ཉེ་ཆར། ཀྲུང་གོ་གནམ་གཤིས་ཅུས་ཀྱིས་འབྲུ་རིགས་སྐྱེ་དངོས་གཙོ་བོའི་སྦྲེལ་ཐག་ཧྲིལ་པོའི་ཞིང་ལས་གནམ་གཤིས་གནོད་འཚེའི་ཉེན་ཁའི་སྔོན་ཚུད་ཉེན་བརྡའི་ལས་གྲྭ་དངོས་སུ་སྐྲུན་འགོ་ཚུགས་པ་དང་། ལས་གྲྭ་དེས་དགུན་གྲོ་དང་། དབྱར་དུས་ཀྱི་མ་རྨོས་ལོ་ཏོག དཔྱིད་དུས་ཀྱི་མ་རྨོས་ལོ་ཏོག་སོགས་འབྲུ་རིགས་སྐྱེ་དངོས་གཙོ་བོའི་དུས་ཡུན་ཧྲིལ་པོའི་གནོད་འཚེའི་སྔོན་ཚུད་ཉེན་བརྡའི་མ་ལག་བསྐྲུན་ནས་འབྲུ་རིགས་ཐོན་སྐྱེད་བདེ་འཇགས་འགོག་སྲུང་འཛིང་རགས་བརྟན་པོ་འཛུགས་རྒྱུ་ཡིན་པ་རེད།

ངོ་སྤྲོད་བྱས་པར་གཞིགས་ན། ལས་གྲྭ་དེས་གནོད་འཚེའི་ཉེན་ཁའི་སྔོན་ཚུད་ཉེན་བརྡའི་སྦྲེལ་ཐག་གི་ཉམས་ཞན་ལྷུ་ཚིགས་ལ་དམིགས་ཏེ་སྲུང་སྐར་རྒྱང་ཚོར་དང་། འཕྲུལ་ཆས་སློབ་སྦྱོང་། གནམ་གཤིས་ཀྱི་གྲངས་གཞི་ཆེན་པོའི་ལག་རྩལ་བཅས་སྡེབ་སྒྲིག་བྱས་ཏེ་རྒྱལ་ཁབ་དང་ཞིང་ཆེན་མཉམ་འགུལ་གྱི་གནོད་འཚེའི་ཉེན་ཁའི་སྔོན་ཚུད་ཉེན་བརྡའི་མ་ལག་བཙུགས་ཡོད། བསྐྲུན་རྗེས་ལས་གྲྭ་དེས་རླུང་སྤྲིན་སྲུང་སྐར་གྲངས་གཞི་དང་སྤྱི་ལེ་གཅིག་གི་དབྱེ་འབྱེད་ཚད་གཞི་མཐོ་བའི་གནམ་གཤིས་གནས་ཚུལ་དངོས་དང་སྔོན་དཔག་འབྲས་བུར་བརྟེན་ནས་ལོ་ཏོག་འདེབས་འཛུགས་ཁྱབ་ཚུལ་འགུལ་རྣམ་ཅན་གྱི་བསྡུ་ལེན་བྱས་ཏེ། དགུན་གྲོ་སྐམ་ཤས་ཆེ་བ་དང་དབྱར་དུས་མ་རྨོས་ལོ་ཏོག་གི་དྲོད་ཚད་མཐོ་བའི་ཚ་གནོད་སོགས་གནོད་འཚེ་རིགས་10ལྷག་ཙམ་གྱི་ཉེན་ཁའི་གནས་ཚུལ་དུས་ཐོག་ཏུ་རྗེས་འདེད་བྱས་ནས་གནོད་འཚེའི་ཉེན་ཁའི་སྔོན་ཚུད་ཉེན་བརྡའི་དུས་ཡུན་ཉིན་30བར་རིང་དུ་གཏོང་རྒྱུ་ཡིན་པ་རེད།

གཞན་ཡང་ལས་གྲྭ་དེས་ཧོ་པེ་དང་ཨན་ཧུའེ་སོགས་ཞིང་ཆེན་བཞིར་རིག་ནུས་ལྟ་ཞིབ་ཚད་ལེན་སྒྲིག་ཆས་ཆ་ཚང་177ཚོད་ལྟའི་བཀོད་སྒྲིག་བྱས་ནས་ཞིང་ནང་དུ་ཚོད་ལྟ་བྱ་རྒྱུ་ཡིན་པ་རེད།

རྒྱལ་ཁབ་གནམ་གཤིས་ལྟེ་གནས་སྐྱེ་ཁམས་དང་ཞིང་ལས་གནམ་གཤིས་ཁང་གི་ཀྲུའུ་རེན་གཞོན་པ་ཧོ་ལེང་གིས་ལས་གྲྭ་དེ་2025ལོའི་ལོ་མཇུག་གོང་བསྐྲུན་ཟིན་པ་བྱ་རྒྱུ་དང་འབྲེལ་ལས་སྒོ་སྤེལ་རྩིས་ཡོད་པ་དང་སྐབས་དེར་རང་རྒྱལ་གྱི་འབྲུ་རིགས་སྐྱེ་དངོས་གཙོ་བོའི་གནམ་གཤིས་གནོད་འཚེའི་སྔོན་ཚུད་ཉེན་བརྡ་ཁྱབ་ཚད་95%ཡན་ཟིན་ནས“ཀྲུང་གོའི་ལྟོ་ཕོར”བརྟན་པོ་ཡོང་ཆེད་དེ་བས་སྟོབས་ལྡན་གྱི་གནམ་གཤིས་སྒུལ་ཤུགས་སྣོན་རྒྱུ་རེད་ཅེས་བཤད་པ་རེད།