྱས་ཏེ་བཙོངས་རྗེས་ཀྱི་འཛད་སྤྱོད་པའི་ཞབས་ཞུའི་དགོས་མཁོ་དེ་རྨང་གཞིའི་འགན་སྲུང་ནས་སྤུས་ཚད་ཅན་དང་སྣ་མང་ཅན་དུ་གྱུར་བཞིན་ཡོད། དྲ་སྦྲེལ་དཔལ་འབྱོར་དང་རིག་ནུས་ཅན་གྱི་ལག་རྩལ་མཉམ་འདྲེས་གཏིང་ཟབ་བྱས་པ་བརྒྱུད། རྒྱང་རིང་བརྟག་དཔྱད་དང་རིག་ནུས་ཚོང་ཞབས་སོགས་བཙོངས་རྗེས་ཀྱི་ཞབས་ཞུའི་རྣམ་པ་གསར་པ་ཐོན་པར་བྱས་ཡོད། ཚད་གཞི་གསར་པས་ལག་རྩལ་གསར་པ་བཀོལ་སྤྱོད་དང་ཞབས་ཞུའི་སྤུས་ཚད་མཐོ་རུ་གཏོང་བར་དམིགས་ནས་དུས་ཐོག་ཏུ་དང་ལེན་དང་། ཆེད་ལས་བློས་འགེལ་ཆོག་པ། སྟབས་བདེ་དང་ཁྱབ་ནུས་ལྡན་པ། ཡོངས་བསྒྲགས་ཁ་གསལ་སོགས་བཙོངས་རྗེས་ཀྱི་ཞབས་ཞུའི་སྤྱིའི་རྩ་དོན་ཁག་4བཏོན་པས་ཐོན་སྐྱེད་མཁན་དང་། ཕྱིར་ཚོང་མཁན། དབང་སྤྲོད་ཞབས་ཞུའི་ཚོང་པ་སོགས་བཙོངས་རྗེས་ཀྱི་ཞབས་ཞུའི་རྩ་འཛུགས་དང་དེའི་ཞབས་ཞུ་བའི་བླང་བྱར་སྔར་བས་ཤུགས་སྣོན་བརྒྱབ་པ་རེད། དུས་བབ་གསར་པ་དང་ཟུང་འབྲེལ་བྱས་ནས་སྡེབ་སྐྱེལ་དང་། འགན་བཅོལ་ནར་འགྱངས། ཚུར་བསྡུ་སོགས་བཙོངས་རྗེས་ཀྱི་ཞབས་ཞུའི་རིགས་དང་དེ་བཞིན་དྲ་མིག་ཅན་དང་གྲངས་འཛིན་ཅན་གྱི་བཙོངས་རྗེས་ཀྱི་ཞབས་ཞུའི་བྱ་ཐབས་ཁ་གསབ་བྱས་ནས་འབྲེལ་ཡོད་འཛད་སྤྱོད་པའི་གྲངས་གཞིའི་གསང་དོན་སྲུང་བའི་བླང་བྱ་སོགས་ལ་སྔར་བས་ཤུགས་སྣོན་བརྒྱབ་པ་རེད།

ཚད་གཞི་གསར་པས་འཛད་ཟོག་མི་འདྲ་བའི་ཞིབ་ཕྲའི་ཁྱབ་ཁོངས་ཀྱི་བཙོངས་རྗེས་ཀྱི་ཞབས་ཞུའི་བླང་བྱ་འཐུས་སྒོ་ཚང་དུ་འགྲོ་རྒྱུར་སྤྱི་ཡོངས་ཀྱི་མཛུབ་ཁྲིད་བྱས་པ་དེས་འཛད་སྤྱོད་ཉམས་ལེན་ལེགས་སུ་གཏོང་བ་དང་འཛད་སྤྱོད་རིམ་སྤོར་ལ་སྐུལ་འདེད་གཏོང་རྒྱུར་ཕན་ཐོགས་ཡོད་ལ། འཛད་སྤྱོད་འཕེལ་བ་དང་ནང་མཁོ་རྒྱ་ཆེར་འགྲོ་རྒྱུར་དགེ་མཚན་ལྡན་པའི་དོན་སྙིང་ཡང་ལྡན་རྒྱུ་རེད།