སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འདི་ལོའི་རྒྱལ་ཡོངས་ཀྱི་ཚོགས་འདུ་གཉིས་ཀྱི་ཐོག“འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱས་ཏེ་རྒྱལ་ནང་དང་རྒྱལ་སྤྱིར་སྤྱི་འདོམས་བྱེད་པ་དང་། གྲོང་ཁྱེར་དང་གྲོང་གསེབ་མཉམ་འདྲེས་དང་ས་ཁོངས་མཉམ་འགུལ་ལ་དམ་འཛིན་ཡག་པོ་བྱེད་པ། ཐོན་སྐྱེད་ནུས་ཤུགས་ཀྱི་བཀོད་པ་ལེགས་སུ་གཏོང་བ་བཅས་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་དགོས”དང“དཔལ་འབྱོར་ཞིང་ཆེན་ཆེན་པོས་རྒྱལ་ཁབ་ཀྱི་འཕེལ་རྒྱས་འཐབ་ཇུས་གལ་ཆེན་དོན་འཁྱོལ་བྱེད་པའི་ཐད་འགན་འཁྲི་དེ་བས་ཆེ་བ་འཁུར་དགོས”ཞེས་ནན་བཤད་གནང་ཡོད།

དཔལ་འབྱོར་ཞིང་ཆེན་ཆེན་པོ་ཞིག་ཡིན་པའི་ཧོ་ནན་གྱིས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་བཏང་ནས་ཆུ་ཚད་མཐོ་བའི་སྒོ་མོ་འབྱེད་རྒྱ་ཆེ་རུ་བཏང་ཡོད། ཟླ་3ཚེས་12ཉིན། རྒྱལ་ཁབ་ལྕགས་ལམ་ཚོགས་པ་ཀྲེང་ཀྲོའུ་ཅུས་ཕུའུ་ཐེན་བབས་ཚུགས་སུ་འཕྲུལ་ཆས་སྒྲིག་ཆས་དང་། གློག་རྡུལ་ཐོན་རྫས། ནུས་རྒྱུ་གསར་པའི་རླངས་འཁོར་སོགས་བྱུར་བུར་བླུགས་པའི་ཀྲུང་ཡོའི་དུས་གཏན་མེ་འཁོར(ཀྲེང་ཀྲོའུ)ཡོ་རོབ་ལ་ཐོན་པ་དང་། གཞོགས་གཞན་ཞིག་གི་ལས་སྒྲུབ་ཁུལ་དུ་འཇར་མན་དང་ཕོ་ལན་སོགས་ཀྱི་རྒུན་ཆང་དང་། དཀར་ཆུའི་ཐོན་རྫས། རླངས་འཁོར་གྱི་ལྷུ་ལག་སོགས་དངོས་ཟོག་རྒྱལ་ཡོངས་ཀྱི་ཁྲོམ་རར་ནུས་ཕྱོད་ཆེན་པོས་ཁག་བགོས་མཁོ་འདོན་བྱེད་བཞིན་ཡོད།

ཉེ་ཆར་འཚོགས་པའི་ཧོ་ནན་གྱིས་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོར་ཞབས་འདེགས་ཞུ་བ་དང་མཉམ་འདྲེས་བྱེད་པའི་ཚོགས་ཆེན་ཐོག་ཧོ་ནན་ཞིང་ཨུད་ཀྱི་ཧྲུའུ་ཅི་ལིའུ་ཉིང་གིས། ཧོ་ནན་གྱིས་དཔལ་འབྱོར་འཁོར་རྒྱུག་ཤར་གཏོང་ཐུབ་པའི་རྩ་བ་དང་ཁྲོམ་ར་གཉེར་སྐྱོང་སྟབས་བདེའི“རྒྱུ་རྐྱེན་གཙོ་བོ”འདིར་དམ་འཛིན་ནན་པོ་བྱས་ནས་མ་འཇོག་དང་། ཐོན་སྐྱེད། ཚོང་དོན། འཁོར་རྒྱུག འཛད་སྤྱོད་སོགས་ལྷུ་ཚིགས་ཁག་གི་བརྒྱུད་རིམ་ཧྲིལ་པོ་སྟབས་བདེ་ཅན་ལ་འགྱུར་བར་སྐུལ་འདེད་ཤུགས་ཆེན་བཏང་སྟེ། སྲིད་ཇུས་ཀྱི་ཁེ་སྤོགས་དང་སྒྱུར་བཅོས་ཀྱི་ཁེ་སྤོགས་སྤུས་ཚད་མཐོ་བའི་འཕེལ་རྒྱས་ཀྱི་ཕན་འབྲས་དངོས་ལ་འགྱུར་བར་བྱེད་ཀྱི་ཡིན་ཞེས་བརྗོད།

དཔལ་འབྱོར་འཁོར་རྒྱུག་ཤར་གཏོང་ཐུབ་པ་བྱས་ནས་ལྟེ་བའི་དཔལ་འབྱོར་དང་བགྲོད་ལམ་དཔལ་འབྱོར་འཕེལ་རྒྱས་སྟོབས་ཆེར་བཏང་ཡོད། འདི་ལོའི་ཟླ་དང་པོར། ཀྲོའུ་ཁོའུ་ལྟེ་བའི་གྲུ་ཁ་གཅིག་སྡུད་སྐྱེལ་འདྲེན་ལྕགས་ལམ་གྱི་ཆེད་སྤྱོད་ལམ་ཐིག་རྣམ་གྲངས་སྐྲུན་འགོ་ཚུགས་ཡོད། རྣམ་གྲངས་བསྐྲུན་རྗེས། ཀྲོའུ་ཁོའུ་ལྟེ་བའི་གྲུ་ཁ་ཁུལ་དེ་ཉིད་ལུའོ་ཧྥུ་ལམ་ཐིག་དང་། ཅིང་ཀོང་ལམ་ཐིག ཅིང་ཅིའུ་ལམ་ཐིག་སོགས་ལྕགས་ལམ་ཨ་མ་དང་འབྲེལ་མཐུད་ནུས་ལྡན་ཐུབ་པར་བྱས་ནས་གྲུ་ཁ་དང་ཉེ་བའི་ཁེ་ལས་ཀྱི་སྐྱེལ་འདྲེན་དགོས་མཁོ་སྐོང་རྒྱུ་རེད།

“ཧོ་ནན་གྱིས་ལྕགས་ལམ་རྒྱ་སྐྱེད་བཏང་ནས་ལམ་དྲ་སྐྲུན་པ་དང་། གནམ་ཐང་གི་ལྟེ་བའི་ཁུལ་རྒྱ་ཆེར་བཏང་ནས་ལམ་བུ་མང་དུ་གཏོང་བ། གཞུང་ལམ་འདུས་ཆེའི་སྤུས་ཚད་མཐོ་རུ་གཏོང་བ། ཆུ་ཐོག་སྐྱེལ་འདྲེན་གཙང་པོ་དང་རྒྱ་མཚོར་ཤར་གཏོང་ཐུབ་པ་བཅས་ཀྱི“ལས་གྲྭ་ཆེན་པོ་བཞི”གཙོ་གནད་ཐོག་ལག་བསྟར་བྱས་ཏེ། རྒྱལ་ཁབ་ཀྱི་ཟོག་འགྲེམས་ལྟེ་གནས་མྱུར་ལ་སྤུས་ཚད་མཐོ་པོས་བསྐྲུན་ཡོད”ཅེས་ཧོ་ནན་ཞིང་ཆེན་འཕེལ་སྒྱུར་ཨུ་ལྷན་གྱི་ཏང་ཙུའི་ཧྲུའུ་ཅི་དང་ཀྲུའུ་རེན་མཱ་ཅན་གྱིས་བརྗོད།

ཁྲོམ་ར་གཉེར་སྐྱོང་སྟབས་བདེ་རུ་བཏང་ནས་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོར་ཞབས་འདེགས་ཞུས་ཡོད། ཅི་ཡོན་གྲོང་ཁྱེར་ཁྲོམ་ར་ལྟ་འདོམས་ཅུས་ཀྱིས་ཁེ་ལས་གནས་སྤོའི“དོན་དག་གཅིག”སྒྱུར་བཅོས་ལ་སྐུལ་འདེད་བཏང་བས་སྤོ་ཡོང་བ་དང་། སྤོ་འགྲོ་བ། སྒྱུར་བཅོས་ཐོ་འགོད་སོགས་ཀྱི་ལྷུ་ཚིགས་5“སྐར་ཁུང་གཅིག་གིས་བདག་སྤྲོད་དང་དྲ་ཐོག་གཅིག་ནས་སྒྲུབ་གཉེར”བྱེད་པས་སྒྲུབ་གཉེར་དུས་ཚོད་ཉིན་3ནས་སྐར་མ་10བར་ཐུང་དུ་ཕྱིན་ཡོད།

“ང་ཚོས་ལྟ་འདོམས་ཁྲིམས་སྒྱུར་སྲིད་ཇུས་ཀྱི་བརྟན་པོའི་རང་བཞིན་དང་སྔོན་དཔག་ཐུབ་པའི་རང་བཞིན་རྒྱུན་མཐུད་ཆེ་རུ་བཏང་ནས། ལྟ་འདོམས་ཐད་མུ་མཐུད་ཤུགས་སྣོན་རྒྱག་གི་ཡིན”ཞེས་ཧོ་ནན་ཞིང་ཆེན་ཁྲོམ་ར་ལྟ་འདོམས་ཅུས་ཀྱི་ཏང་ཙུའི་ཧྲུའུ་ཅི་ཝང་ཤིན་ཧུའེ་ཡིས་བརྗོད།

མྱུར་བགྲོད་ལྕགས་ལམ་དྲ་བ་ཕྱོགས་བཞི་མཚམས་བརྒྱད་ལ་ཁྱབ་པ་དང“མཁའ་ལམ་དར་གོས་ལམ་བུས”ཀྲུང་ཕྱི་འབྲེལ་མཐུད་ཐུབ་ཡོད། པི་ཡ་ཏི་ཡིས་ནུས་རྒྱུ་གསར་པའི་རླངས་འཁོར་ཧྲིལ་པོའི་རྟེན་གཞི་བསྐྲུན་པ་དང་ཉིང་ཏེ་དུས་རབས་སྒུལ་ཤུགས་གློག་རྫས་རྣམ་གྲངས་དོན་འཁྱོལ་ཐུབ་པ་སོགས་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོར་ཞབས་འདེགས་ཞུ་བ་དང་མཉམ་འདྲེས་ཧུར་ཐག་བྱས་པས། ཧོ་ནན་དེ་ཉིད་རྒྱུ་རྐྱེན་གཙོ་བོ་གཅིག་སྡུད་ཀྱི“ཁབ་ལེན་ར་བ”དང་མ་འཇོག་ལས་དར་གྱི“ས་རྒྱུ་གཤིན་པོར”འགྱུར་བཞིན་ཡོད་པ་རེད།