ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་14ཉིན་གློག་འཕྲིན་འབྱོར་གསལ། 《2024ལོའི་ཀྲུང་གོའི་རང་བྱུང་ཐོན་ཁུངས་ཀྱི་སྤྱི་བསྒྲགས》ལས་མངོན་པར། རང་རྒྱལ་གྱི་ཞིང་ཆེན་སྒྲོལ་བའི་ས་ཁོངས(འབབ་རྒྱུད)ཀྱི་རྒྱལ་ཁོངས་བར་སྟོང་འཆར་གཞི་བཟོ་བ་དང་སྙན་སེང་བཀའ་འཁྲོལ་ལ་ཚད་བརྒལ་རང་བཞིན་གྱི་འཕེལ་རྒྱས་བྱུང་ཡོད་པ་རེད།

ཚེས་14ཉིན་རང་བྱུང་ཐོན་ཁུངས་པུས་ཁྱབ་བསྒྲགས་བྱས་པའི་སྤྱི་བསྒྲགས་ནང《འབྲི་ཆུའི་དཔལ་འབྱོར་རྒྱུད—འབྲི་ཆུའི་འབབ་རྒྱུད་ཀྱི་རྒྱལ་ཁོངས་བར་སྟོང་འཆར་གཞི(2021ལོ་ནས་2035ལོ་བར)》ལ་2024ལོའི་ཟླ་2པར་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་སྟེ། རྒྱལ་སྲིད་སྤྱི་ཁྱབ་ཁང་གི་ཆོག་མཆན་དངོས་སུ་ཐོབ་ནས་ལག་ལེན་བསྟར་བའི་ས་ཁོངས(འབབ་རྒྱུད)ཀྱི་རྒྱལ་ཁོངས་བར་སྟོང་འཆར་འགོད་དང་པོར་གྱུར་ཡོད། རྒྱལ་ཡོངས་ཀྱི་མཚོ་འགྲམ་རྒྱུད་ཀྱི་ཆེད་དོན་འཆར་འགོད་ལ་2024ལོའི་ཟླ་9པར་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་ཡོད། མིག་སྔར《པེ་ཅིང་དང་། ཐེན་ཅིན། ཧོ་པེ་བཅས་ཀྱི་རྒྱལ་ཁོངས་བར་སྟོང་འཆར་གཞི(2021ལོ་ནས་2035ལོ་བར)》དང《རྨ་ཆུའི་འབབ་རྒྱུད་ཀྱི་རྒྱལ་ཁོངས་བར་སྟོང་འཆར་གཞི(2021ལོ་ནས་2035ལོ་བར)》བཟོ་འགོད་ལེགས་གྲུབ་བྱུང་བ་དང་འབྲེལ་རྒྱལ་སྲིད་སྤྱི་ཁྱབ་ཁང་ལ་ཞིབ་བཤེར་བྱེད་པར་ཕུལ་བ་དང་། སི་ཁྲོན་དང་ཁྲུང་ཆིང་གི《ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་གཉིས་དཔལ་འབྱོར་ཁུལ་གྱི་རྒྱལ་ཁོངས་བར་སྟོང་འཆར་གཞི(2021ལོ་ནས་2035ལོ་བར)》བཟོ་འགོད་ལེགས་གྲུབ་བྱུང་བ། 《འབྲི་ཆུའི་ཟུར་གསུམ་གླིང་གི་རྒྱལ་ཁོངས་བར་སྟོང་འཆར་གཞི(བསམ་འཆར་བསྡུ་ལེན་མ་ཟིན)》བཟོས་ཟིན་ཞེས་འཁོད་ཡོད།

སྤྱི་བསྒྲགས་ནང་ཁོངས་གཏོགས་ཀྱིས་རྒྱལ་ཡོངས་ཀྱི་རྒྱལ་ཁོངས་བར་སྟོང་འཆར་འགོད་རྩ་གནད་དོན་འཁྱོལ་གཏིང་ཟབ་བྱས་ཤིང་། ཞིང་ཆེན་རིམ་པའི་རྒྱལ་ཁོངས་བར་སྟོང་འཆར་འགོད་ཚང་མར་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་ནས་ལག་ལེན་བསྟར་བ་དང་། རྒྱལ་སྲིད་སྤྱི་ཁྱབ་ཁང་ལ་ཞིབ་བཤེར་ཆོག་མཆན་འགོད་རྒྱུར་ཕུལ་བའི་གྲོང་ཁྱེར་གྱི་རྒྱལ་ཁོངས་བར་སྟོང་སྤྱིའི་འཆར་གཞི་བཟོ་འགོད་བྱེད་པར་སྐུལ་འདེད་བཏང་ཞིང་། ནན་ཅིང་དང་ཀོང་ཀྲོའུ་སོགས་གྲོང་ཁྱེར་24ལ་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ། ཞིང་ཆེན་གྱི་ཆོག་མཆན་ཐོབ་པའི་གྲོང་ཁྱེར་དང་རྫོང་གི་སྤྱིའི་འཆར་འགོད་ལས་དོན་ལ་དུས་མཉམ་དུ་སྐུལ་འདེད་བཏང་ཞིང་། 2024ལོའི་ལོ་མཇུག་བར་གྲོང་ཁྱེར་དང་རྫོང་གི་རྒྱལ་ཁོངས་བར་སྟོང་སྤྱིའི་འཆར་གཞི་བཅུ་ཆ་དགུ་ཙམ་ལ་ཆོག་མཆན་ཐོབ་ནས་ལག་ལེན་བསྟར་ཟིན་ཞེས་བསྟན་ཡོད།