གསར་འགོད་པས་ཀྲུང་གོ་རྒྱལ་ཁབ་ལྕགས་ལམ་ཚོགས་པ་ཚད་ཡོད་ཀུང་སི་ནས་ཤེས་རྟོགས་བྱས་པར། འདི་ལོའི་ཟླ་དང་པོ་དང་གཉིས་པར། རྒྱལ་ཁབ་ལྕགས་ལམ་གྱིས་རིམ་རྩིས་བརྒྱབ་ན་དངོས་ཟོག་ཏུན་དུང་ཕྱུར་6.22སྐྱེལ་འདྲེན་བྱས་པ་དེ་དུས་མཚུངས་ལས་2%འཕར་ཡོད། ཉིན་རེར་ཆ་སྙོམས་དངོས་ཟོག་རླངས་འཁོར་ཁྲི་17.5བླུགས་ཀྱི་ཡོད་པ་དེ་དུས་མཚུངས་ལས་3.5%འཕར་པ་རེད།

གློག་འདོན་དང་དྲོད་ལེན་ཐད་སྤྱོད་པའི་རྡོ་སོལ་གྱི་སྐྱེལ་འདྲེན་འགན་ལེན་ནུས་ལྡན་བྱས་ཡོད། ཟླ་དང་པོ་དང་གཉིས་པར་རྒྱལ་ཁབ་ལྕགས་ལམ་གྱིས་རྡོ་སོལ་ཏུན་དུང་ཕྱུར་3.01སྐྱེལ་འདྲེན་བྱས་པའི་ནང་གློག་སྤྱོད་རྡོ་སོལ་ཏུན་དུང་ཕྱུར་2.32སྐྱེལ་འདྲེན་བྱས་པ་དང་ལྕགས་ལམ་ཐད་གཏོང་གློག་ཁང་གི་རྡོ་སོལ་གསོག་འཇོག་ཚད་གཞི་ཅུང་མཐོ་པོ་རྒྱུན་འཁྱོངས་བྱས་ཡོད།

དམངས་འཚོའི་གཙོ་གནད་དངོས་ཟོག་སྐྱེལ་འདྲེན་བྱས་པར་ཕན་འབྲས་མངོན་གསལ་ཐོབ་ཡོད། དཔྱིད་གསར་དུས་ཆེན་རྗེས། ལྕགས་ལམ་སྡེ་ཚན་གྱིས་འབྲུ་རིགས་དང་དཔྱིད་འདེབས་དངོས་ཟོག་སྐྱེལ་འདྲེན་འགན་ལེན་བྱེད་ཤུགས་ཆེ་རུ་བཏང་ནས། ལྗང་མདོག་བགྲོད་ལམ་བཏོད་དེ་ནུས་ཆེའི་སྐྱེལ་འདྲེན་འགན་ལེན་བྱས་པ་དང་ཟླ་2པར་འབྲུ་རིགས་དང་། རྫས་ལུད། ཞིང་སྨན་བཅས་སྐྱེལ་འདྲེན་བྱེད་ཚད་དུས་མཚུངས་ལས་33.2%དང་2.7%སོ་སོར་འཕར་ཡོད།

ལྕགས་ལམ་ཟོག་འགྲེམས་ཞབས་ཞུའི་སྤུས་ཚད་རྒྱུན་མཐུད་ངང་མཐོ་རུ་ཕྱིན་ཡོད། ཟོག་འགྲེམས་ཀྱིས་ཚང་མ་འགན་གཙང་ལེན་པའི་ཞབས་ཞུ་འཕེལ་རྒྱས་ཤུགས་ཆེན་བཏང་ནས་དངོས་ཟོག་འབོར་ཆེན་གཞུང་ལམ་སྐྱེལ་འདྲེན་ནས་ལྕགས་ལམ་སྐྱེལ་འདྲེན་དུ་སྒྱུར་གྱུར་སྐུལ་འདེད་བཏང་ཡོད། སྤྱི་ཚོགས་ཡོངས་ཀྱི་ཟོག་འགྲེམས་མ་གནས་དམའ་རུ་གཏོང་རྒྱུར་དམིགས་ནས། མཚོ་ཐོག་སྐྱེལ་འདྲེན་ཁེ་ལས་4དང་མཉམ་ལས་བྱས་ཏེ་དོས་སྒམ་མཉམ་དུ་སྐྱེལ་འདྲེན་གྱི“འཛིན་ཡིག་གཅིག་ལམ་ལུགས”ཀྱི་སྐྱེལ་འདྲེན་ཞབས་ཞུ་སྤེལ་བ་དང་། ཚོང་ལས་དངུལ་ཁང་9དང་མཉམ་ལས་བྱས་ཏེ་ལྕགས་ལམ་ཟོག་འགྲེམས་དངུལ་རྩའི་ཞབས་ཞུ་སྤེལ་ཡོད། ཟླ་དང་པོ་དང་གཉིས་པར་རྒྱལ་ཁབ་ལྕགས་ལམ་གྱིས་དོས་སྒམ་སྐྱེལ་འདྲེན་བྱེད་ཚད་ཏུན་དུང་ཕྱུར་1.29ལེགས་གྲུབ་བྱུང་བ་དེ་དུས་མཚུངས་ལས་14.6%འཕར་ཡོད།