མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། གསར་འགོད་པས་ཟི་ལིང་འགག་སྒོ་ལས་ཁུངས་དང་མཚོ་སྔོན་ཞིང་ཆེན་ཚོང་དོན་ཐིང་གི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱས་པར། 2025ལོའི་ཟླ་དང་པོ་དང་གཉིས་པར་མཚོ་སྔོན་ཞིང་ཆེན་གྱི་ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་11.7ཟིན་ནས་ན་ནིང་གི་དུས་མཚུངས་ལས་75.3%འཕར་བ་དང་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་པ་མ་ཟད། རྒྱལ་ཡོངས་ཀྱི་ཆ་སྙོམས་འཕར་ཚད་ལས་བརྒྱ་ཆའི་གྲངས་76.5ཡིས་མཐོ་བ་ཡོད་པ་རེད།

དམངས་གཉེར་ཁེ་ལས་ཀྱིས་མཚོ་སྔོན་གྱི་སྒོ་དབྱེ་རྣམ་པའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཧུར་ཐག་གཏོང་བའི་ཁྲོད་རྒྱུན་མཐུད་ནུས་པ་གལ་ཆེན་བཏོན་པས་ཕྱི་ཕྱོགས་ཚོང་དོན་གྱི་བྱེད་པོའི་གནས་བབ་སྔར་བས་མངོན་གསལ་དོད་དུ་ཕྱིན་ཡོད། ད་ལོའི་ཟླ་དང་པོ་དང་གཉིས་པར་ཞིང་ཆེན་ཡོངས་ཀྱི་དམངས་གཉེར་ཁེ་ལས་ཀྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་10.1ཟིན་ནས་ལྡབ་1.6འཕར་བ་དེས་ཞིང་ཆེན་ཡོངས་ཀྱི་ཕྱི་ཕྱོགས་ཚོང་དོན་རིན་ཐང་བསྡོམས་འབོར་གྱི་86.5%བཟུང་བ་དང་། བསྡུར་ཚད་ན་ནིང་ལས་བརྒྱ་ཆའི་གྲངས་29.2འཕར་བ། ཞིང་ཆེན་ཡོངས་ཀྱི་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་བྱེད་ཚད་བརྒྱ་ཆའི་གྲངས་93.7འཕར་རྒྱུར་སྐུལ་ཁྲིད་ཐེབས་ཡོད་པ་རེད།

ཞིང་ཆེན་ཡོངས་ཀྱིས་མ་བཅོས་རྒྱུ་ཆ་ཐོན་ཁུལ་དང་བཟོ་སྐྲུན་ལས་རིགས་རྟེན་གཞིའི་ལེགས་ཆ་ཧུར་ཐག་བཏོན་ཏེ། ནུས་རྒྱུ་གསར་པའི་ཐོན་ལས་འཁོར་འབྲེལ་གྱི་བཀོད་ཇུས་ལེགས་སུ་བཏང་ནས་ཕྱིར་གཏོང་གི་གོ་སྐབས་དམ་འཛིན་བྱས་པ་རེད། ནུས་རྒྱུ་གསར་པའི་ཐོན་རྫས་ཀྱི་ཕྱིར་གཏོང་འཕར་ཚད་མྱུར་པོ་ཡོད་ཅིང་། དེའི་ནང་ལིས་གློག་རྫས་ཕྱིར་གཏོང་བྱེད་ཚད་སྒོར་དུང་ཕྱུར་3.2ཟིན་ནས་ལྡབ་35.6འཕར་བ་དེས་ཞིང་ཆེན་ཡོངས་ཀྱི་ཕྱིར་གཏོང་རིན་ཐང་བསྡོམས་འབོར་གྱི་32.4%བཟུང་བ་དང་། འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་པ། ཟླ་བརྒྱད་བསྟུད་མར་འཕར་ཡོད་པ་བཅས་རེད། ཤེལ་མང་ཀུལ་གྱི་བར་གྱི་ཐོན་རྫས་ཕྱིར་གཏོང་བྱེད་ཚད་སྒོར་དུང་ཕྱུར་1.7ཟིན་ནས་ལྡབ་2.7འཕར་བ་དང་། ཕྱིར་གཏོང་གྲངས་འབོར་གྱིས་རྒྱལ་ཡོངས་ཀྱི་རིགས་མཚུངས་ཕྱིར་གཏོང་ཚོང་ཟོག་གི་67.4%ཟིན་ནས་རྒྱལ་ཡོངས་ཀྱི་ཨང་དང་པོར་སླེབས་པ་མ་ཟད། ཟླ་གསུམ་བསྟུད་མར་འཕར་ཡོད། དུས་མཚུངས་སུ་ཤེལ་མང་ཀུལ་གྱི་མ་བཅོས་རྒྱུ་ཆ་ནང་འདྲེན་བྱེད་ཚད་སྒོར་ཁྲི་4563ཟིན་ནས་ལྡབ་6འཕར་བ་དང་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད་པ་རེད།

ཞིང་ཆེན་ཡོངས་ཀྱིས“རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་དང་ཚོང་དོན་གྱི་གཞི་ཁྱོན་རྒྱུན་ཆད་མེད་པར་ཆེ་རུ་བཏང་ཞིང་། ཟླ་དང་པོ་དང་གཉིས་པར་འབྲེལ་ཡོད་རྒྱལ་ཁབ་དང་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་9.5ཟིན་ནས་91.7%འཕར་བ་དེས་ཞིང་ཆེན་ཡོངས་ཀྱི་ཕྱི་ཕྱོགས་ཚོང་དོན་རིན་ཐང་བསྡོམས་འབོར་གྱི་81.2%བཟུང་ཡོད། རྒྱལ་སྤྱིའི་ཚོང་དོན་རོགས་ཟླ་སྔར་བས་སྣ་མང་ཅན་དུ་འགྱུར་ཞིང་། ཚོང་དོན་རོགས་ཟླ་ཆེ་གྲས་མདུན་གྲལ་ལྔ་ནི་ཡོ་རོབ་མནའ་འབྲེལ་དང་། ཨེ་ཤེ་ཡ་ཤར་ལྷོའི་མནའ་འབྲེལ། ཨུ་རུ་སུ། ཁོང་ཀོ་དམངས་གཙོ་སྤྱི་མཐུན་རྒྱལ་ཁབ། ནེའུ་ཙི་ལན་བཅས་ཡིན་པ་དང་། ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་9.3ཟིན་པ་དེས་ཞིང་ཆེན་ཡོངས་ཀྱི་ཕྱི་ཕྱོགས་ཚོང་དོན་གྱི་རིན་ཐང་བསྡོམས་འབོར་གྱི་79.4%བཟུང་ཡོད་པ་རེད།