ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་14ཉིན་གློག་འཕྲིན་འབྱོར་གསལ།《2024ལོའི་ཀྲུང་གོའི་རང་བྱུང་ཐོན་ཁུངས་ཀྱི་སྤྱི་བསྒྲགས》ལས་མངོན་པར། རང་རྒྱལ་གྱི་མིས་བཟོས་ནགས་ཚལ་སོར་འཇོག་གི་རྒྱ་ཁྱོན་དང་རྩྭ་ཐང་གི་རྒྱ་ཁྱོན་གཉིས་ཀ་འཛམ་གླིང་གི་ཨང་དང་པོར་སླེབས་ཡོད།

ཚེས་14ཉིན་རང་བྱུང་ཐོན་ཁུངས་པུས་ཡོངས་བསྒྲགས་བྱས་པའི་སྤྱི་བསྒྲགས་ནང་བསྟན་པར། 2024ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་དམིགས་ཚད་དང་ལས་འགན་མངོན་འགྱུར་བྱེད་པའི་འགག་རྩའི་ལོ་ཞིག་རེད། རིམ་ཁག་རང་བྱུང་ཐོན་ཁུངས་གཙོ་སྐྱོང་སྡེ་ཚན་གྱིས་རྨོ་ཞིང་མུའུ་དུང་ཕྱུར་18ཀྱི་དམར་ཐིག་དང་སྐྱེ་ཁམས་སྲུང་སྐྱོང་གི་དམར་ཐིག་བརྟན་པོར་བསྲུངས་པ་བརྒྱུད། ནགས་ཚལ་ཁྱབ་ཚད་25%ལས་བརྒལ་བ་དང་། རྒྱལ་ཡོངས་ཀྱི་མིས་བཟོས་ནགས་ཚལ་སོར་འཇོག་གི་རྒྱ་ཁྱོན་དང་རྩྭ་ཐང་གི་རྒྱ་ཁྱོན་འཛམ་གླིང་གི་ཨང་དང་པོར་སླེབས་ནས་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན་འཛུགས་སྐྲུན་ལ་སྐུལ་འདེད་ནུས་ལྡན་ཐེབས་ཡོད།

2023ལོའི་རྒྱལ་ཡོངས་ཀྱི་རྒྱལ་ཁབ་ས་ཆ་འགྱུར་ལྡོག་གི་བརྟག་དཔྱད་བྱས་འབྲས་ལས་མངོན་པར། རྒྱལ་ཡོངས་སུ་ཁྱོན་ནགས་ས་སྤྱི་ཆིང་ཁྲི་28369.57ཡོད། དེའི་ནང་ལྡུམ་ཤིང་ནགས་ས་སྤྱི་ཆིང་ཁྲི་19660.49དང་། སྨྱུག་སྡོང་ནགས་ས་སྤྱི་ཆིང་ཁྲི་697.79 སྡོང་ཕྲན་ནགས་ས་སྤྱི་ཆིང་ཁྲི་5899.77 ནགས་ས་གཞན་དག་སྤྱི་ཆིང་ཁྲི་2111.52བཅས་ཡོད། རྒྱལ་ཡོངས་ཀྱི་ནགས་ཚལ་གྱི་རྒྱ་ཁྱོན་སྤྱི་ཆིང་དུང་ཕྱུར་2.47དང་མིས་བཟོས་ནགས་ཚལ་སོར་འཇོག་གི་རྒྱ་ཁྱོན་སྤྱི་ཆིང་ཁྲི་9240.87ཟིན་ནས་གོ་ལ་ཧྲིལ་པོའི་ཨང་དང་པོར་སླེབས་པ་དང་། ནགས་ཚལ་ཁྱབ་ཚད་25%ལས་བརྒལ་བ། ནགས་ཚལ་གསོག་འབོར་སྨི་ངོས་གྲུ་དུང་ཕྱུར་206.76ཟིན་ཡོད།

2023ལོའི་རྒྱལ་ཡོངས་ཀྱི་རྒྱལ་ཁབ་ས་ཆ་འགྱུར་ལྡོག་གི་བརྟག་དཔྱད་བྱས་འབྲས་ལས་མངོན་པར། རྒྱལ་ཡོངས་སུ་ཁྱོན་རྩྭ་ཐང་སྤྱི་ཆིང་ཁྲི་26321.57ཡོད། དེའི་ནང་རང་བྱུང་འབྲོག་ལས་རྩྭ་ཐང་སྤྱི་ཆིང་ཁྲི་21255.03དང་། མིས་བཟོས་རྩྭ་ཐང་སྤྱི་ཆིང་ཁྲི་58.82 རྩྭ་ཐང་གཞན་དག་སྤྱི་ཆིང་ཁྲི་5007.73བཅས་ཡོད། རྒྱལ་ཡོངས་ཀྱི་རྩྭ་ཐང་ཕྱོགས་བསྡུས་སྔོ་ཁེབས་ཁྱབ་ཚད་50%ཡན་བརྟན་པོ་བྱུང་ཡོད།