ཕྱི་རྒྱལ་དུ་ཡོད་པའི་ཀྲུང་གོའི་ཁེ་ལས་རྣམ་གྲངས་ཀྱིས་ས་གནས་དེ་གའི་སྐྱེ་དངོས་སྣ་མང་རང་བཞིན་སྲུང་སྐྱོང་ལ་རམ་འདེགས་བྱེད་པ།
ལྗང་མདོག་གི་འདུ་ཤེས་ལ་བརྟེན་ནས་སའི་གོ་ལའི་ཁྱིམ་གཞིས་སྲུང་སྐྱོང་བྱེད།
ཨན་ཀོ་ལར་ཤིང་དམར་ནགས་ཚལ་འདེབས་གསོ་བྱས་པ་དང་། ཝུ་ཀན་ཏའི་རི་སྐྱེས་སྲོག་ཆགས་འཚོ་སྡོད་ཁུལ་ལ་སྲུང་སྐྱོང་བྱས་པ། སུའུ་ཏན་དུ་གཙོད་ཕྲུག་དང་རྔ་མོང་བྱར་ལྟ་རྟོག་བྱས་པ་སོགས། ལོ་མང་རིང་ཀྲུང་གོ་རྡོ་སྣུམ་རྫས་འགྱུར་ཚོགས་པས་ཨ་ཧྥེ་རི་ཁར་སྣུམ་རླངས་ལ་མ་འཇོག་དང་ལས་གྲྭའི་རྣམ་གྲངས་འཛུགས་སྐྲུན་ལག་བསྟར་བྱེད་པའི་བརྒྱུད་རིམ་ཁྲོད། སྔོན་ལ་ཁོར་ཡུག་སྲུང་སྐྱོང་བྱེད་པའི་རྩ་དོན་ཐོག་མཐའ་བར་གསུམ་དུ་མཐའ་འཁྱོངས་བྱས་ནས་ས་གནས་དེ་གའི་སྲོག་ཆགས་དང་རྩི་ཤིང་སྲུང་སྐྱོང་ལ་མཐོང་ཆེན་བྱས་ཏེ་མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་འདེད་གཏོང་གི་ཡོད།
སྐྱེ་དངོས་སྣ་མང་རང་བཞིན་ནི་མིའི་རིགས་འཚོ་གནས་དང་འཕེལ་རྒྱས་ཀྱི་རྨང་གཞི་གལ་ཆེན་ཞིག་དང་གོ་ལ་ཧྲིལ་པོའི་ཚེ་སྲོག་གཅིག་མཐུན་ཚོགས་པའི་འབྱུང་རྩ་དང་རྨང་གཞི་ཡིན། སྐྱེ་དངོས་སྣ་མང་རང་བཞིན་སྲུང་སྐྱོང་བྱེད་པ་དེས་སའི་གོ་ལའི་ཁྱིམ་གཞིས་སྲུང་སྐྱོང་དང་མིའི་རིགས་རྒྱུན་མཐུད་ཆོག་པའི་འཕེལ་རྒྱས་ཀྱི་མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་རྒྱུར་ཕན་ཐོགས་ཡོད།
ཉེ་བའི་ལོ་ཤས་རིང་། ཀྲུང་གོའི་ཁེ་ལས་ཀྱིས་ཕྱི་རྒྱལ་དུ་རྣམ་གྲངས་འཛུགས་སྐྲུན་བྱེད་སྐབས་ལྗང་མདོག་དང་རྒྱུན་མཐུད་ཆོག་པའི་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱས་ནས་ཁོར་ཡུག་སྲུང་སྐྱོང་གི་འགན་འཁྲི་ཧུར་ཐག་ཁུར་ཏེ་བྱེད་ཐབས་སྣ་ཚོགས་སྤྱད་པས་རྣམ་གྲངས་གནས་ཡུལ་གྱི་སྐྱེ་དངོས་སྣ་མང་རང་བཞིན་སྲུང་སྐྱོང་བྱས་པར་ཕན་འབྲས་མངོན་གསལ་དོད་པོ་ཐོན་ཡོད།