《ཁ་ཕྲལ་ལ་ངོ་རྒོལ་བྱེད་པའི་རྒྱལ་ཁབ་ཀྱི་བཅའ་ཁྲིམས》ལག་བསྟར་བྱས་ནས་ལོ་20སོང་རིང་། མི་དམངས་དམག་དཔུང་གིས་ཏང་ཀྲུང་དབྱང་དང་ཀྲུའུ་ཞི་ཞི་ཅིན་ཕིང་གི་ཐབས་ཇུས་བཀོད་སྒྲིག་ལག་ལེན་མཐའ་གཅིག་ཏུ་བསྟར་བ་དང་། ཁྲིམས་ལྟར་ལས་འགན་དང་འགན་འཁྲི་བསྒྲུབས་པ། དངོས་འཐབ་ཅན་གྱི་དམག་སྦྱོང་དང་དམག་གྲབས་ལ་རྒྱུན་ཆད་མེད་པར་ཤུགས་སྣོན་བརྒྱབ་པ། རྒྱུན་རྣམ་ཅན་གྱི་གླིང་ཕྲན་སྐོར་བའི་སྐོར་ཞིབ་རྒྱུན་མཐུད་སྤེལ་བ། “མཉམ་འབྲེལ་རལ་གྲི་རྣོན་པོའི”ནང་སྦྱོང་རབ་དང་རིམ་པ་སྒྲིག་འཛུགས་ཞིབ་ཚགས་བཅས་བྱས་པ་ལས། “ཐའེ་དབན་རང་བཙན”གྱི་ཁ་ཕྲལ་ཕྱོགས་གཏོགས་ཟིལ་གྱིས་ནུས་ལྡན་མནན་པ་དང་། ཐའེ་དབན་མཚོ་འགག་གི་དུས་བབ་བརྟན་དུ་ནུས་ལྡན་བཏང་བ། རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་ལ་སྲུང་སྐྱོང་བརྟན་པོ་བྱས་ཡོད། 《ཁ་ཕྲལ་ལ་ངོ་རྒོལ་བྱེད་པའི་རྒྱལ་ཁབ་ཀྱི་བཅའ་ཁྲིམས》ནི“ཐའེ་དབན་རང་བཙན”གྱི་མགོ་ཐོག་ཏུ་འཕྱར་བའི་རལ་གྲི་རྣོན་པོ་ཞིག་དང་། ཐའེ་དབན་མཚོ་འགག་གི་ཞི་བདེ་བརྟན་ལྷིང་ལ་སྲུང་སྐྱོང་བྱེད་པའི་རྨང་རྡོ་གལ་ཆེན་ཞིག་ཡིན་པས། “ཐའེ་དབན་རང་བཙན”གྱི་ཁ་ཕྲལ་ལ་བཀག་འགོག་དང་མེས་རྒྱལ་ཡོངས་སུ་གཅིག་གྱུར་ཡོང་བའི་འཕེལ་རིམ་ལ་སྐུལ་འདེད་གཏོང་རིང་ནུས་པ་གལ་ཆེན་ཐོན་ཡོད། “ཐའེ་དབན་རང་བཙན”གྱི་ཁ་ཕྲལ་དང་དེ་བཞིན་ཕྱི་ཕྱོགས་ཀྱི་ཐེ་ཇུས་ཕྱོགས་གཏོགས་དང་ཡུན་རིང་འཐབ་རྩོད་ཁྲོད། མི་དམངས་དམག་དཔུང་ལ་ཆེས་རྒྱ་ཆེ་བའི་རྒྱལ་གཅེས་སྤུན་ཟླའི་བློ་བརྟན་འགྱུར་མེད་ཀྱི་རྒྱབ་སྐྱོར་ཐོབ་སྟེ། མི་རིགས་བསྐྱར་དར་གྱི་ཆེད་དུ་འཐབ་འཛིང་དང་མེས་རྒྱལ་ཡོངས་སུ་གཅིག་གྱུར་ཡོང་ཆེད་འཐབ་འཛིང་བྱེད་པའི་བརྗིད་ཆེའི་སྟོབས་ཤུགས་གཅིག་སྒྲིལ་ཐུབ་པས། འགྲན་སློང་མཐའ་དག་བསུ་བ་དང་དགྲ་བོ་མཐའ་དག་ཟིལ་གྱིས་གནོན་པའི་རྒྱལ་ངེས་ཀྱི་བློ་སྟོབས་བརྟན་དུ་ཕྱིན་ཡོད། ང་ཚོར་རྒྱལ་ཁབ་གཅིག་གྱུར་ལ་གཏོར་བཤིག་དང་རྒྱལ་ཁབ་ཁ་ཕྲལ་གཏོང་བའི་བྱེད་སྤྱོད་མཐའ་དག་རྡུལ་དུ་རློག་པའི་གདེང་ཚོད་དང་ནུས་པ་ཡོད་ལ། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་སྲུང་སྐྱོང་བྱེད་པའི་གདེང་ཚོད་དང་ནུས་པ་ཡང་ལྡན་པ་ལག་ལེན་ལས་ར་སྤྲོད་ཐུབ་ཡོད།

ཉེ་བའི་ལོ་ཤས་རིང་། རང་དམག་གིས་དམག་དཔུང་བཙུགས་ནས་ལོ་ངོ་བརྒྱ་འཁོར་བའི་འབད་འཐབ་དམིགས་ཚད་གཏན་འཁེལ་བྱས་ཏེ། རྒྱལ་སྲུང་དང་དམག་དཔུང་སྒྱུར་བཅོས་ཟབ་ཏུ་བཏང་བ་དང་། དེང་རབས་ཅན་འཛུགས་སྐྲུན་གྱི་གོམ་སྟབས་མགྱོགས་སུ་བཏང་བ། དངོས་འཐབ་ཅན་གྱི་མཉམ་འབྲེལ་སྦྱོང་བརྡར་ལ་ཕྱོགས་ཡོངས་ནས་ཤུགས་སྣོན་བརྒྱབ་པ། རྒྱལ་ཁབ་ཆེན་པོའི་མཚོན་ཆ་རྣོན་པོ་འབོར་ཆེན་གཅིག་རྗེས་གཉིས་མཐུད་དུ་སྒྲིག་སྦྱོར་བྱས་པ་བཅས་བརྒྱུད། ཆ་འཕྲིན་ཅན་དང་རིག་ནུས་ཅན་གྱི་དམག་འཁྲུག་ལ་རྒྱལ་ཁ་ལེན་པའི་ནུས་པ་མངོན་གསལ་དོད་པོས་ཇེ་ཆེར་སོང་བས། “ཐའེ་དབན་རང་བཙན”གྱི་ཁ་ཕྲལ་དང་ཕྱི་ཕྱོགས་ཀྱི་ཐེ་ཇུས་ཕྱོགས་གཏོགས་ལས་བྱུང་བའི་འཇིགས་སྐུལ་དང་འགྲན་སློང་ཡོད་ཚད་ལ་ཁ་གཏད་གཅོག་ཐུབ་ངེས་རེད། གལ་ཏེ“ཐའེ་དབན་རང་བཙན”གྱི་ཁ་ཕྲལ་པས་ལྐུགས་པ་ཨུ་ཚུགས་དང་ཐ་ན་འུ་ཐུག་ཉེན་མཆོང་བྱེད་པ་དང་། ཕྱི་ཕྱོགས་ཕྱོགས་གཏོགས་ཀྱིས་ཨུ་ཚུགས་ངང་ངོགས་གཉིས་ཀྱི་འབྲེལ་བ་ཛ་དྲག་ཏུ་གཏོང་བ་དང་ཟང་ཟིང་བཟོས་ཚེ། མི་དམངས་དམག་དཔུང་གིས་ཐའེ་དབན་མི་དམངས་ཚུད་པའི་རྒྱལ་ཡོངས་མི་དམངས་དང་མཉམ་དུ་དགོས་ངེས་ཀྱི་བྱེད་ཐབས་ཡོད་ཚད་སྤྱད་ནས། བཀག་འགོག་དྲག་པོ་དང་ཆད་པ་ནན་པོ་གཅོད་རྒྱུ་རེད། ཤར་རྒྱུད་དམག་ཁུལ་གྱིས་དུས་རབས་གསར་པར་ཏང་གིས་ཐའེ་དབན་གྱི་གནད་དོན་ཐག་གཅོད་བྱེད་པའི་སྤྱི་ཡོངས་ཀྱི་ཐབས་ཇུས་ལག་བསྟར་མཐའ་གཅིག་ཏུ་བྱེད་པ་དང་ལོ་རྒྱུས་ཀྱིས་དཀྲིས་པའི་གཟི་བརྗིད་ལྡན་པའི་འགན་འཁྲི་བློ་བརྟན་འགྱུར་མེད་ངང་ཁུར་ནས། དུས་དང་རྣམ་པ་ཀུན་ཏུ་དམག་གྲབས་བྱས་ཏེ་ནམ་ཡང་འཐབ་ཐུབ་པའི་ཚད་མཐོའི་དོགས་ཟོན་རྒྱུན་འཁྱོངས་བྱེད་པ་དང་དེ་བས་བློས་འགེལ་ཆོག་པའི་བྱེད་ཐབས་དང་དེ་བས་སྟོབས་ཆེ་བའི་ནུས་པ་བཏོན་ཏེ། མེས་རྒྱལ་ཡོངས་སུ་གཅིག་གྱུར་ལ་སྲུང་སྐྱོང་བྱ་ཆེད། དམག་དོན་གྱི་གྲ་སྒྲིག་གང་ལེགས་དང་ཏན་ཏིག་བྱེད་ཀྱི་ཡིན།

—— 《ཁ་ཕྲལ་ལ་ངོ་རྒོལ་བྱེད་པའི་རྒྱལ་ཁབ་ཀྱི་བཅའ་ཁྲིམས》ལག་བསྟར་བྱས་ནས་ལོ་20འཁོར་བའི་བཞུགས་མོལ་ཚོགས་འདུའི་ཐོག་གི་གཏམ་བཤད་ལས་བཏུས།