འདི་ནི་སི་མཱ་ཝུན་ཧྥེ་ཡིས་རྒྱ་ཆས་གྱོན་ནས་བརྙན་ཐུང་པར་ལེན་བྱེད་བཞིན་པ།

འདི་ནི་2024ལོའི་ཟླ་དགུ་པར་ཧོ་ནན་ཅའོ་ཙུའོ་གྲོང་ཁྱེར་དབུན་རྫོང་ཁྲེན་ཅ་ཀོའུ་ཡི་ཐའེ་ཅི་དྲག་རྩལ་གྱི་འཇིམ་བརྙན་ཐང་ཆེན་དུ་ཀྲུང་གོའི་དྲག་རྩལ་པ་ཞིག་གིས་ཕྱི་རྒྱལ་གྱི་སློབ་མར་ཐའེ་ཅི་དྲག་རྩལ་སློབ་བཞིན་པ། (ཞུས་ཧུང་ཤིན་གྱིས་པར་བླངས)

འདི་ནི་ཧོ་ཤིན་ཝུའུ་འཛམ་གླིང་གི་རྒྱ་རིག་པ་མཁས་ཅན་གྱི་ཚོགས་ཆེན་སྐབས་གཉིས་པ་འཚོག་པའི་བར་གསེང་དུ་ཐའེ་ཅི་དྲག་རྩལ་ངོམ་སྟོན་བྱེད་བཞིན་པ། (བཅར་འདྲི་དང་ལེན་མཁན་གྱིས་པར་རིས་མཁོ་འདོན་བྱས)

འདི་ནི་ཅིའུ་པའོ་ཧུད་ཤིན་གྱིས་གླེང་སྟེགས་སུ་གཏམ་བཤད་སྤེལ་ནས་ཀྲུང་གོའི་རྩྭ་སྨན་རིག་པའི་ཞིབ་འཇུག་གྲུབ་འབྲས་ངོ་སྤྲོད་བྱེད་བཞིན་པ། (བཅར་འདྲི་དང་ལེན་མཁན་གྱིས་པར་རིས་མཁོ་འདོན་བྱས)

འདི་ནི་2025ལོའི་ཟླ་2ཚེས་9ཉིན་སུའེ་ཙེར་གྱི་རི་ནེ་ཝའི་རྒྱ་ཡིག་སློབ་གྲྭའི་སློབ་མ་གཉིས་ཀྱིས་2025ལོའི་སྦྲུལ་ལོའི་དཔྱིད་གསར་དུས་ཆེན་གྱི་མཉམ་སྤྲོའི་འདུ་ཚོགས་སུ་རང་ཉིད་ཀྱིས་བྲིས་པའི་ཀྲུང་གོའི་ཡིག་གཟུགས་སྟོན་བཞིན་པ། (ཤིན་ཧྭ་གསར་འགྱུར་ཁང་གི་གསར་འགོད་པ་ལན་ཆིས་པར་བླངས)

འདི་ནི་2024ལོའི་ཟླ་བཅུ་གཅིག་པར་ཀྲེ་ཅང་ཞིང་ཆེན་ཧང་ཀྲོའུ་གྲོང་ཁྱེར་ཐུང་ལུའུ་རྫོང་ཧྥང་ཧུའེ་ཁྲུན་ཐང་ཐུང་ལུའུ་དྲག་རྩལ་ཁང་དུ་འཇར་མན་གྱི་སློབ་འབྲིང་སློབ་མས་ཀྲུང་ལུགས་གསོ་རིག་གི་ཤེས་བྱ་སྦྱོང་བཞིན་པ། (ཞུས་ཅུན་ཡུང་གིས་པར་བླངས)

འདི་ནི་2024ལོའི་ཟླ་བཅུ་པར་འཛམ་གླིང་རྒྱ་རིག་པ་མཁས་ཅན་གྱི་ཚོགས་ཆེན་སྐབས་གཉིས་པ་ཧྥུའུ་ཅན་གྱི་ནན་ཕིང་དུ་འཚོགས་པ་དང་། ཚོགས་ཞུགས་སྐུ་མགྲོན་ཚོས་སྤེལ་རེས་གཏིང་ཟབ་བྱེད་བཞིན་པ། (ཀྲང་པིན་གྱིས་པར་བླངས)

སི་ལོ་ཝེ་ཉི་ཡའི་རྒྱ་རིག་པ་སྤེལ་རེས་ལྷན་ཚོགས་ཀྱི་དྲུང་ཆེ་སི་མཱ་ཝུན་ཧྥེ་ཡིས་བརྗོད་དོན།

“ཀྲུང་ཧྭའི་སྲོལ་རྒྱུན་རིག་གནས་ནི་རྒྱ་ཆེ་ལ་གཏིང་ཟབ་པ་ཞིག་ཡིན་པའི་མྱོང་ཚོར་བྱུང”

  འདི་ག་ཚགས་པར་གྱི་གསར་འགོད་པ། སུང་ཧའོ་ཤིན།

སི་མཱ་ཝུན་ཧྥེ་ཡིས་ཀྲུང་གོའི་མིང་རྒྱལ་རབས་སྐབས་ཀྱི་རུའུ་ལུགས་དང་། རིག་གནས་ཀྱི་ཁྱབ་ཁོངས་སྒྲོལ་ནས་བརྟག་ཐབས་སྨྲ་བར་ཞིབ་འཇུག་ཟབ་མོ་བྱས་ཡོད། ཁོང་གིས་ཀྲུང་གོའི་རིག་གནས་ངོ་མ་རྟོགས་པར་སློབ་སྦྱོང་གཏིང་ཟབ་དང་མྱོང་བ་དངོས་ནང་ཞུགས་ཚེ་གཞི་ནས་ཤེས་རྟོགས་ཐུབ་པ་ཞིག་ཡིན་པའི་ངོས་འཛིན་བྱས་ཤིང་། ཁོང་གིས“ཀྲུང་གོ་ནི་ལོ་ངོ་ལྔ་སྟོང་ལྷག་ཙམ་གྱི་ཤེས་དཔལ་ལོ་རྒྱུས་ལྡན་པའི་རྒྱལ་ཁབ་ཅིག་ཡིན་པ་དང་། རྒྱ་རིག་པར་ཞིབ་འཇུག་བྱེད་རིང་། ཀྲུང་ཧྭའི་སྲོལ་རྒྱུན་རིག་གནས་ནི་རྒྱ་ཆེ་ཞིང་གཏིང་ཟབ་པ་ཞིག་ཡིན་པ་མྱོང་ཚོར་ཟབ་མོ་བྱུང་བ་མ་ཟད། ལྷག་པར་དུ་ཀྲུང་གོའི་མཚན་ཉིད་རིག་པ་དང་དེང་རབས་ཀྲུང་གོས་ཡིད་དབང་བཀུག་སོང”ཞེས་བཤད།

སི་མཱ་ཝུན་ཧྥེ་ཡིས། “ཞི་བདེ་ནི་འཛམ་གླིང་རྒྱལ་ཁབ་ཁག་གི་མི་དམངས་བདེ་སྡོད་ལས་བརྩོན་ཡོང་བའི་གཞི་རྩའི་སྔོན་འགྲོ་ཞིག་ཡིན་པ་དང་། འཕེལ་རྒྱས་གཏོང་བ་ནི་གོ་ལ་ཧྲིལ་པོའི་གནད་དོན་མང་པོ་ཐག་གཅོད་བྱེད་པའི་འགག་རྩ་ཞིག་ཡིན་སྟབས། མིའི་རིགས་ཀྱིས་ཞི་བདེ་དང་འཕེལ་རྒྱལ་ལ་བརྟེན་ནས་ཕུགས་འདུན་མངོན་འགྱུར་ཡོང་བར་བྱེད་དགོས་པས། གོ་ལ་ཧྲིལ་པོའི་ཤེས་དཔལ་གྱིས་མིའི་རིགས་ཡོངས་ཀྱི་ཐུང་མོང་རིན་ཐང་དར་སྤེལ་གཏོང་བའི་གྲོས་འགོ་བཏོན་པ་དེས་འཛམ་གླིང་གི་ཤེས་དཔལ་མཐའ་དག་ལག་གདང་སྦྲེལ་ནས་ཐུན་མོང་གི་འགྲན་སློང་ལ་ཁ་གཏད་གཅོག་པར་དོན་སྙིང་ཆེན་པོ་ལྡན་ཡོད”ཅེས་བཤད།

པར་ཙིར་སུན་པིན་དྲག་རྩལ་མཐུན་ཚོགས་ཀྱི་ཀྲུའུ་རེན་ཧོ་ཤིན་ཝུའུ་ཡིས་བརྗོད་དོན།

“དྲག་རྩལ་སྦྱོང་བ་ལས་ཀྲུང་ཧྭའི་སྲོལ་རྒྱུན་རིག་གནས་ཐད་ཀར་ཤེས་རྟོགས་བྱེད་ཐུབ”

འདི་ག་ཚགས་པར་གྱི་གསར་འགོད་པ། སུན་དབྱི་རེན།

པར་ཙིར་སུན་པིན་དྲག་རྩལ་མཐུན་ཚོགས་ཀྱི་ཀྲུའུ་རེན་ཧོ་ཤིན་ཝུའུ་ཡིས། “དྲག་རྩལ་ནི་ལུས་རྩལ་གྱི་རྣམ་གྲངས་ཙམ་མ་ཡིན་པར་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་གཞི་རྟེན་གྱི་གྲས་ཤིག་ཡིན་པས། དྲག་རྩལ་སྦྱོང་བ་ལས་ཀྲུང་ཧྭའི་སྲོལ་རྒྱུན་རིག་གནས་ཐད་ཀར་ཤེས་རྟོགས་བྱེད་ཐུབ་པའི”ངོས་འཛིན་བྱས་ཤིང་། ཀྲུང་གོས་དེང་རབས་ཅན་ལ་སྐུལ་འདེད་གཏོང་རིང་། སྔ་བར་ཕྱི་གསུམ་དུ་ཀྲུང་ཧྭའི་ཕུལ་བྱུང་རིག་གནས་ཀྱི་གཞི་རྩ་མི་ཉམས་པར་བྱས་པས། ཁོང་གིས་སློབ་ཁྲིད་བྱེད་རིང་རྟག་ཏུ་ཀྲུང་གོའི་རིག་གནས་དང་བསྟན་བཅོས་གྲགས་ཅན་སྐོར་ལ་བགྲོ་གླེང་བྱས་ཏེ་སློབ་མ་རྣམས་ལ་ཀྲུང་གོའི་མཚན་ཉིད་རིག་པའི་རིན་ཐང་ལྟ་བ་བརྒྱུད་སྤེལ་གྱིས་ཁོང་ཚོས་ཀྲུང་གོའི་ལོ་རྒྱུས་དང་རིག་གནས་ཤེས་རྟོགས་སྔར་བས་ཟབ་མོ་ཡོང་བར་བྱེད་ཀྱི་ཡོད།

ན་ནིང་ཀྲུང་གོ་དང་པར་ཙིར་ཕྱི་འབྲེལ་བཙུགས་ནས་ལོ་50འཁོར་རིང་། ཧོ་ཤིན་ཝུའུ་དྲན་གསོ་ཞུ་བའི་གསུང་རྩོམ་གཅེས་བཏུས《པར་ཙིར་དང་ཀྲུང་གོའི་དབར་ཕྱི་འབྲེལ་བཙུགས་ནས་ལོ་50འཁོར་བ》ཞེས་པའི་རྩོམ་འབྲིའི་ནང་ཞུགས་ཏེ་དུས་རབས་ཕྱེད་ཀ་ཙམ་གྱི་རྒྱལ་ཁབ་གཉིས་པོའི་མཛའ་གྲོགས་ཟབ་མོར་ལག་རྟགས་ཕུལ་ཞིང་། ཁོང་གིས་རིག་གནས་སྤེལ་རེས་ནི་རྒྱལ་ཁབ་གཉིས་པོའི་མཛའ་གྲོགས་དང་མཉམ་ལས་ཟབ་ཏུ་གཏོང་བའི་ཐབས་ལམ་གལ་ཆེན་ཞིག་ཡིན། ཀྲུང་གོ་འཕེལ་རྒྱས་ཕྱིན་པ་དང་སྦྲགས། པར་ཙིར་བ་དེ་བས་མང་བས་ཀྲུང་གོའི་རིག་གནས་ལ་དགའ་པོ་བྱེད་ཀྱི་ཡོད་པས། “རིག་གནས་སྤེལ་རེས་དང་མཉམ་ལས་བརྒྱུད་པར་ཙིར་དང་ཀྲུང་གོའི་མི་དམངས་དབར་གྱི་བར་ཐག་ཉེ་རུ་ཕྱིན་ནས་ཕན་ཚུན་ཤེས་རྟོགས་དང་ཡིད་ཆེས་ཟབ་ཏུ་ཕྱིན་ཏེ་རྒྱལ་ཁབ་གཉིས་པོའི་འབྱུང་འགྱུར་གྱི་མཉམ་ལས་ལ་རྨང་གཞི་བརྟན་པོ་ཞིག་བཏིང་ནས་པར་ཙིར་བ་དེ་བས་མང་བས་རིག་གནས་སྤེལ་རེས་དང་མཉམ་ལས་བརྒྱུད་ཀྲུང་གོ་ཤེས་རྟོགས་ཐུབ་པའི་རེ་བ་བྱེད་ཀྱི་ཡོད”ཅེས་བཤད།

རི་པིན་ཧེང་པིན་ཚོང་དོན་སློབ་ཆེན་གྱི་དགེ་རྒན་ཆེ་མོ་བ་གཞོན་པ་ཅིའུ་པའོ་ཧུད་ཤིན་གྱིས་བརྗོད་དོན།

“མི་དེ་བས་མང་བས་ཀྲུང་གོའི་རྩྭ་སྨན་རིག་པའི་རིན་ཐང་ཤེས་རྟོགས་ཐུབ་པའི་རེ་བ་བྱེད་ཀྱི་ཡོད”

འདི་ག་ཚགས་པར་གྱི་གསར་འགོད་པ། ཀྲུའུ་གཡོད་ཡིང་།

རི་པིན་ཧེང་པིན་ཚོང་དོན་སློབ་ཆེན་གྱི་དགེ་རྒན་ཆེ་མོ་བ་གཞོན་པ་ཅིའུ་པའོ་ཧུད་ཤིན་གྱིས“རྩྭ་སྨན་རིག་པ་ནི་ཀྲུང་ཧྭའི་ཤེས་དཔལ་གྱི་མཆོག་ནོར་ཞིག་ཡིན་པ་དང་། དེའི་ནང་སྨན་རྒྱུའི་འབྱུང་ཁུངས་དང་། འཕེལ་རྒྱས། བེད་སྤྱོད་བཅས་ཀྱི་ལོ་རྒྱུས་བཀོད་ཡོད་པ་མ་ཟད། མཚེ་ལྡུམ་བ་ཚྭ་དང་སྔོ་སྐྱའི་རྒྱུ་སོགས་གསོ་རིག་ཞིབ་འཇུག་གལ་ཆེན་ལ་ཆ་འཕྲིན་གྱི་འབྱུང་ཁུངས་མཁོ་འདོན་ཡང་བྱས་ཡོད་པས། ངས་འབད་བརྩོན་བྱས་ཏེ་མི་དེ་བས་མང་བས་ཀྲུང་གོའི་རྩྭ་སྨན་རིག་པའི་མཆོག་ནོར་གྱི་ནོར་ཉམས་ཆོད་རྒྱུའི་རེ་བ་ཡོད”ཅེས་རྒྱ་སྐད་ཐོག་ནས་གསར་འགོད་པར་བཤད།

“གོ་ལ་ཧྲིལ་པོའི་ཤེས་དཔལ་གྱི་གྲོས་འགོས་རྒྱལ་སྤྱིའི་མི་ཆོས་རིག་གནས་སྤེལ་རེས་དང་མཉམ་ལས་ལ་ཤུགས་སྣོན་རྒྱག་རྒྱུ་དེ་གོ་ལ་ཧྲིལ་པོའི་ཤེས་དཔལ་དབར་སྐད་ཆ་ཤོད་རེས་ཀྱི་མཉམ་ལས་དྲ་བ་གཏོད་པར་འཚོལ་ཞིབ་བྱས་ནས་སྤེལ་རེས་ཀྱི་ནང་དོན་ཕུན་སུམ་ཚོགས་སུ་གཏོང་བ་དང་། མཉམ་ལས་ཀྱི་ཐབས་ལམ་རྒྱ་སྐྱེད་བཏང་ནས་རྒྱལ་ཁབ་ཁག་གི་མི་དམངས་རྣམས་ཕན་ཚུན་ཤེས་རྟོགས་དང་འཆམ་མཐུན་ཡོང་བར་སྐུལ་འདེད་གཏོང་བ་དང་མིའི་རིགས་ཀྱི་ཤེས་དཔལ་འཕེལ་རྒྱས་ཡར་ཐོན་ཡོང་བར་མཉམ་དུ་སྐུལ་མ་གཏོང་དགོས་པ་དར་སྤེལ་བཏང་ཡོད”ཅེས་ཅིའུ་པའོ་ཧུད་ཤིན་གྱིས་བཤད་པ་དང་། ཁོང་གིས“ཤེས་དཔལ་དབར་སྐད་ཆ་ཤོད་རེས་བྱས་ཚེ། རི་པིན་དང་ཀྲུང་གོ་རྒྱལ་ཁབ་གཉིས་དབར་རིག་གནས་ཀྱི་ནང་དོན་ཕུན་སུམ་ཚོགས་སུ་ཕྱིན་ནས་མི་དམངས་དབར་ཕན་ཚུན་ཤེས་རྟོགས་ཟབ་ཏུ་ཕྱིན་ནས་གསར་གཏོད་ཀྱི་གསོན་ཤུགས་སྔར་ལས་མང་བ་འཕེལ་ཐུབ”ཅེས་བཤད།